Gara mes Ahmetit dhe Abrashit, dështimi i Çelajt

Rezultatet e publikuara nga Demokracia në Veprim janë pranuar nga dy kandidatët për kryetar të Komunës së Prishtinës, Shpend Ahmetit nga VV-ja dhe Arban Abrashi i LDK-së, shkruan albinfo.ch.

Ahmeti ka thënë se VV-ja ka dyfishuar numrin e votuesve në kryeqytetin e Kosovës. “Faleminderit nga zemra për të gjithë votuesit në Prishtinë. Nga 16 mije vota për Kuvendin Komunal në 2013 (10 asamblistë) kemi mbi 35 mijë vota për Kuvend dhe mbi 20 asamblistë. Kemi marr edhe më shumë vota për kryetar se sa në zgjedhjet e 11 qershorit me mbi 40 mijë vota dhe kemi dal bindshëm të parët. Në emër të krejt Lëvizjes ju falënderojmë nga zemra”, ka shkruar Ahmeti në rrjetet sociale.

Kandidati i LDK-së për kryetar të Komunës së Prishtinës, Arban Abrashi, ka thënë se qëllimi i tij është arritur në rundin e parë në Prishtinë. “Ne kemi thënë se ne synojmë balotazhin dhe tani shumë shpejt ju garantoi se do ta fitojmë Prishtinën”, ka thënë Abrashi në konferencë për media.

Kandidati për kryetar të komunës së Prishtinës nga Partia Demokratike e Kosovës, Lirak Çelaj nuk ka arritur të bind qytetarët e Prishtinës për të parin e komunës.

Të sipas rezultateve preliminare të DnV-së, Çelaj nuk ka arritur të fitojë më shumë se 5.72 % të votave në Prishtinë.