Filmi iranian merr çmimin kryesor në Festivalin e Filmit në Lokarno

(KEYSTONE/Pascal Bloch)

Filmi “Mantagheye bohrani” (shqip:Zonë kritike) nga regjisori iranian Ali Ahmadzadeh fitoi Pardo d’oro (Leopardi i Artë) në Festivalin e 76-të të Filmit në Lokarno, raporton swissinfo, përcjell albinfo.ch.

Filmi i xhiruar fshehurazi në rrugët e Teheranit pa leje nga autoritetet iraniane është një “himn për lirinë dhe rezistencën në Iran”, thanë organizatorët e festivalit të shtunën.

Në këtë film personazhi kryesor, një trafikant droge, lëviz me makinë rreth Teheranit natën. Ndërsa ai bënë dërgesat e tij, takon një stjuardesë, një nënë që përpiqet të shpëtojë djalin e saj të varur nga droga dhe një grup punonjësish transeksualë të seksit.

“Bërja e këtij filmi ishte një akt rebelimi. Fakti që njerëzit po e shohin është një fitore edhe më e madhe për ne”, tha Ali Ahmadzadeh për revistën online filmike “Cineuropa”.

Regjisori 37-vjeçar iranian nuk kishte mundësi të largohej nga Irani për të udhëtuar në Zvicër për të prezantuar filmin e tij. Filmat e tij janë ndaluar në Iran nga regjimi.

“Ky ka qenë një edicion emocionues, duke ripohuar qendrën e Festivalit të Filmit në Locarno dhe aftësinë e tij për të eksploruar kinemanë bashkëkohore në çdo formë dhe madhësi, duke rrëmbyer zemrat dhe mendjet e publikut tonë bujar, kurioz dhe pasionant, i cili u mblodh në Piazza Grande dhe teatro në numër të madh”, tha Giona A. Nazzaro, drejtore artistike e Festivalit të Filmit në Locarno.

Gjithsej, në programin e këtij viti u prezantuan 214 filma, ose gjithsej 466 shfaqje.