Frika më e madhe e zviceranëve, centralet atomike

61 për qind të tyre e vendosin këtë si frikë numër një në listë. Pas centraleve atomike, në radhë janë sulmet terroriste, nga të cilat kanë frikë 55%

Nga çka frikësohen më së shumti zviceranët, kanë dashur të dijnë realizuesit e një sondazhi të bërë me qytetarët e Zvicrës. Universiteti ETH i Cyrihut dhe Radiotelevizioni i Zvicrës SRF kanë qenë bartës të sondazhit reprezentativ.

Sipas rezultateve të publikuara të premten, më së shumti frikë zviceranët mesatarë kanë nga centralet atomike në vend. 61 për qind të tyre e vendosin këtë si frikë numër një në listë. Pas centraleve atomike janë sulmet terroriste ato që shkaktojnë më së shumti frikë te qytetarët e Zvicrës. Terrorizmin e kanë prezantuar si shkaktarin më të madh të frikës 55 për qind të të anketuarve.

E treta në listë për nga përhapja është frika që shkakton struktura e ndryshuar gjenetikisht e artikujve ushqimorë, për të cilën janë përcaktuar 53 për qind.

Ndërsa në mesin e rreziqeve më të vogla në sondazhin e përmendur janë klasifikuar ndodtja e ajrit nga gazrat e makinave dhe zhvillimi i viruseve rezistentë ndaj antibiotikëve.