Forcohet euro, aprovohet paketa 120 miliardëshe

Monedha evropiane është forcuar sërish të premten në mëngjes pasi liderët e vendeve të eurozonës kanë arritur marrëveshje për t’i ndihmuar ekonomitë me probleme, siç janë Spanja dhe Italia.

Këmbimi i euros ka shkuar një gjysmë centi më lartë të premten  dhe kushton përsëri më shumë se 1.26 dollarë. Edhe me frangun është rritur vlera e euros nga 1.2010 në 1.2016.

Në samitin që po zhvillohet në Bruksel udhëheqësit e BE-së kanë rënë dakord në parim mbi një paketë ndihme për eurozonën me vlerë 120 miliardë euro, bëri të ditur shefi i Këshillit Evropian, Herman van Rompuy.

Pas bisedimeve në Bruksel, që zgjatën pothuajse tërë natën, liderët e 17 vendeve të eurozonës u pajtuan që ta përdorin paketën e ndihmës së Bashkimit Evropian për dërgimin e fondeve direkt në bankat që kanë vështirësi.

Presidenti i Këshillit të Evropës, Herman Van Rompoj, këtë marrëveshje e ka vlerësuar si “kthesë me të cilën bankat mund të rikapitalizohen dirket”.

Liderët e eurozonës, po ashtu, u pajtuan që vendet e Bashkimit Evropian, që u përmbahen rregullave të buxhetit, mund të kërkojnë ndihma me kushte jo të ashpra.