Gjeneva feston 200 vjetorin e hyrjes në Konfederatën Zvicerane

Pasi që Napoleoni tërhiqet, Gjeneva kërkon bashkimin me Konfederatën e Zvicrës. Për këtë arsye Konfederata, në vitin 1814 i dërgon trupat e saj në Gjenevë

Gjeneva, gjatë ditëve të këtij vikendi është duke festuar 200 vjetorin e arritjes së trupave ushtarake të Konfederatës së Zvicrës në territorin që një vit më vonë (1815) do të bëhej kanton në kuadrin e po kësaj konfederate.

Nga vitit 1789 deri në vitin 1813 Gjeneva ka qenë pjesë e Francës, nën sundimin e Napoleonit. Por pasi që Napoleoni tërhiqet, Republika e Gjenevës kërkon bashkimin me Konfederatën e Zvicrës. Për këtë arsye Konfederata e atëhershme i dërgon trupat e saj në Gjenevë, me çka fillon procesi i bashkimit.

Gjeneva, për shkaqe historike, edhe dyqind vjet pas bashkimit, në emërtimin e saj zyrtar “Republika dhe Kantoni i Gjenevës” ruan një lloj mëvetësie Brenda Zvicrës.

Në kuadrin e festimeve, të shtunën është zhvilluar një parakalim me mbi 1200 pjesëmarrës, të cilët kanë parakaluar nga Bastions-Park deri te porti Port-Noir, në Liqenin Leman, aty ku kanë zbarkuar trupat e Konfederatës.

Mysafir në manifestim ka qenë edhe presidenti i Federatës, Didier Burkhalter. “Gjeneva dhe Zvicra për miliona njerëz në botë janë sinonime për paqen.

Liria, solidariteti dhe përgjegjësia janë tri vlerat e përbashkëta të Gjenevës dhe të Zvicrës për këto 200 vite”, ka thënë veç tjerash Burkhalter në fjalën e mbajtur me këtë rast.

Gjatë tri ditëve festive janë planifikuar 200 aktivitete, shkruan srf.ch. Parada të anijeve, koncerte, parakalimi historik etj. I gjithë spektakli kushton 4.5 milionë franga, gjysma e të cilave mbulohet nga taksapaguesit.

Gjeneva sot ka afër 200 mijë banorë dhe është qyteti i dytë në Zvicër pas Cyrihut  për nga madhësia. Po ashtu pas Cyrihut është metropoli më i madh bankar në Zvicër. Afër gjysma e banorëve të Gjenevës  janë shtetas të huaj.

Gjeneva njihet për numrin e madh të organizatave ndërkombëtare që kanë selinë në këtë qytet. Selia evropiane e OKB-së dhe shumë organizata që veprojnë në kuadrin e saj kanë domicilin e tyre në qytetin buzë liqenit Leman. Po ashtu këtu është themeluar nga Henry Dunant dhe ka selinë edhe Organizata botërore e Kryqit të Kuq etj.

Në vitin 2015 Gjeneva do të festojë sërish. Atëherë do të shënohet 200 vjetori i nënshkrimit të marrëveshjes për bashkim me Konfederatën e Zvicrës.