Diaspora, rol jetik për të ardhmen e Kosovës

Ministri Murati tha se diaspora shqiptare në përgjithësi ka qenë një prej pikave kyçe të historisë kombëtare. Sipas tij, ajo po vazhdon të mbetet një prej shtyllave kryesore për ndërtimin e së ardhmes

Ministri i Diasporës, Valon Murati e konsideron jetike diasporën dhe mërgatën kosovare për zhvillimin e Kosovës. Ai ka thënë se diaspora ka kontribuuar qysh në kohën e Rilindjes e deri në kohën e çlirimit dhe pavarësimit të vendit, ndihmë kjo që po vazhdon edhe tani në rimëkëmbje e saj.

Në intervistën dhënë “Zërit” Murati ka thënë se sipas raportit të Bankës Qendrore të Kosovës, gjatë vitit të kaluar ka pasur një ngritje të remitancave, të cilat e kanë arritur shifrën prej 740 milionë eurosh, por ai shprehet optimist se kjo shifër është edhe më e madhe kur kemi parasysh se një shumë e madhe e të hollave nuk vijnë përmes transfereve bankare.

“Diaspora shqiptare në përgjithësi ka qenë një prej pikave kyçe të historisë sonë kombëtare në të gjitha periudhat e saj, qysh nga periudha e Rilindjes me Jeronim De Radën e deri në përkrahjen e luftës çlirimtare të Kosovës dhe procesin e pavarësimit të saj. Ajo vazhdon të mbetet edhe sot një prej shtyllave tona kryesore për ndërtimin e së ardhmes”, tha ai.

Me kalimin e kohës, sipas tij, rëndësia e diasporës është rritur vazhdimisht, sepse është rritur dhe është zgjeruar edhe kapaciteti i saj.

“Nëse, për shkak të rrethanave në periudha të caktuara, roli i saj ka qenë i kufizuar vetëm në aspektin financiar, në periudhat tjera e sidomos tani ky rol ka marrë karakter shumëdimensional. Të kujtojmë vetëm remitancat që çdo vit përbëjnë qindra miliona euro, pastaj kemi gjithnjë e më shumë profesionistë të fushave të ndryshme që kanë arritur suksese kulmore në shtetet në të cilat jetojnë”, tha ai

Sidomos prej vitit 2000 e këndej kemi, sipas tij, ka rritje të madhe të numrit të ndërmarrësve shumë të suksesshëm nga radhët e diasporës sonë e të cilët kanë investuar e janë të gatshëm të investojnë në vend.

“Pra, diaspora jonë përbën një potencial shumë të rëndësishëm dhe ajo që ka nevojë të ndodhë tani është ridizajnimi i raporteve të vendit me të”, deklaroi mes tjerash ministri i Diasporës, i cili u bërë thirrje bashkatdhetarëve që të investojnë në vendlindje se këtu, sipas tij, ka klime investuese.
“Klima në Kosovë është relativisht pozitive, pavarësisht se ka edhe ngecje në sfera të caktuara. Fakti që tashmë ka investime të diasporës në Kosovë dëshmon se gjendja nuk është siç mund të perceptohet nganjëherë. Por, a ka vend për përmirësime, gjithsesi po”,deklaroi ai.

Miratimi i ligjeve, si ai për Gjykatat, pastaj ai për Investime Strategjike që është në proces dhe një varg masash të ndërmarra nga institucione të ndryshme të vendit do të ndikojnë që kjo klimë të përmirësohet edhe më shumë, tha Murati.