Dërgohen jashtë vendit analizat për vdekjet e dyshimta në QKUK

Menjëherë janë ndërmarrë të gjitha masat e nevojshme për të hulumtuar “dyshimet” e ngritura  për  ndonjë parregullsi të mundshme

Qendra Klinike Universitare e Kosovës njofton se pas  dy vdekjeve të dyshimta që kanë ndodhur në këtë qendër, janë pezulluar përkohësisht operacionet e planifikuara, të cilat nuk janë urgjente.

“Rastet urgjente nga blloku kirurgjik janë duke u kryer  në sallat e Klinikës Emergjente, të cilat po ashtu janë në funksion”, thuhet në njoftimin për mediat. 

Kjo masë është ndërmarrë, pasi u raportua për dy raste  të vdekjeve të  ndodhura pas operacionit. “Menjëherë janë ndërmarrë të gjitha masat e nevojshme për të hulumtuar “dyshimet” e ngritura  për  ndonjë parregullsi të mundshme si i parasheh edhe legjislacioni në fuqi”, thuhet në njoftimin e QKUK-së.

Ndërsa, ministri i Shëndetësisë, Uran Ismaili, ka njoftuar se kjo ministri ia ka nisur jashtë vendit analizat për vdekjet e dyshimta. “Të gjitha inspektoratet e Ministrisë Shëndetësisë janë urdhëruar të shkojnë në QKUK për të filluar hetimet e pavarura dhe të detajuara. Kemi kërkuar raportim të rregullt nga SHSKUK-ja, për hetimet në sfera të tjera. Ekipet kanë izoluar të gjitha pajisjet dhe janë blombuar të gjitha mostrat. Rekomandimet e ekipeve të MSH-së janë që për disa çështje të bëjmë edhe analiza jashtë vendit, dhe unë kam autorizuar zyrtarët e Ministrisë për të filluar menjëherë këtë”, ka thënë ministri Ismaili.