Edhe 750,000 doza të tjera të vaksinës “Moderna” arrijnë në Zvicër

Javën e kaluar në Zvicër janë injektuar 496.634 doza vaksinash. Bëhet fjalë për një mesatare prej 70,948 vaksinash në ditë ose 33% më shumë se një javë më parë

Një kontingjent prej 750,000 dozash të vaksinës Moderna pritej të vinte të shtunën në Zvicër. Ndërsa për të hënën pritet  kontingjenti tjetër, prej 118.950 dozave të vaksinës Pfizer / Biontech.

Zyra Federale e Shëndetit Publik (BAG) ka konfirmuar informacionin përkatës që kishin publikuar mediat në Zvicër.

Javën e kaluar në Zvicër janë injektuar 496.634 doza vaksinash kundër Covid-19, transmeton albinfo.ch. Sipas BAG, bëhet fjalë për një mesatare prej 70,948 vaksinash në ditë. Krahasuar me javën e kaluar, shkalla e vaksinimit është rritur për 33 për qind.

Deri më tani, Qeveria Federale ka lidhur kontrata me pesë prodhues të vaksinave. Moderna pritet të japë 13.5 milionë doza vaksinash këtë vit dhe shtatë milionë doza në vitin 2022, përcjell albinfo.ch. Është lënë gjithashtu mundësia për dyfishim të kontingjentit të përmendur (7 milionë).

Një kontratë për gjashtë milion doza është në fuqi me prodheusin Pfizer / Biontech. Këto janë dy vaksinat që janë aprovuar në Zvicër dhe po jepen aktualisht.

---