Fjalët e kryeministrit Haradinaj para nisjes për në Hagë

Foto: Ramush Haradinaj (Fb)

Kryeministri në dorëheqje i Kosovës, Ramush Haradinaj, sot është nisur për në Hagë, përcjell albinfo.ch.

Siç pati njoftuar vetë Haradinaj, ai është ftuar si i dyshuar, dhe për kërë arsye ka dhënë dorëheqje nga posti i kryeministrit.

Ndër të tjerash, ai ka thënë se po niset drejt Hagës “i palëkundur për vendimet e mia jetësore dhe i patrazuar e ballëlartë”.

Shkrimi i plotë i Haradinajt në Facebook:

Luftëtarët e lirisë gjithmonë ishin të rreshtuar me të drejtën!

Sot, si Ramush Haradinaj, qytetar i Republikës së Kosovës, i përgjigjem ftesës për intervistim nga Dhomat e Posaçme në Hagë. Tërësisht në të drejtën e Kosovës, i palëkundur për vendimet e mia jetësore dhe i patrazuar e ballëlartë. Kosova ka ecur përpara në rrugëtimin euro-atlantik dhe është më e fortë se kurrë, në rreshtin e paqes dhe miqësi të përhershme me ShBA-në. Kosova është e gatshme të dialogojë me Serbinë deri në arritjen e një marrëveshjeje finale ligjërisht obliguese, përfshi njohjen reciproke në kufijtë ekzistues. Por, tregun e japim vetëm për njohje.

Me nder kam mbrojtur të drejtën tonë, dje, sot dhe do ta mbrojë gjithmonë!

RH