Fondacioni Gates, 500 milionë dollarë për luftimin e malaries

Në muajin shtator ky fondacion kishte bërë një donacion prej 50 milionë dollarësh kundër sëmundjes së Ebola-s në Afrikën Perëndimore

Fondacioni i Bill Gates-it themeluesit të kompanisë Microsoft ka vendosur të dhurojë 500 milionë dollarë për luftën kundër  sëmundjeve infektive në vendet në zhvillim. Në fokus të fondacionit janë sëmundjet si malaria, ndezja e mushkërive dhe diarreja.

Në muajin shtator ky fondacion kishte bërë një donacion prej 50 milionë dollarësh kundër sëmundjes së Ebola-s në Afrikën Perëndimore. Epidemia Ebola është një “moment kritik” në historinë e shëndetësisë globale, ka thënë Gates të dielën  në takimin vjetor të shoqatës amerikane për mjekësinë tropikale të mbajtur në New Orleans.

Paraqitja e kësaj epidemie ka treguar se sa rëndësi ka që me përpjekje më të mëdha t`u dilet përpara kërcënimeve nga sëmundjet e rrezikshme si malaria, ka thënë ai.

Gates e ka cilësuar si problem të veçantë rezistencën në rritje ndaj barnave kundër malaries në Azinë juglindore. Për këtë arsye, një pjesë e parave që i ka dhuruar ai, duhet të shkojnë në hulumtimet për të gjetur një vaksinë më efektive.