Federata e Futbollit të Kosovës reagoi pas humbjes minimale 0-1 në “Fadil Vokrri”, duke theksuar krenarinë për angazhimin e “Dardanëve” në rrugëtimin drejt Botërorit 2026, përcjell albinfo.ch.

Ëndrra e Kosovës për kualifikim në Kampionatin Botëror 2026 është shuar sonte në Prishtinë.

“Dardanët” nuk arritën të sigurojnë biletën historike për Botërorin, pasi në ndeshjen vendimtare të zhvilluar në stadiumin “Fadil Vokrri” u mposhtën minimalisht me rezultat 0-1 nga Kombëtarja e Turqisë.

Pas përfundimit të takimit, ka reaguar Federata e Futbollit të Kosovës (FFK), e cila pavarësisht zhgënjimit nga eliminimi, ka shprehur krenari për përfaqësuesen dhe për luftën e treguar gjatë gjithë rrugëtimit.

“Nuk ia dolëm, por gjithmonë KRENAR ME DJEMTË TANË”, ka shkruar FFK në reagimin e saj.

Kosova ishte vetëm një hap larg realizimit të ëndrrës së madhe për të qenë për herë të parë pjesë e një Kampionati Botëror, por rrugëtimi përfundoi me humbjen ndaj Turqisë, ndërsa përfaqësuesja kosovare pritet tashmë të fokusohet në synimet e ardhshme ndërkombëtare./Albinfo.ch

Selektori i Kosovës, Franco Foda, tha se disfata 1-0 në “Fadil Vokrri” ishte zhgënjyese, por konfirmoi se nuk ka ndërmend të largohet dhe se synimi i radhës është kualifikimi në Kampionatin Evropian, përcjell albinfo.ch.

Selektori i Kombëtares së Kosovës, Franco Foda, ka folur pas humbjes zhgënjyese ndaj Turqisë, në finalen e plejofit për kualifikim në Kupën e Botës 2026.

Turqia triumfoi me rezultat minimal 1-0 në stadiumin “Fadil Vokrri”, duke siguruar biletën për Botërorin 2026, ndërsa Kosova mbeti vetëm një hap larg realizimit të ëndrrës historike.

Pas përfundimit të ndeshjes, Foda ka deklaruar se nuk ka ndërmend të largohet nga posti i selektorit, duke theksuar se projekti i tij me Kosovën vazhdon dhe se objektivi kryesor mbetet kualifikimi në Kampionatin Evropian.

“Kam pasur arsyen time që kam ardhur te Kosova, qëllimi ishte Evropiani që të kualifikohemi, sonte dështuam. Çdo gjë ka shkuar më shpejt se ç’kemi menduar. Qëllimi ynë mbetet Evropiani”, ka deklaruar Foda për “RTK”.

Ai ka shtuar se ndihet mirë në Kosovë dhe se nuk e sheh largimin si opsion.

“Jo nuk e kam plan ta lë Kosovën, më pëlqen vendi dhe njerëzit”, u shpreh ai.

Foda ka theksuar gjithashtu se skuadra është e mërzitur pas eliminimit, por ka lënë të kuptohet se Kosova kishte mundësi reale për t’u kualifikuar edhe ndaj një kundërshtari të fortë si Turqia.

Sipas tij, pavarësisht zhgënjimit të madh, Kombëtarja duhet të rikthehet më e fortë dhe të fokusohet në objektivin e ardhshëm, që mbetet kualifikimi në Evropian./Albinfo.ch

Kombëtarja e Kosovës dhe ajo e Turqisë do të përballen sonte, e martë, në stadiumin Fadil Vokrri në Prishtinë, me nisje nga ora 20:45, në një duel historik për kualifikim në Kupën e Botës 2026. Të dy trajnerët, Franco Foda për Kosovën dhe Vincenzo Montella për Turqinë, kanë bërë zgjedhjet e tyre, pa surpriza të mëdha në formacionet që pritet të hedhin në fushë, përcjell albinfo.ch.

Përzgjedhësi i Kosovës, Franco Foda, mbështetet te një formacion i balancuar, identik me atë që solli fitoren e rëndësishme ndaj Sllovakisë jashtë fushe. Në portë, Arijanet Muric do të qëndrojë në vend, ndërsa mbrojtja me tre lojtarë, Lumbardh Dellova, Kreshnik Hajrizi dhe Albian Hajdari, synon stabilitet dhe disiplinë përballë sulmit të shpejtë turk. Në krahë, Mërgim Vojvoda dhe Dion Gallapeni Hoxha do të kenë role të dyfishta, duke mbrojtur dhe duke ndihmuar fazën sulmuese.

Mesfusha kosovare përbëhet nga Elvis Rexhbecaj, Veldin Hoxha dhe Florent Muslija, duke sjellë energji dhe kreativitet në ndërtimin e lojës, ndërsa sulmi mbështetet tek dyshja Fisnik Asllani dhe Vedat Muriqi, me këtë të fundit si pika kryesore referuese e skuadrës.

Nga ana tjetër, trajneri i Turqisë, Vincenzo Montella, ka zgjedhur një formacion me lojtarë teknikisht të aftë. Në portë është Ugurcan Cakir, ndërsa mbrojtja përbëhet nga Ferdi Kadioglu, Abdulkerim Bardakci, Samet Akaydin dhe Mert Muldur. Mesfusha drejtohet nga përvoja e Hakan Calhanogludhe balanca taktike e Ismail Yuksek, ndërsa sulmi i Turqisë mbështetet tek talentet Kenan Yildiz dhe Arda Guler, të cilët do të asistojnë sulmuesit me përvojë Baris Alper dhe Kerem Akturkoglu.

Të dy trajnerët kanë treguar qartësi në zgjedhje, duke lënë pak hapësira për befasi dhe duke e bërë këtë finalen një sfidë që do të vendoset nga detajet dhe momentet kyçe në fushë.

Formacionet e mundshme:

Kosova: Arijanet Muric; Lumbardh Dellova, Kreshnik Hajrizi, Albian Hajdari; Mërgim Vojvoda, Veldin Hoxha, Elvis Rexhbecaj, Florent Muslija, Dion Gallapeni; Fisnik Asllani, Vedat Muriqi

Turqia: Ugurcan; Ferdi Kadioglu, Abdulkerim Bardakci, Samet Akaydin, Mert Muldur; Hakan Calhanoglu, Ismail Yuksek; Kenan Yildiz, Arda Guler, Baris Alper; Kerem Akturkoglu./Albinfo.ch 

Federata e Futbollit të Kosovës kërkon mobilizim maksimal në “Fadil Vokrri”, duke i ftuar tifozët të jenë lojtari i 12-të në hapin historik drejt Botërorit 2026, përcjell albinfo.ch.

Federata e Futbollit të Kosovës (FFK) u ka bërë thirrje tifozëve që sonte, në ndeshjen vendimtare ndaj Turqisë në finalen e plejofit për kualifikim në Kupën e Botës 2026, të mos qëndrojnë ulur në tribuna, por të krijojnë një atmosferë të jashtëzakonshme që mund ta shtyjë ekipin drejt historisë.

Përmes një postimi në Facebook, FFK-ja ka theksuar se kjo është një natë e rrallë dhe e papërsëritshme për Kosovën, ku secili tifoz duhet të jetë pjesë aktive e ndeshjes, me zë dhe zemër për kombëtaren.

“Sot nuk është ditë për të qëndruar ulur në tribunat e stadiumit. Nuk është mbrëmje për ta parë ndeshjen si spektatorë të qetë. Sot është momenti kur secili prej nesh duhet të jetë në këmbë, me zërin në maksimum, me zemrën që rreh për një emër të vetëm: Kosovë”, thuhet në thirrjen e Federatës.

FFK-ja ka theksuar se Kosova është vetëm një hap larg realizimit të një ëndrre të madhe – kualifikimit në Botëror – një mundësi që, sipas tyre, mund të vijë vetëm një herë në jetë.

“Jemi vetëm një hap larg Botërorit. Një hap që për shumëkënd ka qenë ëndërr e largët për dekada. Dhe kur historia të troket në derë, nuk hapet me heshtje, hapet me zhurmë, me pasion, me shpirt”, vijon deklarata.

Federata ka bërë të ditur se stadiumi nuk duhet të jetë një vend ku ndeshja përcillet në heshtje, por një arenë ku tifozët shndërrohen në forcën shtytëse të skuadrës.

“Stadiumi nuk është teatër. Nuk ka audiencë pasive. Ka vetëm një rol për të gjithë: të jemi lojtari i dymbëdhjetë. Dardanët në fushë kanë nevojë për atë shtysë që nuk matet me statistika”, thuhet më tej.

FFK-ja ka kërkuar gjithashtu respekt ndaj kundërshtarit, sidomos gjatë intonimit të himnit të Turqisë, por ka bërë thirrje që sapo të nisë loja, stadiumi “Fadil Vokrri” të shndërrohet në një fortesë të vërtetë.

“Por sapo topi të nisë të rrokulliset, stadiumi duhet të shndërrohet në një arenë ku edhe kundërshtari e ndjen peshën e një kombi të tërë”, thuhet në reagim.

Në fund, FFK-ja ka nënvizuar se kualifikimi në Botëror nuk do të ishte vetëm sukses sportiv, por edhe një mundësi e madhe për ta prezantuar Kosovën para botës, duke promovuar identitetin dhe krenarinë kombëtare në skenën më të madhe të futbollit.

“Bileta për në Botëror nuk është vetëm një arritje sportive. Është një mundësi për të treguar Kosovën para botës. Sonte nuk luan vetëm një ekip. Sonte luan një komb i tërë. Beso. Këndo. Brohorit. Sepse sonte, historia mund të shkruhet me zërin tënd”, përfundon thirrja e FFK-së./Albinfo.ch.

Kosova dhe Turqia do të përballen sonte në ora 20:45 në stadiumin “Fadil Vokrri” në Prishtinë, në finalen e “play-offit” për kualifikim në Kupën e Botës 2026, në një duel që pritet të vendosë historinë për “Dardanët”, përcjell albinfo.ch.

Kosova do të luajë sonte një nga ndeshjet më të rëndësishme të viteve të fundit, teksa pret Turqinë në finalen e “play-offit” për kualifikim në Kupën e Botës 2026.

Takimi zhvillohet në stadiumin “Fadil Vokrri” në Prishtinë, ku pritet një atmosferë e jashtëzakonshme me përkrahje masive të tifozëve vendas. Për Kombëtaren e Kosovës, kjo sfidë përfaqëson një mundësi historike për të siguruar kualifikimin e parë ndonjëherë në një Kampionat Botëror.

“Dardanët” vijnë në këtë përballje me moral të lartë pas fitores dramatike ndaj Sllovakisë, ku treguan karakter dhe vendosmëri në një ndeshje vendimtare. Forma e mirë dhe rezultatet pozitive në shtëpi nën drejtimin e trajnerit Franco Foda kanë rritur besimin se Kosova mund ta arrijë objektivin e madh.

Në anën tjetër, Turqia paraqitet si një kundërshtar i fortë, me një skuadër cilësore dhe përvojë ndërkombëtare, ku shumë nga lojtarët e saj aktivizohen në ligat më të forta evropiane.

Përballja pritet të jetë e tensionuar dhe me intensitet të lartë, ndërsa Kosova do të synojë të shfrytëzojë avantazhin e fushës dhe mbështetjen e publikut për të shkruar një kapitull historik në futbollin kosovar./Albinfo.ch