E djathta e quan të papërgjegjshme iniciativën “AHV Plus”

Një iniciativë e nisur nga federatat e sindikatave, partitë dhe organizatat tjera të spektrit politik të majtë, e quajtur “AHV Plus” ka ngjallur kritika të ashpra te spektri i djathtë dhe i qendrës.

Iniciative për të cilën do të votohet në nivel nacional më 25 shtator, kërkon që të rriten për 10 për qind  pensionet e pleqërisë dhe të trashëgimisë. Arsyetimi i kësaj kërkese mbështetet në faktin që, sipas iniciuesve, qiratë e banesave dhe premitë e sigurimit shëndetësor po shkojnë vazhdimisht duke u shtrenjtuar, njofton srf.ch.

Në këtë kuptim, nevojitet një rritje e pensioneve të përmendura për të ndjekur rritjen e çmimeve.

Por partitë e djathta dhe të qendrës: SVP/UDC, FDP/PLR, CVP/PDC, BDP, GLP dhe EVP kanë dalë publikisht kundër iniciativës

Në një komunikim me mediat në Bernë përfaqësuesit e partive të përmendura e kanë quajtur të papërgjegjshme iniciativën e përmendur, transmeton albinfo.ch. Rritja paushallë e pensioneve do të gëlltiste miliarda franga dhe në këtë mënyrë do të rrezikonte edhe vetë AHV-në, të cilën iniciativa po pretendon ta përmirësojë.

Nisur nga kjo, nevojitet një reformë tërësore e AHV-së dhe jo rritje e pensioneve në mënyrë të papërgjegjshme, janë të bindura partitë e përmendura.