Dy të tretat e refugjatëve ukrainas në Zvicër janë gra dhe vajza

Më shumë se dy të tretat e njerëzve që kanë marrë statusin e mbrojtjes S deri në fund të marsit ishin gra dhe vajza

Që nga e enjtja, edhe 919 refugjatë të tjerë nga Ukraina janë regjistruar në qendrat federale të azilit, në Zvicër.  Ndërsa gjithsej 39,258 persona janë regjistruar që nga fillimi i sulmit rus në vend, shkruan srf.ch.

32,208 refugjatë kanë marrë statusin e mbrojtjes S deri më tani, njofton Sekretariati Shtetëror për Migracionin (SEM) përmes Twitter, transmeton albinfo.ch. Krahasuar me një ditë më parë, numri i personave me status S është rritur me 795.

SEM ka prezantuar edhe shifra të tjera për refugjatët nga Ukraina. Këto konfirmojnë tablonë se bëhet fjalë për ikje të grave dhe fëmijëve nga Ukraina. Më shumë se dy të tretat e njerëzve që kanë marrë statusin e mbrojtjes S deri në fund të marsit ishin gra dhe vajza.

Arsyeja kryesore për këtë është se që nga fillimi i luftës, burrat ukrainas midis moshës 18 dhe 60 vjeç në përgjithësi nuk janë lejuar të largohen nga vendi i tyre sipas ligjit ukrainas.

Pothuajse 40 për qind e atyre që kërkonin mbrojtje ishin gjithashtu më të rinj se 20 vjeç.

Sipas agjencisë së OKB-së për refugjatët UNHCR, rreth 5.1 milionë njerëz janë larguar nga Ukraina jashtë vendit që nga fillimi i luftës.

---