Dënohen blerësit nga Zvicra që mashtrojnë doganat gjermane

Kundër disa blerësve janë iniciuar edhe procedura të ndjekjes, në rastet kur vlera e mallit ka qenë më e lartë se 275 eur

Keystone

Banorët e Zvicrës që “bëjnë pazaret” e tyre në Gjermani mund të kërkojnë në kufi kthimin e tatimit të  vlerës së shtuar, që e kanë paguar me rastin e blerjes. Por, është zbuluar se shumë nga ta përdorin truke të ndryshme për të përfituar më shumë para, shkruan 20minuten.ch.

Ata, për shembull, grumbullojnë dëshmitë e pagesave të të tjerëve ose paguajnë për blerjet e miqve të tyre gjermanë dhe megjithatë kërkojnë para në kufi, edhe pse malli mbetet në Gjermani, transmeton albinfo.ch.  Por, tash zyrtarët e doganave kanë gjetur një mënyrë për t`i penguar.

Drejtoria e Përgjithshme e Doganave e Gjermanisë nga korriku ka filluar aplikimin e regjimit të ri në këtë drejtim. Dhe tashmë janë kapur dhe dënuar së paku 100 zviceranë. Gjobat e shqiptuara sillen nga 20 deri në 55 euro. Vetëm në zyrën kryesore të doganave në Singen, që është përgjegjëse për vijën kufitare nga Konstanca deri në Bad Säckingen janë shqiptuar qindra gjoba.

Ndërkaq, kundër disa blerësve janë iniciuar edhe procedura të ndjekjes, në rastet kur vlera e mallit ka qenë më e lartë se 275 euro.

Sipas nënkryetarit të Sindikatës së Doganave të Gjermanisë, Wolfgang Kailer, rregullat e reja e kanë arritur qëllimin, përcjell albinfo.ch. Ai thotë se është duke u vënë re se tash ka më pak njerëz që provojnë të mashtrojnë.