Dhuna ndaj grave, shqetësuese

Shumë shqetësuese mbetet dhuna në familje, e cila vitin e kaluar ka marrë përmasa shqetësuese duke kaluar 1 mijë raste të raportuara

Në ditën e tyre, me 8 Mars, gratë kosovare kërkojnë më shumë të drejta nga institucionet vendore, ndërsa konsiderojnë se të drejtat e grave kosovare shkelen. Madje shumë shqetësuese mbetet dhuna në familje, e cila vitin e kaluar ka marrë përmasa shqetësuese duke kaluar 1 mijë raste të raportuara.

Policia e Kosovës ka konfirmuar se gjatë vitit që lamë pas janë raportuar gjithsej 1.038 raste të dhunës ne familje, ku numri më i madhe i viktimave kane qene gra.

Dita e 8 marsit, nuk ishte festë për të gjitha gratë, kjo për arsye se disa prej tyre në kushte të rënda ekonomike, të braktisura e në moshë të shtyrë, kishin dal që të kërkonin bukën e gojës.

Ndërkaq, sipas Agjencisë së Statistikave të Kosovës gratë kosovare janë të trajtuara fizikisht nga burrat, duke kaluar edhe Malin e Zi, Serbinë, madje edhe Malauin në Afrikë

dhe Vietnamin në Azi. Më shumë se 42 për qind e grave të pyetura nëse kanë qëndrim pranues ndaj dhunës në familje në rrethana të caktuara, kanë thënë “Po”.

Sipas hulumtimeve të OJQ-ve në Kosovë rezulton se shkaku i parë i dhunës në familje është shkalla e lartë e papunësisë. Papunësia ndiqet nga nepotizmi dhe varfëria, si arsyet kryesore me ndikim në dhunën në familje.

Ndryshe, disa gra dhe vajza kosovare kanë marshuar sot në sheshin “Nëna Terezë” duke kërkuar ndërgjegjësim të shoqërisë kosovare për të drejtat e femrave. Ato kanë kërkuar të ndalet dhuna ndaj gruas në familje, në institucione, në rrugë.

“Marshojmë S’festojmë”, ka qenë moto e grumbullimit të grave dhe vajzave për të marshuar përgjatë sheshit, të cilat për disa momente i janë shkëputur kremtimit të kësaj dite që në vendin tonë është bërë tashmë tradicionale si festë e nënës.

Igballe Rugova nga Rrjeti i Grave ka thënë se është shumë prezente dhuna në baza gjinore në Kosovë. “Prandaj sot iu themi të gjithëve mjaft më me arsyetime. Ne dëshirojmë të mos ketë dhunë as në familje, as në rrugë, as në institucione”, ka deklaruar ajo.