Demaçi, ligjëratë në Gjenevë

Në konferencë do të jenë të pranishëm personalitete të shquara shqiptare dhe zvicerane të jetës akademike dhe publike në Gjenevë

Në organizim të Shoqatës së Studentëve Shqiptarë të Gjenevës (AEAG l’Association des Etudiants Albanais de Genève), me rastin e 4 vjetorit të Pavarësisë së Kosovës, në Universitetin e Gjenevës vjen shkrimtari dhe veprimtari i madh të çështjes shqiptare, Adem Demaçi. Ai do të mbajë një ligjëratë në kuadrin e konferencës “Një shekull histori në jetën e një shkrimtari” 

“Kjo konferencë është e një rëndësie të veçantë pasi që mbahet në Universitetin e Gjenevës, ku do të jenë të pranishëm personalitete të shquara shqiptare dhe zvicerane të jetës akademike dhe publike në Gjenevë”, thuhet në njoftimin e organizatorëve.

Demaçi, i njohur si simbol i rezistencës shumëvjeçare, i burgosur i ndërgjegjes, është bartës i disa çmimeve ndërkombëtare, në mesin e të cilave edhe i çmimit Saharov.

Aktualisht është kryetar i Lidhjes së Shkrimtarëve të Koeovës.

Konferenca mbahet me datën 23.02.2012 në ora 19h00 në ndërtesën Uni Mail (Bd du Pont-d’Arve 40 – 1205 Genève), në sallën R080.