Dy turiste humbin jetën në Valbonë

Dy turiste të huaja, njëra belge dhe tjetra franceze kanë vdekur pasi janë rrëzuar dhe kanë rënë në greminë në Valbonë.

“Pavarësisht territorit shumë të vështirë dhe motit të keq me mjegull dhe me borë, shërbimet e Policisë, pas shumë kërkimesh, kanë bërë të mundur që në vendin e quajtur “Qafë Valbonë”, të gjenin trupat e pajetë të dy turisteve, shtetases belge B. M. dhe shtetases franceze J. B”, thuhet në njoftimin e policisë, shkruan RTS.

Për shkak të terrenit shumë të vështirë dhe motit të keq, punonjësit e Policisë që ndodhen në vendngjarje e kanë të pamundur nxjerrjen e trupave nga humnera, as helikopteri nuk ka mundur të ulet në vendin ku janë lokalizuar trupat e pajetë të turisteve.

“Për të mundësuar nxjerrjen e trupave të pajetë, shërbimet e Policisë vendore dhe të asaj kufitare, si dhe skuadra alpine, po bashkëpunojnë me Emergjencat Civile dhe me Ministrinë e Mbrojtjes”, njoftojnë tutje autoritetet e shtetit të Shqipërisë.