Dhunimi i dy vajzave në Gjakovë – viktimat janë të mitura e të dyshuarit të moshës madhore

Dy vajza u dhunuan në Gjakovë, të dyja u futën me forcë në veturë

Raportohet se dy viktima seksuale janë vajza të mitura nga Gjakovë, ndërsa të dyshuarit të moshës madhore, përcjell albinfo.ch.

Lidhur me këtë temë, Yllka Juniku Shehu nga Prokuroria Themelore në Gjakovë, ka bërë të ditur se sot gjatë ditës do të parashtrojnë dy kërkesa për caktimin e masës së paraburgimit për dy të dyshuarit.

“Prokuroria Themelore në Gjakovë sot do të parashtrojë dy kërkesa për caktimin e masës së paraburgimit për dy personat e dyshuar, për veprën penale ‘dhunimi’. Dy rastet janë raste të ndara, dhe të dyja viktimat janë të mitura, ndërsa dy të dyshuarit janë të moshës madhore”, ka thënë ajo.

Policia e Kosovës përmes raportit 24-orësh njoftoi sot për dy raste të dhunimit në Gjakovë.

Sipas raportit, njëri rast kishte ndodhur rreth orës 13:00, ku bëhet e ditur se viktima është dërguar për trajtim mjekësor.

“Gjakovë 04.10.2022 – 13:00. Viktima femër kosovare ka raportuar se dy persona të dyshuar të maskuar me dhunë e kanë futur në veturën e tyre dhe kanë dhunuar seksualisht. Viktima është dërguar për trajtim mjekësor. Pas hetimeve të zhvilluara, është identifikuar një i dyshuar kosovar dhe i njëjti është arrestuar dhe me vendim të prokurorit është dërguar në mbajtje”.

Ndërsa rasti tjetër, sipas po këtij raporti, kishte ndodhur pasdite rreth orës 18:00, kur një vajzë ka raportuar se me dhunë është futur në veturë dhe është përdhunuar.

“Gjakovë 04.10.2022 – 18:05. Viktima femër kosovare ka raportuar se i dyshuari mashkull kosovar me dhunë e ka futur në veturën e tij dhe kanë kryer marrëdhënie seksuale pa dëshirën e saj. I dyshuari është arrestuar dhe me vendim të prokurorit pas intervistimit është dërguar në mbajtje”.

---