Fundi i mashtrimit me kilometrazhin? Si po kërkon BE transparencë për veturat e përdorura

Komisioni Evropian ka prezantuar një propozim për krijimin e një baze të dhënash të përbashkët për kilometrazhin e regjistruar të automjeteve, i cili do të ndihmojë në luftimin e manipulimeve të kilometrazhit të automjeteve të përdorura në të gjitha shtetet anëtare të BE-së.

Ky propozim, i bërë nga Brukseli, është pjesë e një pakete më të gjerë masash që synojnë përmirësimin e sigurisë rrugore, reduktimin e ndotjes së ajrit dhe luftimin e mashtrimeve që lidhen me tregun e automjeteve. Propozimi parashikon krijimin e një regjistri të përbashkët për kilometrazhin e automjeteve, duke mundësuar një transparencë të plotë në tregun e makinave të përdorura dhe duke parandaluar “përtëritjen” e rreme të automjeteve që shiten për t’i mashtruar blerësit.

Disa shtete të BE-së, përfshirë Belgjikën dhe Francën, tashmë kanë sisteme kombëtare që regjistrojnë kilometrazhin gjatë kontrollit teknik. Belgjika ka implementuar një sistem të njohur si Car-Pass, ku shitësit janë të detyruar t’u ofrojnë blerësve një dokument të përditësuar të kilometrazhit. Në Francë, gjithashtu, ky informacion është i disponueshëm për blerësit, edhe pse në formë opsionale.

Komisioni Evropian ka propozuar që çdo shtet anëtar të regjistrojë kilometrazhin e automjeteve në bazat e të dhënave kombëtare dhe që ky informacion të transferohet në një bazë të dhënash evropiane. Kjo do t’u mundësojë autoriteteve dhe blerësve potencialë të verifikojnë të dhënat për çdo automjet të regjistruar në BE.

Lufta kundër mashtrimeve të kilometrazhit është thelbësore për mbrojtjen e konsumatorëve dhe për sigurinë e tregut të automjeteve. Propozimi ka për qëllim një treg më të drejtë dhe më të sigurt për blerësit dhe shitësit, duke ulur mundësinë e manipulimeve gjatë shitjes së makinave të përdorura.

Megjithatë, ky propozim ende do të kalojë nëpër një proces të gjatë të miratimit nga Parlamenti Evropian dhe Këshilli i BE-së, përpara se të hyjë në fuqi.