Dhomat e Parlamentit nuk pajtohen: 10 apo 8 vjet për pasaportë

Dy dhomat pajtohen vetëm për atë që në të ardhmen kusht për pasaportën zvicerane të jetë pasja e vizës C (Leja e qëndrimit të përhershëm)

Dy dhomat e Parlamentit të Zvicrës nuk kanë mundur të arrijnë pajtimin lidhur me rregullat që duhet të vlejnë për natyralizimin e të huajve. Komisioni për politika shtetërore i Dhomës Nacionale, edhe pas rundit të tretë vazhdon të mbrojë qëndrimin e Dhomës nacionale për ashpërsim më të madh të rregullave ndërsa Dhoma e Kantoneve tregohet më liberale.

Ndërkaq të dy dhomat pajtohen vetëm për atë që në të ardhmen kusht për pasaportën zvicerane të jetë pasja e vizës C (Leja e qëndrimit të përhershëm). Por përderisa Dhoma Nacionale ngul këmbë në afatin prej 10 vitesh si kusht për të aplikuar për pasaportën e Zvicrës, Dhoma e Kantoneve kërkon që ky afat të jetë 8 vjet.

Në këtë kontekst ka edhe çështje tjera kontestuese në mes të dy dhomave. Kështu komisioni për politika shtetërore i Dhomës Nacionale kërkon që të vazhdohet praktika e deritashme e llogaritjes së dyfishtë të viteve për marrjen e shtetësisë zvicerane në mes të moshës 5 dhe 15 vjeçare, ndërsa dhoma tjetër kërkon që kjo llogaritje të bëhet nga mosha 10 deri 20 vjeçare.