Fate Velaj, nga emigrant i thjeshtë në ambasador në Austri

Nga sfidat e emigrimit tek marrëdhëniet diplomatike, rrëfimi i Fate Velajt

Gazeta austriake Salzburger Nachrichten ka publikuar së fundmi një artikull kushtuar Ambasadorit të Shqipërisë në Austri, Fate Velaj, duke nxjerrë në pah rrugëtimin e tij të jashtëzakonshëm personal dhe profesional, transmeton albinfo.at.

Nën titullin “Nga pjatalarës në diplomat të nivelit të lartë”, artikulli thekson transformimin e Velajt që nga viti 1991, kur si emigrant nisi jetën në Austri. Ai ka ndjekur një rrugë të pasur krijuese, duke u afirmuar si piktor, fotograf, shkrimtar dhe krijues politikash kulturore për Bashkimin Evropian. Sot, si ambasador, ai luan një rol aktiv në forcimin e marrëdhënieve diplomatike dhe kulturore mes Shqipërisë dhe Austrisë.

Së fundmi, Velaj prezantoi romanin e tij “Kreuztanne” gjatë Panairit të Librit në Vjenë. Libri trajton përvojat e tij si refugjat, përfshirë kohën e kaluar në kampin e Traiskirchen dhe strehimin në Gasthaus zur Kreuztanne, duke ofruar një portret të jetës së emigrantit në Austri.

Vetë autori e përshkruan këtë vepër si një rrugëtim personal drejt integrimit dhe suksesit profesional, ku ai ndan përvojat, sfidat dhe mësimet e fituara gjatë dekadave të jetës në vendin mikpritës./Albinfo.at

---