Era Istrefi bëhet ‘100 % shqiptare’

Këngëtarja e njohur, Era Istrefi është pajisur me pasaportë shqiptare dhe ka thënë se kjo do t’i ndihmojë shumë në të ardhmen

Këngëtarja nga Prishtina, Era Istrefi, e cila ishte shumë e suksesshme gjatë vitit të kaluar, duke pasur suksese edhe në Evropë e më gjerë është pajisur me pasaportë shqiptare, raporton albinfo.ch.

Ajo ka thënë se kjo do të ndihmojë shumë në projektet e saj gjatë këtij viti. “Falënderimet e mia për Presidentin e Republikës së Shqipërisë, Ministrinë e Kulturës së Kosovës dhe Shqipërisë janë të panumërta, sinqerisht. Disa gjëra nuk do të kishin ndodhur po të mos ishte kjo pasaportë. Falënderimet e mia janë të panumërta dhe shpresoj se do ta përfaqësoj denjësisht vendlindjen time të dytë anembanë botës”, ka thënë Era për mediat shqiptare.

Ajo ka shtuar se gjatë vitit 2017 ka në plan shumë projekte, ku do të marrë pjesë në disa evente. Era gjithashtu ka bërë të ditur se shumë shpejt do të publikohet edhe një videoklip i saj.

“Punët e mia për vitin 2017 janë me një turne anembanë botës dhe do të kem mundësi të shkel dhe në ato vende ku duhet viza “Shengen” dhe unë tani do të përfaqësoj të gjithë shqiptarët”, thotë këngëtarja.

Ajo tashmë ndihet ‘100 shqiptare’ dhe është krenare që përfaqëson Kosovën dhe Shqipërinë kudo në botë.