Flamujt e Kosovës “pushtojnë” Fshatin Olimpik në Azerbajxhan

Foto: KOK

Kosova po përfaqësohet nga 18 sportistë në Festivalin Olimpik Evropian për të Rinj (EYOF) Baku 2019 që po mbahet në Azerbajxhan, shkruan albinfo.ch.

Ekipi Olimpik i Kosovës, i ndarë në pesë kategori, me flamuj të Kosovës sot e ka nisur ditën e parë të këtij festivali.

Komiteti Olimpik i Kosovës ka postuar fotografi para hapjes së ceremonisë së festivalit, ku shihen sportistët me flamuj në duar. E flamujt e Kosovës kanë zënë vend edhe në ndërtesën mbrapa tyre, në Fshatin Olimpik.

“Flamuri ynë në Fshatin Olimpik të Festivalit Olimpik Evropian për të Rinj, Baku 2019”, kanë shkruar nga KOK.

Sportistët e Kosovës, të cilët janë të moshave 15-18 vjeçare, do të garojnë në xhudo, atletikë, not, mundje dhe tenis. Ky festival do të zgjasë deri më 27 korrik, përcjell albinfo.ch.