Diaspora shqiptare mund të përfaqësohet me dy deputetë

Nëse partitë politike shqiptare tregohen më bashkëpunuese, diaspora shqiptare sivjet ka mundësi të përfaqësohet në Parlamentin e Maqedonisë me dy deputetë

Diaspora shqiptare më shumë se kurrë, e ka mundësinë që të përfaqësohet në Parlamentin e Maqedoni më dy deputetë, nëse partitë politike tregohen më kooperative ndërmjet veti. Me ndryshimet e fundit të Kodit Zgjedhor që u bënë pas negociatave mes katër partive politike për zbatimin e Marrëveshjes së Përzhinos, mundësuan që diaspora nga tre njësi të shndërrohet në një njësi zgjedhore që do të japë tre deputetë.

Mbi 171 mijë votuesit e diasporës tashmë të akumuluar në një njësi zgjedhore përsëri do të duhet të regjistrohen paraprakisht tek lokacionet e ambasadave dhe konsullatave të Maqedonisë në shtetet tjera, që të mund të njëjtit të votojnë në zgjedhjet e parakohshme  të 11 dhjetorit.

Pala maqedonase ka një përparësi organizative, ashtu si në zgjedhjet e 2014-ës dhe zgjedhjeve të 2011-ës, meqë kanë shumicën e ambasadave dhe konsullatave në shtetet ku diaspora është më e përqendruar, thonë ekspertë të zgjedhjeve, citon gazeta “Koha” në Shkup.

Megjithatë, sipas tyre, tani shanset janë reale që shqiptarët të nxjerrin të paktën një deputet.

Mbetet të shihet nëse partitë politike shqiptare do të lejojnë të përsëritet e kaluara, apo do të organizohen qoftë edhe me koalicione parazgjedhore në këtë njësi, që të nxjerrin sigurt deputetë. Dihet që diaspora shqiptare është dyfish më e madhe në numër se sa ajo maqedonase dhe sipas ekspertëve, me një organizim më të madh numri i deputetëve  shqiptarë mund të shkojë në dy.

Kjo për faktin se votat, si në shtetet e Evropës perëndimore ku dominojnë shqiptarët dhe votat në Australi, Zelandën e re dhe në Argjentinë ku ka vota nga pala maqedonase, do të llogariten njësoj.

Eksperti për çështje zgjedhore Bashkim Bakiu konfirmon se ndryshimet ligjore japin shans që të nxirret të paktën një deputetë nga diaspora.

“Është fakt që kalimi nga tre në njësi zgjedhore të diasporës, sigurisht se ka rritur më shumë shanset që të paktën të nxjerrim një deputet. Por, kjo do të varet më shumë nga organizimi i partive politike shqiptare. Presim të shohim nëse përveç PDSH-së dhe BDI-së, edhe partitë si BESA dhe LR-PDSH apo dhe partitë tjera, se a do të jenë aktive në diasporë”, thotë Bakiu.

Sipas ndryshimeve  më të reja të Kodit zgjedhor, për t’u zgjedhur një deputet në diasporë të paktën duhet të merr 6 mijë vota, apo 80 për qind të votave sa duhet të merr një deputet në njësitë brenda vendit. Ndryshe, sipas listave, diaspora e Maqedonisë ka 171 mijë votues.