Flasin nga familja e gruas që dyshohet se mbyti foshnjën e saj

Foto ilustrim (Keystone)

Një foshnjë porsalindur e gjinisë mashkullore ka humbur jetën gjatë ditës së djeshme në Prizren, shkruan albinfo.ch.

Foshnja e pajetë u gjet në tavanin e shtëpisë, sipas njoftimit të Policisë së Kosovës. E për këtë vdekje, po akuzohet nëna e foshnjës, e cila është arrestuar dhe është dërguar në mbajtje.

“Trupi i pajetë i foshnjës është gjetur në tavanin e shtëpisë dhe me vendim të prokurorit është dërguar në IML për obduksion”, thuhet në njoftimin e Policisë, përcjell albinfo.ch.

Për ngjarjen në fjalë janë rrëfyer edhe nga familja e së dyshuarës, përmes një kronike të realizuar nga Klan Kosova. Njerka e së dyshuarës, e cila ka folur në kushte anonimiteti, ka thënë se fillimisht kishte dëgjuar disa zëra gjatë kohës kur e dyshuara po lindtte.

“Pak a shumë dyshoja se diku e ka fshehur, po kisha frikë ta prekja, thashë më mirë e gjen vetë shteti”, ka rrëfyer njerka e së dyshuarës.

Tutje, ajo ka treguar se gjatë nëntë muajve të shtatëzanisë e dyshuara e kishte mohuar se është shtatëzënë.

Ajo ka thënë se është hera e tretë që vajza e burrit të saj po lind fëmijë.

“Ajo ka shkuar në spital… dhe e ka falë fëmijën. I treti rast është, valla. Edhe një e ka mbytur vjet, por vjet nuk kemi mundur ta verifikojmë”, i ka thënë njerka televizionit, përcjell albinfo.ch.