Është mbajtur Java e Kulturës së Kosovës në Austri

Në kuadër të Javës, janë organizuar një varg manifestimesh që janë përcjell nga një numër i konsiderueshëm diplomatësh, artistësh etj.

Në ambientet e Ambasadës së Kosovës në Vjenë, përgjatë javës që shkoi, është organizuar, Java e Kulturës së Kosovës në Austri.

Në kuadër të Javës së Kulturës, janë organizuar një varg manifestimesh kulturore, të cilat janë përcjell nga një numër i konsiderueshëm diplomatësh, artistësh austriakë, miq të Kosovës dhe　bashkatdhetarë, ka bërë të ditur Ministria e Punëve të Jashtme.

Aktiviteti i parë ishte hapja e ekspozitës se piktorit, poetit dhe krijuesit kosovar, Sylë Mujaj.

Në fjalën e hapjes, Ambasadori i Kosovës në Austri, Sabri Kiqmari, ka thënë se qëllimi i kësaj Jave është përcjellja për opinionin publik austriak dhe rrethet e diplomatëve të vendeve tjera vlerat kulturore të Kosovës.

Lidhur me ekspozitën e piktorit Mujaj, Ambasadori i Kosovës në Austri ka thënë se ai i përket gjeneratës së studentëve kosovarë të vitit 1981, të cilët nuk u pajtuan me njëmendësinë e regjimit serb dhe i rezistuan censurimit të fjalës së lirë.　

Në këtë manifestim morën pjesë edhe Sekretari i Përgjithshëm i Ministrisë së Punëve të Jashtme të Kosovës, Nagip Skënderi, Zëvendës-Konsulli i Kosovës në Cyrih, Salih Sefa, përfaqësues të Qeverisë së Vjenës si dhe një numër i madh i intelektualëve dhe aktivistëve tanë në diasporë.

　

Piktori i njohur zviceran Pierre du Pasquier ka thënë se e ka njohur Sylë Muja në Lugano dhe se ai është një artist i shkëlqyeshëm. “Vlera e tij artistike është shumë e madhe”, ka thënë du Pasquier.

Mbrëmja letrare me Rexhep Qosjen ka mbledhur një numër të konsiderueshëm intelektualësh nga Kosova dhe Austria, në mesin e të cilëve edhe Ambasadori Albert Rohan. Mysafir nderi dhe panelistë ishin edhe Kryetarja e Shoqatës së Shkrimtarëve të Austrisë, Sidonia Binder si dhe　 kritiku letrar nga Kosova, Agim Vinca, thuhet në njoftim.

Në kumtesën e tij kritiku Agim Vinca, ndër të tjera nënvizoi se Akademik Rexhep Qosja është një studiues serioz i letërsisë që shkroi vepra emblematike, duke e vlerësuar lart rolin e tij në etablimin e shkencës albanologjike në Kosovë.

Studenti dhe poeti i ri Alban Beqiraj lexoi para të pranishmëve pjesë të zgjedhura nga romani i Rexhep Qosjes ‘‘Vdekja më vjen prej syve të tille‘‘, vepër kjo e përkthyer edhe në gjuhën gjermane.

Kryetarja e Shoqatës së Shkrimtarëve të Austrisë, Sidonia Binder, përshkroi Rexhep Qosjen si një ndër romancierët më të mirë të Kosovës. Ajo tha se bashkëpunimi me Kosovën në fushën e letërsisë në të ardhmen do të jetë edhe më intensiv, duke iu përgjigjur pozitivisht ftesës për të vizituar Kosovën.

Akademik Rexhep Qosja foli për zhvillimin e letërsisë shqipe, duke potencuar faktin se letërsia shqipe ka pasur një zhvillim atipik.

Duke ju referuar të sotmes, Akademik Rexhep Qosja përmbylli adresimin e tij me fjalët ‘‘Kjo është kohë që nxit krijimin e veprave të mëdha‘‘.

Kurse, në një ndër pallatet me eminente në Vjenë, është mbajtur një Koncert i Muzikës Klasike me autorë shqiptarë dhe të huaj, në të cilin performuan pianistet e njohura kosovare Ardita Statovci dhe Lule Elezi, ndërsa me këngë nga opusi i gjerë i kompozitorëve të huaj dhe shqiptarë u paraqitën mexosopranoja Sanije Matoshi dhe tenori Faik Hondozi.

Koncerti u përcoll nga shumë mysafirë, në mesin e të cilëve edhe diplomatë të huaj, si Ambasadori i Kolumbisë, Ekuadorit, Shqipërisë, Estonisë, zv. Ambasadori i SHBA-së, si dhe përfaqësues të misioneve diplomatike të Sllovenisë, Turqisë, Republikës Dominikane, Kroacisë, Maqedonisë etj.

Java e Kulturës së Kosovës në Austri u mbyll të dielën me një　koncert të muzikës popullore, i përgatitur nga Shkolla e Vallëzimit Shqip “Shota” në Zvicër dhe Shoqatat “12 Qershori” e “17 Shkurti” nga Austria. Koncerti është përcjellë nga një numër i konsiderueshëm pjesëmarrësish.

---