Dënohet sepse la fëmijët e mitur në Gjermani

Një shqiptare në Tiranë është dënuar sepse kishte lënë fëmijët e mitur në Gjermani. Kështu ka ndodhur me 44-vjeçaren, Miranda Loçka, e cila është dënuar në gjykatën e Tiranës më 4 muaj burgim, megjithatë duke ja pezulluar vuajtjen e dënimit me shërbim prove për 18 muaj, raporton “TCH”.

Ajo është denoncuar nga Policia Kufitare, që konstatoi kthimin e saj nga Gjermania pa katër fëmijët, me të cilët kishte dalë nga Shqipëria. Ajo ka pranuar se ka lënë fëmijët në Gjermani, përcjell albinfo.ch.

“Fëmijët i kam lënë vetë me dashje në azil në dhomën ku qëndroja në fshatin Ferne të komunës Sellzkoten ne Gjermani dhe jam kthyer në Shqipëri, duke menduar se atyre mund t’u krijoheshin kushtet për një jetë më të mirë”, është shprehur Miranda Loçka.

Pavarësisht kësaj ajo është dënuar nga gjykata sepse e ka cilësuar braktisjen e fëmijëve si një veprim me rrezikshmëri shoqërore, pasi cenon marrëdhëniet juridike të vendosura për të mbrojtur dhe garantuar institucionin e familjes, si edhe mirërritjen dhe edukimin e fëmijëve.

Gjithashtu, gjykata e ka cilësuar këtë vepër edhe si prishje të imazhit të shtetit dhe shoqërisë shqiptare.

https://www.youtube.com/watch?v=6i5GAjxGZbM