Festivali i filmit në Cyrih, ndër më të shtrenjtët në botë

Bileta deri në 90 franga

Festivali i Filmit në Cyrih (ZFF), një nga ngjarjet më të mëdha kulturore të Zvicrës, po tërheq vëmendje këtë vit jo vetëm për premierat ndërkombëtare dhe praninë e yjeve të mëdhenj – por edhe për çmimet e larta të biletave, përcjell albinfo.ch.

Bileta deri në 90 franga

Për ata që dëshirojnë të ndjekin premierën e shumëpritur të filmit “Ballad of a Small Player”, me aktorin hollivudian Colin Farrell, çmimi i një bilete në Qendrën e Kongreseve të Cyrihut është 89.90 CHF. Shtatë premiera të tjera kushtojnë 60 CHF, ndërsa shumica e filmave të rregullt shiten me çmime që variojnë nga 27 deri në 33 CHF.

Këto tarifa e pozicionojnë ZFF-në si një nga festivalet e filmit më të shtrenjta në botë – një fakt që ka ngjallur diskutime mes dashamirësve të kinemasë dhe profesionistëve të industrisë.

Pse kaq shtrenjtë?

Organizatorët e festivalit justifikojnë çmimet e larta me kostot e organizimit, ambientet prestigjioze, dhe faktin se shumë nga premierat janë ngjarje gala, që përfshijnë prani të figurave të njohura të filmit botëror dhe një përvojë ekskluzive për publikun.

Megjithatë, për një pjesë të spektatorëve, këto çmime paraqesin një barrierë për aksesin në kulturë dhe art. Ndërsa festivale të tjera ndërkombëtare – si Berlinale apo TIFF në Toronto – ofrojnë bileta me çmime dukshëm më të ulëta për shfaqje të zakonshme, ZFF duket se ndjek një model më elitar.

Një krahasim me Zvicrën: Festivalet e tjera të filmit në Zvicër janë dukshëm më të lira. Për shembull, Festivali i Filmit Solothurn ka një çmim standard bilete prej 18 frangash. Në NIFFF në Neuchâtel, vizitorët paguajnë 17 franga, dhe në Visions du Réel në Nyon, ata paguajnë 16 franga për film. Në Festivalin e njohur të Filmit në Locarno, biletat kushtojnë jo më shumë se 35 franga gjatë orareve më të frekuentuara në Piazza Grande.

---