GJEDNJ dënon Zvicrën: Ka dështuar të mbrojë një grua nga dhuna e burrit

Policia nuk i kishte treguar asaj asgjë për historinë e dhunshme të burrit, që të mos shkaktohej shkelje e privatësisë

Gjykata Evropiane për të Drejtat e Njeriut me seli në Strasburg ka dënuar Zvicrën për dështimin në ofrimin e mbrojtjes së duhur ndaj një gruaje nga dhuna e ushtruar prej partnerit të saj.

Burri kishte qenë i dënuar më parë për përdhunim dhe vrasje, disa vite para lidhjes me të. Më vonë, ai kishte rrëmbyer, përdhunuar dhe abuzuar ish-partneren e tij pasi ajo ishte ndarë prej tij. Gruaja e kishte denoncuar më herët në polici, pasi ish-bashkëshorti e kishte kërcënuar.

Megjithatë, policia nuk i kishte treguar asaj asgjë për historikun e dhunshëm të burrit, me arsyetimin se do të cenohej privatësia e tij.

Gjykata Evropiane për të Drejtat e Njeriut tani ka konstatuar se autoritetet nuk kanë marrë hapat e nevojshëm për të informuar dhe mbrojtur gruan.

---