Gara për gazin, çfarë po ndodh në Evropë?

Presidentja e Komisionit Evropian, Ursula von der Leyen, pas përfundimit të samitit joformal në Slloveni, u shpreh se të tjerët – referuar vendeve eksportuese të gazit – duhet të ndiqnin shembullin e Norvegjisë.

Shteti nordik, një nga furnizuesit e vendeve evropiane, rriti prodhimin e vet.

Në të njëjtën kohë, presidenti rus, Vladimir Putin, deklaroi se Gazprom-i rus kishte shtuar furnizimet në Evropë “me më shumë se 8%”.

Putin u angazhua se autoritetet ruse “do t’i tejkalojnë detyrimet kontraktuale për furnizimin me gaz përmes territorit të Ukrainës”.

Inflacioni dhe gara

Paqëndrueshmëria e madhe e tregjeve të energjisë po shton frikën për një rritje të inflacionit dhe një ngadalësim të rimëkëmbjes.

Rritja e çmimeve të gazit dhe energjisë elektrike po shqetëson udhëheqësit e BE-së.

Këta të fundit pritet të diskutojnë sesi të ndërhyjnë në Këshillin Evropian, duke filluar nga komunikimi që do të paraqesë Komisioni i BE-së, të mërkurën e 13 tetorit, me mjetet për të adresuar “urgjencën”.

Presidenti i Këshillit Evropian, Charles Michel, deklaroi se energjia është një përgjegjësi kombëtare, por ka një hapësirë politike – për të ndjekur një qasje evropiane, transmeton AP, përcjell Albinfo.ch.

Shtetet janë të ndara për zgjidhjet.

Grupi i shteteve, i përbërë nga Franca, Spanja, Greqia, Republika Çeke dhe Rumania po bëjnë presion për një përgjigje të shpejtë nga Komisioni dhe për zgjidhje të koordinuara.

Që nga reforma e tregut të energjisë në blerjet dhe ruajtjen e përbashkët të gazit, të cilat megjithatë do të adresohen në rishikimin e “Paketës së tretë të energjisë për gazin”.

Kjo paketë do të paraqitet në muajin dhjetor dhe orientimi i saj është drejt një sistemi mbi baza vullnetare.

Shtetet e Veriut, por edhe Gjermania, Belgjika dhe Holanda janë më të kujdesshme në qasjen e tyre.

Për ministren gjermane, Svenja Schulze, “përpjekja për të ndikuar në tregun e lirë është diçka për të cilën ne jemi shumë skeptikë”.

Masat politike

Komisionerja e BE-së për Energjinë, Kadri Simson, tha në seancën plenare të Parlamentit të BE-së në Strasburg – se duhet të merren pa asnjë dyshim, “masa politike”.

Paketa e mjeteve që Komisioni do të paraqesë më 13 tetor do t’u sigurojë Shteteve Anëtare mundësi për të siguruar mbështetje.

Kjo do të jetë e synuar për konsumatorët, me pagesa direkte për ata që janë në rrezik të varfërisë energjetike.

Sipas Simson, këto masa mund të merren shpejt, në bazë të rregullave evropiane.

Zyrtarja evropiane shtoi se prioriteti i menjëhershëm është zbutja e ndikimeve sociale, për të mbrojtur familjet e cenueshme dhe për të siguruar që varfëria energjetike të mos përshkallëzohet.

 

---