Deputeti i vetëm shqiptar në Serbi reagon pas deklaratave të kryeministres serbe

Shaip Kamberi, FB

Deputeti i vetëm shqiptar në Parlamentin e Serbisë, Shaip Kamberi, ka reaguar ndaj një deklarate të kryeministres së Serbisë, Ana Brnabiq.

Ai shkruan se Brnabiq, gjatë fjalimit të saj në Bled të Sllovenisë, ku po mbahet Forumi Strategjik, ka thënë: “Mos kërkoni të drejta, mjafton që nuk po ju vrasim”, siç thotë Kamberi, drejtuar shqiptarëve të Luginës së Preshevës.

“’Mos kërkoni të drejta, mjafton që nuk po ju vrasim’ ky është mesazhi të cilin shqiptarëve të Luginës së Preshevës, nga Forumi Strategjik në Bled , e paska dërguar Ana Brnabiq, kryeministre e Serbisë. Sipas Brnabiq, shqiptarët në Luginë të Preshevës “paskan të drejta” sepse askush s’i “vranë”, ndërsa Serbët në Kosovë jo, është vazhdimësi e politikës zyrtare të standardeve të dyfishta të Serbisë për trajtimin e pakicave, dhe mohimit të të drejtave elementare të pakicave brenda territorit të vet, ndërkohë që për pakicën e vet në Kosovë tenton të ndërtojë standarde që nuk ekzistojnë në asnjë shtet tjetër. Brnabiq paska thënë se ‘shqiptarët në Luginë të Preshevës nuk i qëllon askush’”, ka shkruar Kamberi, përcjell albinfo.ch.

Tutje Kamberi ka listuar vrasjet e shqiptarëve në këtë zonë, sipas të cilit, kanë mbetur të pazgjidhura.

“Vetëm në periudhën e bombardimeve të NATO-s më 1999, në komunën e Preshevës, territor nën kontrollin absolut të forcave serbe të sigurisë, janë vrarë 11 civilë shqiptarë, për të cilët nuk ka dhënë llogari askush. Në komunën e Bujanocit, gjatë vitit 2000, janë vrarë 13 civilë tjerë. Qindra  shqiptarë të tjerë janë keqtrajtuar: rrahur e plaçkitur nga forcat serbe të sigurisë, pa u dënuar askush. Më 2003, më 2009, me qëllim të krijimit të situatës së pasigurisë së përgjithshme, nën akuzat e rrejshme për “terrorizëm e krime lufte” janë arrestuar dhjetëra shqiptarë, të cilët, pas mbajtjes në paraburgim me muaj e vite, janë liruar të pafajshme. E vrasja e Dashnim Hajrullahut si të cilësohet?”, shkruan Kamberi.

Ai po ashtu përmend rastet e arrestimeve e dënimeve për përdorim të simboleve kombëtare.

“Serbia mbetet i vetmi vend në Ballkanin Perëndimorë, në të cilën, me ligj është ndaluar përdorimi publik i simbolit kombëtar. Serbia është vendi me pjesëmarrje më të ulët të pakicave në jetën publike dhe vendimmarrje, për shkak të politikave diskriminuese që me decenie po zbatohen”, ka shkruar Kamberi, përcjell albinfo.ch.