Ermonela Jaho sjell emocione në skenën e Teatrit të Operas në Tiranë

Buzëqeshje dhe lotë, sopranoja Ermonela Jaho sjell emocione të rralla në skenën e TKOB

Mes emocionesh dhe duartrokitjeve të gjata, sopranoja shqiptare me famë ndërkombëtare, Ermonela Jaho, u prit me entuziazëm në koncertin e të mërkurës në mbrëmje në Teatrin Kombëtar të Operas dhe Baletit në Tiranë, transmeton albinfo.ch.

Sipas “ReportTV”, artistja interpretoi me gjithë shpirt në koncertin e titulluar “Kur ndjenjat marrin zë”, ndërsa salla ishte e mbushur plot me publik të zgjedhur, duke përfshirë artistë, aktorë, regjisorë dhe profesionistë të kulturës.

Jaho solli pjesë të njohura të repertorit klasik, si dhe arie që nuk ishin interpretuar më parë në skenën shqiptare. Përveç kësaj, koncerti la përshtypje edhe për praninë e madhe të publikut të ri. Performanca u realizua nën dirigjimin e maestro Fabrizio Maria Carminati, me pjesëmarrjen e korit dhe orkestrës së TKOBAP-së.

Sopranoja shqiptare është një nga zërat më të njohur të muzikës klasike në botë. Albumi i saj “Anima Rara”, i dalë në shtator 2020, ka marrë vlerësime të shumta, ndërsa për interpretimin e “Suor Angelica” në Barcelonë, ajo u nderua me çmimin “Artistja e huaj më e mirë” për vitin 2023.

---