Fluks në rritje i refugjatëve, shtohen kapacitetet për pranim

Zyra Federale për Migracion ka vendosur të shtojë kapacitetin e qendrës për pranim në Chiasso, ka deklaruar një zëdhënëse e kësaj zyre

Kapacitetet e Zvicrës për strehimin valës më të re të refugjatëve që po ia mësyjnë këtij vendi nuk janë të mjaftueshme. Informatat për shtimin e numrit të azilkërkuesve, kryesisht nga Siria dhe nga Eritrea,  në qendrat për pranim kanë ngritur shkallën e shqetësimit të autoriteteve të këtushme.

Zyra Federale për Migracion ka vendosur të shtojë kapacitetin e qendrës për pranim në Chiasso, ka deklaruar një zëdhënëse e kësaj zyre për emisionin 10vor10.

Si masa plotësuese për rritjen e kapaciteteve janë hapur vendstrehime të reja në nivel federal në Losone dhe në Perreux të kantonit Neushatel. Në këto dy qendra pritet të strehohen  rreth 300 refugjatë të rinj.

Ndaj situatës më të re kanë reaguar edhe kantonet. Kështu, kantoni i Bernës pritet që nga mesi muajit të hapë një qendër të re strehimi për azilkërkuesit në Riggisberg.