Gati 7.000 persona janë përpjekur të lënë duhanin me ndihmën e Facebook-ut

Një nga tre pjesëmarrësit nuk pi duhan ose pi më pak, pasi që ka provuar t’i thotë lamtumirë cigares nëpërmjet Facebook-ut. Programi në fjalë u është drejtuar banorëve të pjesës frankofone të Zvicrës dhe zgjati gjashtë muaj.

Nga 7008 veta të regjistruar në programin “Lëre duhanin” në Facebook, i nisur më 20 mars, 37.6% prej tyre kanë ndaluar pirjen e duhanit ose e kanë ulur, theksoi të martën një grup i ekspertëve përgjegjës për vlerësimin e metodës nga Fondi për parandalimin e duhanit. Kështu, 946 kandidatë (13.5%) kanë ndaluar tërësisht pirjen e duhanit për gjashtë muaj.

Të tjerët kanë qenë me më pak fat: 1314 (19.6%) të pjesëmarrësve ende vazhdojnë të mundohen ta lënë, duke pirë duhan herë pas here. Ndërsa 315 (4.5%) kanë hequr dorë nga dëshira për ta lënë duhanin, por vërejnë se kanë ulur konsumin e tyre.

Projekt-pilot në Valais

Ky operacion pritet të vazhdojë në Zvicrën perëndimore dhe do të shtrihet në pjesën gjermanofolëse të Zvicrës më 2017. Dy kantonet e mëdha (Berna dhe Cyrihu) kanë shprehur tashmë interes.

Ky program është i bazuar në projektin pilot të kryer që nga 7 shtatori 2015 në kantonin Valais. Nga 1000 pjesëmarrës, më shumë se gjysma e të anketuarve kanë ndërprerë duhanit  pas tre muajsh. Sipas metodave të ndryshme të përdorura, në mënyrë individuale ose në grupe, është regjistruar një sukses prej 5 deri në  20%.