Edhe sot vazhdon gjykimi ndaj Thaçit dhe të tjerëve

Keystone (AP Photo/Jerry Lampen via AP Photo, Pool)

Edhe sot, në Dhomat e Specializuara të Kosovës (DHSK) në Hagë, vazhdon gjykimi i Thaçit dhe të tjerëve, përcjell albinfo.ch.

Sot pritet të vazhdojë dëshminë dëshmitari i prokurorisë, për të cilin nga ana e Zyrës së Prokurorit të Specializuar (ZPS) u tha se ka qenë komandat i Ushtrisë Çlirimtare të Kosovës (UÇK) për një periudhë të caktuar kohore dhe se ishte edhe anëtar i Lidhjes Demokratike të Kosovës (LDK).

Dëshmitari i 24-t i ZPS-së, (me kodin 4255), në gjykimin kundër Thaçit, Veselit, Selimit dhe Krasniqit, është dëshmitari i mbrojtur. Ai ka dëshmuar dje, me masa mbrojtëse.

Seanca ka kaluar në sesion privat me kërkesë të prokurorit Pace, me arsyetimin që të mbrohet dëshmitari. Ndërkaq, gjatë dëshmisë së tij u bë e ditur se dëshmitari ka korrigjuar deklaratat e dhëna më herët.

Sipas aktakuzës, krimet e paraqitura në të u kryen më së paku prej marsit 1998 deri në shtator 1999 në disa vendndodhje në Kosovë, si edhe në Kukës dhe Cahan, në Shqipërinë Veriore.

Pretendohet se këto krime u kryen nga anëtarë të UÇK-së kundër qindra civilëve dhe personave që nuk merrnin pjesë në luftime.