Dell dhe Feith nuk i bindën partitë për presidenti, kriza institucionale vazhdon

Të kota ishin tentimet e ambasadori amerikan në Kosovë, Christopher Dell dhe shefit të Zyrës Civile Ndërkombëtare (ICO), Piter Feith për të bindur drejtuesit e tri partive politike për të dalu nga ngërci politik lidhur me zgjedhjen e presidenti të ri, mëson Albinfo nga burime të pavarura.

Në Ambasadën e SHBA-ve në Prishtinë, gjatë një takimi disaorësh nuk është arritur pajtim midis kreun e PDK-së, Hashim Thaçi, kreyt të LDK-së, Isa Mustafa, si dhe liderit të dorëhequr të AKR-së, Behgjet Pacolli, për gjetjen e një zgjidhje për krizën politike në Kosovë, që po mbretëron tash e sa ditë.

Mësohet se liderët e dy partive më të mëdha në vend – PDK dhe LDK, dhe kandidati I vetëm I deritanishëm për president, Behgjet Pacolli, kanë zhvilluar biseda në përpjekje për të gjetur një konsensus të përbashkët për daljen nga kriza që ka shkaktuar vendimi i Gjykatës Kushtetuese për çështjen e presidentit të vendit.

Pas takimit te ambasadori Dell, Thaci dhe Mustafa kanë shkuar te ndërtesa e ICO-së, që gjendet në të njëjtën lagje në Prishtinë. Por, si duket, edhe ky takim ka rezultuar pa sukses.

Ndërkohë është mbledhur Kryesia e PDK-së, ku po debaton rreth situatës së krijuar rreth mungesës së konsensusit për zgjedhjen e presidentit të shtetit dhe harmonizimin e qëndrimeve me partnerin e koalicionit – AKR-në. Priret që PDK-ja të dal me qëndrim nëse do të përkrahë Pacollin ose ndonjë kandidat tjetër që do të propozohet nga opozita, në këtë rast nga LDK-ja.

Ndërsa, pas këtyre takime, AKR-ja doli me një komunikatë për media, ku ka vlerësuar se Kosova është në një krizë institucionale, e cila kërkon angazhim dhe përkushtim të të gjithëve për tejkalimin e saj.

“AKR vlerëson se debatet për emrin e presidentit, janë pjesë e lojërave politike, dhe jo kundërshtime thelbësore mbi të. AKR-ja bën thirrje që të zhvillohen kontakte të mëtejshme midis partive politike parlamentare për të dalë nga kriza”, thuhet në njoftim.

Iniciativa e djeshme për takimin midis Hashim Thaçi dhe Isa Mustafa, me ndërmjetësimin e Behgjet Pacolli, sipas AKR-së, duhet të jetë vetëm hapi i parë në drejtim të gjetjes së një marrëveshjeje politike që përfshin ligjin zgjedhor, ndryshimet e Kushtetutës, etj.

Dy partitë tjera opozitare – Vetëvendosje dhe AAK kushtëzojnë pjesëmarrjen në seancën e zgjedhjes së presidentit, me gjetjen e një personaliteti konsensual për president dhe me organizimin e zgjedhjeve pas një viti, mirëpo me kushte të tilla nuk pajtohen partnerët e koalicionit, të cilët tashmë janë pajtuar me rikandidimin e Behgjet Pacollit.

Nesër përfaqësuesit e partive politike do të takohen me ushtruesin e detyrës së presidentit të Kosovës, Jakup Krasniqi në tentim për të tejkaluar krizën e zgjedhjes së presidentit të ri.