Evakuohet aeroplani i “British Airways” në Paris

Evakuimi u bë pas një kërcënimi të drejtpërdrejtë, pak para nisjes së aeroplanit për në Heathrow të Londrës

Një aeroplan i kompanisë britanike të fluturimeve, “British Airways”, u evakuua në pistën e aeroportit të Parisit, pas një paralajmërimi për kërcënim të sigurisë.

Udhëtarët u kanë thënë mediave franceze se evakuimi u bë pas një kërcënimi të drejtpërdrejtë, pak para nisjes së aeroplanit për në Heathrow të Londrës. Zyrtarët e sigurisë menjëherë dolën në vendin e ngjarjes, me ç’rast e rrethuan aeroplanin.

Një zëdhënës i aeroportit konfirmoi evakuimin, duke thënë se ai u bë për shkaqe sigurie. Që nga viti i shkuar, autoritetet franceze kanë shtuar ndjeshëm masat e sigurisë, pas disa sulmeve të njëpasnjëshme terroriste.