Gjashtëmujori me më së paku dëme nga katastrofat natyrore në botë

Dëmet gjatë këtij gjysmëvjetori janë më të vogla se gjysma e mesatares së dëmeve nga katastrofat natyrore të viteve të fundit për një periudhë të tillë

Në gjysmën e parë të vitit 2019, në gjithë botën është regjistruar një trend i rënies së ndieshme të dëmeve të shkaktuara nga katastrofat natyrore. Kështu, siç konstaton kompania gjermane e risigurimit, “Munich Re”, sasia e dëmeve të shkaktuara gjatë periudhës në shqyrtim, llogaritur me para, ka qenë 42 miliardë dollarë.

Sado e madhe që duket kjo shumë, ajo është më e vogël se gjysma e mesatares së dëmeve nga katastrofat natyrore, të regjistruara gjatë viteve të fundit për një periudhë të tillë, shkruan srf.ch.

Më së shumti viktima nga këto katastrofa ka shkaktuar cikloni Idai që ka kaluar nëpër Mozambik, Afrikë, transmeton albinfo.ch. Më shumë se 1000 veta kanë gjetur vdekjen si pasojë e atij cikloni.

Ndërsa katastrofa natyrore që ka shkaktuar më së shumti dëme materiale gjatë periudhës së përmendur ka qenë seria e disa tornadove dhe e motit të ligë që pati përfshirë SHBA-në, përcjell albinfo.ch. Është llogaritur se dëmi që është shkaktuar nga këto fatkeqësi ka qenë 3.3 miliardë dollarë.

Kompania risiguruese Munich Re doklumenton prej dhjetëra vitesh dëmet që shkaktohen në botë nga katastrofat natyrore.

---