Edhe dy javë kohë për mbledhjen e nënshkrimeve për shkarkimin e kryetarëve në veri

@albinfo.ch

Ministri i Administrimit të Pushtetit Lokal, Elbert Krasniqi, ka njoftuar se grupi iniciues për mbledhjen e nënshkrimeve të qytetarëve të komunave veriore për shkarkimin e kryetarëve ka kohë edhe dy javë për ta bërë këtë.

Krasniqi ka thënë se në tri komunat veriore, Mitrovicë të Veriut, Leposaviq dhe Zubin-Potok, kanë mbetur edhe dy javë afat për t’i mbledhur nënshkrimet për shkarkim të kryetarëve, ndërsa në Zveçan edhe pesë ditë më shumë.

“Kemi pasur takim me diplomatët e QUINT-it, ku i kemi informuar për detajet. Aktualisht, janë në proces të mbledhjes së nënshkrimeve. Nga përgjegjësia e nivelit qendror dhe lokal, të gjitha obligimet janë përmbushur. Katër grupe janë autorizuar për mbledhje të nënshkrimeve. Të gjitha grupet kanë autorizimet dhe dokumentet e nevojshme. Kosova vazhdimisht ka qenë konstruktive dhe udhëzimi administrativ e dëshmon këtë”, ka thënë Krasniqi.

Krasniqi ka folur edhe për masat e vendosura ndaj Kosovës, të cilat i ka quajtur të padrejta.

Në Mitrovicë të Veriut, Leposaviq dhe Zubin-Potok ka nisur më 22 dhjetor mbledhja e nënshkrimeve për shkarkimin e kryetarëve shqiptarë. Në Zveçan, nisi më 27 dhjetor. Afati për mbledhjen e nënshkrimeve është 30 ditë.