Archives

Kosovë: Presidenti i Këshillit Evropian takohet me Presidenten Osmani

Posted on by albinfo.ch

Presidenti i Këshillit Evropian, Antonio Costa është pritur në takim nga Presidentja e Kosovës, Vjosa Osmani këtë të mërkurë.

Pas takimit pritet edhe konferencë për media.

Po ashtu, ai pritet të zhvillojë takim edhe me kryeministrin në detyrë, Albin Kurti, shkruan albinfo.ch.

Vizita e Costas në Prishtinë vjen një ditë pas qëndrimit të tij në Beograd, ku ai theksoi se “procesi i integrimit evropian është në duart e Serbisë”. Ai i bëri thirrje Beogradit që “nuk mund të festojë lirinë, pa e dënuar pushtimin e një shteti tjetër”,  deklaratë kjo që erdhi pas vizitës së presidentit serb, Aleksandar Vuçiq, në Moskë, ku ai u takua me presidentin rus, Vladimir Putin, në kuadër të përvjetorit të fitores së Rusisë ndaj nazizmit.

Ndërkohë, Policia e Kosovës ka njoftuar se do të ndërmarrë masa të përkohshme të kontrollit të trafikut për të mundësuar lëvizjen e lirë dhe të sigurt gjatë vizitës së Presidentit të Këshillit Evropian.

“Për të mundësuar qarkullim të lirë sipas itinerarit të lëvizjes si dhe zhvillimin e aktiviteteve apo takimeve të personaliteteve të larta sipas agjendës, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore, ku edhe mund të ketë riorientim të trafikut në rrugë alternative”, thuhet në njoftimin e policisë, ku kërkohet mirëkuptim nga qytetarët dhe pjesëmarrësit në trafik, transmeton albinfo.ch.

A mund të funksionojë së shpejti sistemi i transportit publik të Cyrihut 24/7?

Posted on by BR

Shoqata e Transportit të Cyrihut (ZVV), më e madhja në Zvicër, po shqyrton nëse një shërbim i natës gjatë javës do të ishte i realizueshëm në të ardhmen.

Kompania është përgjegjëse për të gjitha shërbimet e transportit publik jo vetëm në kantonin e Cyrihut, por edhe në komunitetet fqinje të Aargau dhe St. Gallen, shkruan The Local, transmeton albinfo.ch.

Ideja e shërbimit të zgjeruar u ngrit për herë të parë në një konferencë mobiliteti në Lucern, ku Christian Vogt, kreu i Planifikimit të Transportit të ZVV, foli për mundësinë e një rrjeti gjatë natës gjatë javës.

Vlerësimi i kërkesës

Pyetja, siç raportojnë mediat zvicerane, është nëse potenciali është mjaft i madh.

Për të vlerësuar kërkesën, ZVV shikoi vëllimet e trafikut në rrugë.

Sipas Vogt, “shumë më pak njerëz” janë në rrugë gjatë javës sesa në fundjavë. Krahasuar me të shtunën në mbrëmje, për shembull, numri është 25 deri në 30 për qind. Megjithatë, “ky është një numër ku ne mund të konsiderojmë të bëjmë diçka,” vuri në dukje ai.

Në netët e fundjavës, rreth 80 për qind e përdoruesve të trenave të natës dhe autobusëve të natës ZVV janë udhëtarë të kohës së lirë, ndërsa pjesa tjetër janë njerëz që shkojnë në ose nga puna. Me një shërbim nate gjatë javës, përqindja e njerëzve që punojnë ka të ngjarë të jetë më e lartë.

Vogt gjithashtu vuri në dukje se një funksionim 24-orësh është i favorshëm sepse e bën transportin publik më tërheqës në përgjithësi. Nëse udhëtarët e dinë se është gjithmonë në dispozicion, mund të inkurajojë disa prej tyre që të lënë makinat e tyre në shtëpi.

Rrjeti i natës ZVV aktualisht përdoret nga afërsisht 30,000 pasagjerë në natë. Ajo funksionon nga e premtja në të shtunë, nga e shtuna në të diel dhe netët para festave publike.

Midis 2019 dhe 2023, shifrat e udhëtarëve u rritën me rreth 60 për qind, që ka të ngjarë për shkak jo vetëm të zgjerimit të shërbimeve, por edhe të heqjes së tarifës shtesë prej 5 frangash të natës që ishte në fuqi më parë.

Sipas Vogt, kjo do të rezultojë që më shumë udhëtime të bëhen me transport publik, veçanërisht për distanca më të shkurtra brenda qytetit të Cyrihut.

Pika të tjera për t’u marrë parasysh

Çështja se cilat linja mund të zgjerohen gjatë javës mbetet gjithashtu e hapur.

Për momentin, ideja e rrjetit të natës “është duke u rishikuar dhe zgjeruar vazhdimisht aty ku ekzistojnë mundësitë e tregut”, tha zëdhënësja e ZVV, Lucia Frei.

 

Kosovë: Gjykata refuzon kërkesën për pezullim të vendimit për shtrenjtimin e rrymës

Posted on by albinfo.ch

Gjykata Themelore në Prishtinë ka refuzuar kërkesën për vendosjen e masës së sigurisë ndaj vendimit të Zyrës së Rregullatorit për Energji (ZRrE), me të cilin është shtrenjtuar çmimi i energjisë elektrike për 16.1 për qind, shkruan albinfo.ch.

Lajmin e ka bërë të ditur avokati Ardian Bajraktari, përfaqësues i grupit qytetar “Asnjë cent më shumë”, përmes një postimi në Facebook, ku tha se tashmë është përgatitur ankesa për Gjykatën e Apelit.

“Kam pranuar Aktvendimin e Gjykatës Themelore në Prishtinë, me të cilin refuzohet kërkesa për sigurimin e padisë tonë ndaj ZRrE-së. Tashmë, gati është ankesa për Gjykatën e Apelit ndaj këtij aktvendimi. Beteja ligjore kundër vendimit të ZRrE-së për ngritjen e çmimit të energjisë vazhdon!”, ka shkruar Bajraktari.

Grupi “Asnjë cent më shumë” ka paditur ZRrE-në duke kërkuar anulimin e vendimit për rritjen e tarifave, të cilin e kanë cilësuar të kundërligjshëm. Në kuadër të kësaj padie, u kërkua edhe pezullimi i përkohshëm i vendimit, kërkesë kjo që u refuzua nga gjykata, transmeton albinfo.ch.

Vendimi i ZRrE-së për rritjen e tarifave u mor më 16 prill dhe ka hyrë në fuqi më 1 maj. Sipas tarifave të reja, çmimi për konsumatorët shtëpiakë që shpenzojnë deri në 800 kilovatë orë në muaj është rritur nga 7.79 në 9.05 centë për kilovat në tarifën e lartë, dhe nga 3.34 në 3.88 centë në tarifën e ulët.

Avokati i Popullit më herët kishte kërkuar pezullimin e vendimit të ZRrE-së deri në përfundimin e hetimeve për ankesat e qytetarëve, duke theksuar se vendimi ishte marrë në rrethana të boshllëkut institucional.

Ndërkohë, edhe përfaqësues të bizneseve kanë paralajmëruar mundësinë e ngritjes së padive kundër këtij vendimi, përderisa rritja e çmimit të energjisë tashmë ka filluar të reflektohet në rritje çmimesh për produkte bazike si buka dhe kafeja, transmeton albinfo.ch.

Mbyllen tri institucione në Mitrovicë të Veriut

Posted on by albinfo.ch

Policia e Kosovës ka ndërhyrë sot në një objekt në Mitrovicën e Veriut, me kërkesë të Komunës së kësaj pjese, ku ishin të vendosura tri institucione serbe: Institucioni për sport, rini dhe shërbime të specializuara, Lidhja Sportive dhe Shoqëria Kulturore-Artistike “Kosovski božur”, transmeton albinfo.ch.

Zëvendëskomandanti i Policisë për pjesën veriore, Veton Elshani, ka bërë të ditur për mediat në Kosovë se ndërhyrja është kryer në mënyrë të qetë dhe pa ndonjë incident.

“Zyrtarët komunalë kërkuan asistencën tonë për të hyrë në pronën që ata e konsiderojnë si të tyren. Ata hynë dhe më pas punonjësit e atyre institucioneve dolën nga hapësirat. Nuk pati asnjë problem”, tha Elshani.

Sipas tij, komuna pretendon se objekti është në pronësi të saj dhe ka kërkuar që të rikthejë përdorimin e tij për nevojat komunale. Policia ka asistuar gjatë procesit, ndërsa zyrtarët e institucioneve serbe janë larguar pa kundërshtim, transmeton albinfo.ch.

Osmani pranoi raportin e Misionit Vëzhgues të BE-së për zgjedhjet e shkurtit

Posted on by Drin Reçica

Presidentja e Republikës së Kosovës, Vjosa Osmani, priti sot në takim shefen e Misionit për Vëzhgimin e Zgjedhjeve nga Bashkimi Evropian, eurodeputeten Nathalie Loiseau, e cila i dorëzoi raportin përfundimtar të këtij misioni lidhur me zgjedhjet parlamentare të vitit 2025. përcjell albinfo.ch.

Referuar një njoftimi për media bëhet e ditur se Osmani falënderoi eurodeputeten dhe të gjithë anëtarët e misionit për angazhimin dhe profesionalizmin e treguar gjatë gjithë procesit zgjedhor.

Ajo theksoi se prezenca e këtij misioni, me kërkesë të saj, dëshmon përkushtimin e Republikës së Kosovës për transparencë, llogaridhënie, sundim të ligjit dhe përmbushjen e standardeve më të larta demokratike.

Osmani theksoi se zgjedhjet parlamentare të vitit 2025 ishin një dëshmi e pjekurisë politike dhe qytetare në Kosovë, duke theksuar se edhe ky proces zgjedhor, i zhvilluar në mënyrë të qetë dhe të rregullt, konfirmoi se demokracia në Kosovë është e gjallë, e qëndrueshme dhe në përparim të vazhdueshëm.

“Nga ana e saj, Shefja e Misionit për Vëzhgimin e Zgjedhjeve Loiseau e përgëzoi Osmanin për angazhimin e Republikës së Kosovës në mbrojtje të vlerave demokratike dhe për organizimin paqësor të zgjedhjeve. Ajo vlerësoi pjekurinë e treguar nga qytetarët e Kosovës, si dhe bashkëpunimin e plotë të ofruar ndaj misionit vëzhgues. Presidentja dhe Shefja e Misionit Loiseau po ashtu diskutuan për rekomandimet e raportit për përmirësimin e mëtejmë të proceseve demokratike në vend”, thuhet në njoftim.

Popullsia zvicerane vë në pikëpyetje gjithnjë e më shumë rolet konvencionale gjinore

Posted on by Drin Reçica

Referuar statistikave, pranimi i prindërimit të të njëjtit seks është rritur me 25 përqind në 10 vitet e fundit, përcjell albinfo.ch.

Në vitin 2023, dy të tretat e të moshuarve nga 15 deri në 80 vjeç në Zvicër besonin se fëmijët gjithashtu mund të rriten të lumtur me çifte të të njëjtit seks. Kjo është ajo që del nga një analizë e publikuar nga Zyra Federale e Statistikave të martën.

Lidhur me ndarjen e roleve, vetëm rreth një e katërta e të anketuarve besonin se burrat duhet të jenë mbajtësit kryesorë të familjes. Një e treta mendonte se gratë ishin më të mira në kujdesin për fëmijët e vegjël.

Dhjetë vjet më parë, këto shifra ishin përkatësisht 39 dhe 51 përqind.

Kur u pyetën për ndarjen e tyre të preferuar të punës së paguar, më shumë se gjysma thanë se të dy prindërit duhet të punojnë me kohë të pjesshme. Në realitet, megjithatë, çiftet në të cilat nëna punonte me kohë të pjesshme dhe babai punonte me kohë të plotë vazhduan të dominonin, me 46 përqind.

Macron e uroi për mandatin e ri Edi Ramën

Posted on by Drin Reçica

Kryeministri Edi Rama ka reaguar ndaj mesazhit të urimit të presidentit francez Emmanuel Macron për fitoren e mandatit të katërt, përcjell albinfo.ch.

Rama shprehet se mesazhi i Macron ka një domethënie të madhe për marrëdhëniet mes Shqipërisë dhe Francës.

Më tej Rama vlerësoi rolin e Macron, falë të cilit ka një vëmendje të shtuar ndaj Ballkanit Perëndimor.

Nesër kryeministri shqiptar pret Macron dhe liderë të tjerë europian për Samitin e radhës të Komunitetit Politik Evropian në Tiranë.

Postimi i Ramës në X:

Faleminderit nga zemra, i dashur @EmmanuelMacron, për mesazhin tuaj urues që ka një domethënie të madhe jo vetëm për mua, por edhe për marrëdhëniet mes Shqipërisë dhe Francës. Falë jush dhe qasjes suaj ndaj Ballkanit Perëndimor, këto marrëdhënie kanë arritur një nivel të paparë më parë.

Është vërtet e mrekullueshme që Shqipëria ka nderin t’ju presë sërish si një mik i çmuar, me rastin e Samitit të Komunitetit Politik Evropian, dhe që do të qëndroni më tej me ne për të bërë një vlerësim të bashkëpunimit tonë intensiv.

Mirë se vini, mik i dashur.

Presidentja Osmani priti në takim Shefin e Zyrës së BE-së në Kosovë, Aivo Orav

Posted on by Drin Reçica

Sot, presidentja e Republikës së Kosovës, Vjosa Osmani, priti në takim Shefin e Zyrës së Bashkimit Evropian (BE) në Kosovë, Aivo Orav, me të cilin diskutoi situatën aktuale politike në vend, përcjell albinfo.ch.

Siç njofton Zyra e Presidentes, Osmani e informoi ambasadorin Orav për mbajtjen e takimit konsultativ me liderët e partive politike, të planifikuar për të enjten, më 15 maj.

Deri më tani, të gjitha partitë shqiptare në Kuvendin e Kosovës kanë bërë të ditur se do t’i përgjigjen ftesës së presidentes Osmani, për takimet me të cilat synohet t’i jepet zgjidhje ngërçit politik, megjithëse ata kanë shprehur pikëpamje të ndryshme për gjetjen e zgjidhjes.

Gjatë takimit të Osmanit me Orav u diskutua edhe për vizitat e rëndësishme të drejtuesve të lartë të BE-së në Kosovë, duke përfshirë vizitën e sotme të kryesuesit të Këshillit të BE-së, Antonio Costa, “si një sinjal i fuqishëm i mbështetjes së BE-së për integrimin evropian të Kosovës”.

Costa do të qëndrojë për vizitë zyrtare sot në Prishtinë, pas vizitës që kishte gjatë ditës së djeshme në Beograd.

Çfarë duhet të bëni nëse keni harruar portofolin në një tren zviceran?

Posted on by Drin Reçica

Sapo të kuptoni se keni zbritur nga treni pa sendet tuaja, njoftoni kompaninë hekurudhore, SBB, duke paraqitur një raport online, duke plotësuar të gjitha detajet, përcjell albinfo.ch.

Nëse dikush i ndershëm (siç priren të jenë shumë zviceranë) sheh sendet tuaja të harruara dhe njofton konduktorin, ka shumë mundësi që përfundimisht të ribashkoheni me sendet tuaja të humbura.

Por, duke qenë se Zvicra është e organizuar dhe e rregullt, ekziston një procedurë e duhur që duhet të aktivizohet në mënyrë që të merrni çantën tuaj (dhe çdo gjë tjetër që keni lënë pas).

Çfarë duhet bërë saktësisht?

Pavarësisht se ku në Zvicër i keni harruar sendet tuaja, ato do të përfundojnë në zyrën qendrore ‘Lost & Found’ në Bernë.

Megjithatë, pasi raporti juaj të jetë paraqitur dhe marrë, çanta juaj do të presë për t’u marrë në stacionin e zgjedhjes suaj.

SBB ju faturon për këtë shërbim, me shumën që bazohet në llojin e kartës së udhëtimit që keni: 5 franga me GA Travelcard, 10 franga me Half Fare Travelcard / biletë vjetore sezonale, ose 20 franga pa asnjërën prej tyre.

Një gjë interesante do të ndodhë nëse mbani euro ose ndonjë monedhë tjetër të huaj në portofolin tuaj.

Siç raportohet nga platforma e lajmeve Watson, nuk do ta merrni monedhën tuaj origjinale mbrapsht, sepse ajo do të konvertohet  dhe do t’ju kthehet  në franga.

Për më shumë detaje – https://www.thelocal.ch/20250514/what-happens-to-your-money-if-you-leave-your-wallet-or-purse-on-a-swiss-train

 

 

 

 

 

 

 

 

Për shumë punonjës zviceranë, mjedisi i punës është më i rëndësishëm se pagat

Posted on by Drin Reçica

Ky është përfundimi i një studimi të publikuar të martën nga Swissstaffing në bashkëpunim me institutin kërkimor GFS Zurich, përcjell albinfo.ch.

Rreth 68 përqind e të anketuarve përmendën një mjedis të mirë pune si kriterin më të rëndësishëm kur zgjedhin një punë,  madje edhe përpara pagës. Për më tepër, pothuajse gjysma e tyre e konsiderojnë fleksibilitetin në aspektin e kohës ose vendndodhjes gjithashtu thelbësor.

Megjithatë, prioritetet ndryshojnë shumë midis brezave.

Brezi Z, për shembull, i kushton shumë rëndësi pagave dhe sigurisë së punës.

Në të kundërt, punëtorët mbi 50 vjeç kanë më shumë gjasa të kërkojnë fleksibilitet dhe kënaqësi nga puna e tyre.

Von der Leyen uron Ramën: Shqipëria i përket BE-së

Posted on by Drin Reçica

Së fundmi, presidentja e Komisionit Evropian, Ursula von der Leyen, e ka uruar Edi Ramën për fitoren në zgjedhjet parlamentare, teksa u shpreh se Shqipëria i përket Bashkimit Evropian, përcjell albinfo.ch.

Ajo ka shkruar në rrjetin social X se mezi pret t’ia urojë Ramës fitoren edhe në takim, që do të zhvillohet të enjten në Samitin e Komunitetit Politik Evropian që mbahet në Tiranë.

Nën drejtimin tuaj, Shqipëria ka bërë përparim të madh drejt Bashkimit tonë. Le të vazhdojmë punën bashkërisht për reformat në kuadër të BE-së. Shqipëria i përket BE-së. Mezi pres t’ua uroj personalisht nesër në Tiranë”, ka shkruar Von der Leyen.

Zyrtaren e BE-së e ka falënderuar Rama, teksa tha që ky është moment i përshtatshëm “pas fjalës së fuqishme të popullit shqiptar për ëndrrën e tij të madhe dhe vendosmërinë e palëkundur për t’u bërë anëtar”.

Kryeministri i Shqipërisë ka shtuar se është i vetëdijshëm për rrugën drejt integrimit.

“Le të synojmë më të mirën që na pret. Gjithmonë së bashku”, ka shtuar Rama në X.

Cilat janë “vlerat e vërteta” të Zvicrës?

Posted on by Drin Reçica

Ndërsa përgjigjet e kësaj pyetjeje mund të jenë të diskutueshme, disa përgjigje vijnë nga një sondazh i ri i kryer nga transmetuesi publik i Zvicrës, SRF, përcjell albinfo.ch.

Dhe gjetjet ndoshta do të vijnë si surprizë për shumë njerëz, sepse gjëra të tilla si “paratë” ose “stabiliteti financiar” as nuk shfaqen midis përgjigjeve kryesore.

Për shumicën e të anketuarve, në fakt, (gati 30 përqind), ndershmëria është vlera më e rëndësishme.

Tjetra (17.11 përqind) është lumturia, e ndjekur nga marrëdhëniet e qëndrueshme martesore (12.6 përqind).

Nga ana tjetër, “suksesi” është cilësia më e rëndësishme vetëm për 1.48 përqind të pjesëmarrësve.

Zvicra me kërkesë interesante për ushtaret zvicerane

Posted on by Drin Reçica

Departamenti i Mbrojtjes po i konsideron reçipetat me tela (jelekët e brendshëm të femrave) që veshin ushtaret femra si një rrezik në luftime, përcjell albinfo.ch.

“Çdo objekt metalik i vendosur midis pjesës së sipërme të trupit dhe jelekut antiplumb mund të paraqesë një rrezik në rritje në rast të valëve goditëse, shrapnelave ose predhave”, tha togerja Lara Joye, duke shtuar se rreziku më i madh është shpimi i kraharorit.

Prandaj, femrave po u kërkohet të përdorin reçipeta pa tela në vend të atyre me tela.

Dhe ushtria ka një buxhet të caktuar posaçërisht për këtë qëllim: ushtarëve do t’u jepen 100 franga çdo tre vjet për të blerë reçipeta pa tela.

Tiranë: Presidentja zvicerane në Samitin e Komunitetit Politik Europian

Posted on by Drin Reçica

Presidentja zvicerane, Karin Keller-Sutter do të udhëtoj në Tiranë këtë javë, shkruan albinfo.ch.

Ajo do të përfaqësojë Zvicrën në Samitin e Komunitetit Politik Evropian më 16 maj, duke udhëhequr delegacionin zviceran.

47 liderë nga mbarë kontinenti mbërrijnë të enjten e të premten në Tiranë për të marrë pjesë në samitin e 6-të të Komunitetit Politik Evropian. Këto dy ditë do të jenë të ngjeshura me takime, ndërsa edhe të shtunën e 17 majit kryeministri Rama do të ketë një agjendë të ngarkuar me presidentin francez Macron.

Votat e diasporës, PS thellon diferencën

Posted on by BR

Partia Socialiste ka marrë kryesimin e votave të diasporës ne zgjedhje e 11 Majit.

Sipas rezultateve të KQZ-së, Partia Socialiste ka siguruar 42,492 vota në total nga qendrat e numëruara, ndërkohë që PD ka arritur të sigurojë 22,481 vota, shkruajnë mediat shqiptare, përcjell albinfo.ch.

Diferenca mes palëve është mbi 20 mijë vota. Nisma Shqipëria Behet e Adriatik Lapajt ka marrë 6670 vota, ndërkohë që Partia Mundësia 2781 vota.

Rezultatet

PS – 42,492 vota

PD – 22,481 vota

Nisma SHB – 6670 vota

Mundësia – 2781 vota

Bashkë – 2067 vota

PSD – 880 vota

Tuneli Gotthard do të hapet të premten

Posted on by BR

Lajm i mirë për shoferët që duan të kalojnë Alpet, Tuneli Gotthard do të hapet këtë të premte.

Pra, kur ka bllokime në tunel, shoferët do të mund të marrin lejen, transmeton albinfo.ch.

Tani është ndërtuar një dalje e re për kalimin, që do të thotë se qyteti i Wassen është i kursyer nga trafiku.

Susten do të hapet pjesërisht të premten, hapja e plotë nuk do të jetë deri në mes të qershorit.

Qafa e Furkës mbetet e mbyllur për shkak të punimeve në rrugë  por duhet të hapet në fund të këtij muaji.

Noti në Rhône është i ndaluar deri në qershor

Posted on by BR

Nuk ka not ende në Rhône.

Pavarësisht motit të ngrohtë, lumi është i ndaluar nga nesër deri më 6 qershor.

Noti, peshkimi, shëtitja me varkë dhe sportet janë të ndaluara përgjatë lumenjve Rhône dhe Arve ndërsa diga Verbois është zbrazur pjesërisht, transmeton albinfo.ch.

Operacioni, i udhëhequr nga Shërbimet Industriale të Gjenevës, pastron grumbullimin e sedimenteve që është thelbësore për parandalimin e përmbytjeve për zona si La Jonction.

Lumi do të rihapet sapo të përfundojë pastrimi, në varësi të motit.

 

 

Sa shqiptarë jetojnë në BE sipas shifrave

Posted on by BR

Në fillim të vitit 2023, në Bashkimin Evropian (BE) jetonin 27.4 milionë persona që nuk ishin qytetarë të Bashkimit Evropian, sipas të dhënave të Eurostat.

Këta përbënin 6.1% të popullsisë së BE-së. Në vitin 2023, u regjistruan 25 shtetësi jo-BE, që secila përbënte të paktën 1.0% të gjithë rezidentëve jo-BE në Bashkimin Evropian; së bashku, këto grupe përfaqësonin 74.7% të totalit, shkruan Monitor, transmeton albinfo.ch.

Komunitetet më të mëdha që jetonin në BE pa pasur shtetësi të një vendi anëtar ishin shtetasit ukrainas (11.9%), turq (7.7%), marokenë (7.1%) dhe sirianë (5.3%). Ndërkohë, shtetasit kinezë (përfshirë Hong-Kongun) dhe rusët zinin përkatësisht 3.9% dhe 3.3% të numrit të përgjithshëm. Shqiptarët renditen në vendin e nëntë me rreth 2.3% të totalit të të huajve që jetojnë në BE, pas Indisë (3.2%) dhe Mbretërisë së Bashkuar (2.6%).

Shqipëria, e para në raport me popullsinë përkatëse

Në vendet e BE-së jetojnë rreth 3.2 milionë ukrainas dhe 2.1 milionë turq, sipas të dhënave të Eurostat, duke u renditur të parët në numër.

Por emigrantët nga të dy këto shtete vijnë nga vende me popullsi të mëdha, ku Turqia ka 87 milionë banorë dhe Ukraina 39 milionë banorë, duke bërë që emigrantët në raport me popullsitë e tyre përkatëse të jenë vetëm 2.4% dhe 8.4%.

Në BE, sipas Eurostat, jetojnë rreth 630 mijë shqiptarë (të dhënat nuk përfshijnë Greqinë). Kjo është e barabartë me 26% të popullsisë që jeton në Shqipëri, duke na renditur të parët në BE në raport me popullsinë, sipas të dhënave të përpunuara nga Monitor. Nëse shtohen edhe ata që jetojnë në Greqi, që janë të paktën 400 mijë persona, shifra e kalon 40%.

Në nivele të larta është edhe Kosova, që renditet e dyta për shtetasit që jetojnë në BE në raport me popullsinë përkatëse, me 25.7%.

Ballkani Perëndimor vijon kryesimin, me Maqedoninë e Veriut me 19.6% dhe Bosnjë e Hercegovinën me 17.3%.

Lejet e qëndrimit, 73 mijë vetëm në 2023

Të dhëna të tjera të Eurostat bënë të ditur se në vitin 2023 u dhanë rreth 75 mijë leje qëndrimi për shtetasit shqiptarë nga vendet e BE-së.

Në vitet 2022–2023 janë dhënë gjithsej 154 mijë leje qëndrimi për herë të parë.

Që nga viti 2008, kur Eurostat raporton të dhënat, kanë marrë leje qëndrimi për herë të parë rreth 920 mijë shtetas shqiptarë.

Ikja në vendet e BE-së është një nga arsyet kryesore të rënies së ndjeshme të popullsisë. INSTAT gjeti në Censin e fundit se popullsia e vendit është reduktuar me 420 mijë persona në raport me Censin e mëparshëm të vitit 2011. Në vend, sipas INSTAT, tashmë jetojnë vetëm 2.4 milionë persona.

26 deputetë britanikë kërkojnë vendosjen e sanksioneve ndaj Vuçiqit

Posted on by Drin Reçica

Bëhet e ditur se 26 deputetë britanikë i kanë dërguar një letër zyrtare Sekretarit të Jashtëm David Lammy, përcjell albinfo.ch.

Ndërkohë, ligjvënësit e Mbretërisë së Bashkuar, i kanë kërkuar kryediplomatit një ndryshim rrënujësor në politikën e jashtme ndaj Serbisë.

Kjo letër është nënshkruar nga përfaqësuesit e të gjitha partive politike, në krye me Emma Lewell-Buck, e cila është kryetare e grupit parlamentar “Labour Friends of Kosovo&Western Ballkans”.

Arsye për këtë iniciativë, ishte pjesëmarrja e presidentit serb Aleksandar Vuçiq, në paradën ushtarake në Moskë më 9 maj, e cila shihet si demonstrim i forcës nga regjimi i Vladimir Putinit.

“Nën Presidentin Vuçiq, Serbia ka forcuar marrëdhëniet me Rusinë, duke qenë vendi i vetëm evropian që nuk ka vendosur sanksione ndaj saj që nga viti 2014,” thuhet në letër.

Deputetët britanikë shprehin shqetësimin për përpjekjet e Vuçiqit për të destabilizuar rajonin e Ballkanit dhe për lidhjet e tij me strukturat paramilitare dhe kriminale në veri të Kosovës.

Po ashtu, letra në fjalë thekson përfshirjen e drejtpërdrejtë të Milan Radoiçiqit në sulmin e 24 shtatorit 2023 në Banjskë, një akt që autorët e letrës e cilësojnë si “terrorizëm i mbështetur nga shteti serb”.

Ligjvënësit britanikë, theksojnë se Serbia ka përdorur një retorikë të rrezikshme nacionaliste dhe ka vazhduar të refuzojë realitetin e pavarësisë së Kosovës.

Në dokumentin zyrtar, ata i bëjnë thirrje Qeverisë britanike të ndërmarrë një sërë hapash:

  • Të dënojë publikisht retorikën përçarëse dhe veprimet e destabilizuese të Presidentit Vuçiq.
  • Të miratojë sanksione të synuara ndaj Vuçiqit dhe bashkëpunëtorëve të tij.
  • Të mbështesë më fuqishëm integrimin euroatlantik të Ballkanit dhe reformën demokratike në rajon.

Deputetët britanikë nënvizojnë se kjo letër nuk është një sulm ndaj popullit serb, por një përpjekje për të ndarë shpresat e qytetarëve për një të ardhme evropiane nga veprimet e një regjimi që “po rrëshqet drejt autokracisë”.

Publikohet agjenda, në Tiranë bëhen bashkë të premten liderët evropianë

Posted on by Drin Reçica

Mësohet se takimi i gjashtë i Komunitetit Politik Evropian do të bëjë bashkë në Tiranë udhëheqës nga i gjithë kontinenti, të premten, më 16 maj, përcjell albinfo.ch.

Udhëheqësit do të takohen fillimisht në një seancë plenare kushtuar sigurisë dhe një vizioni të përbashkët për të ardhmen e Evropës.

Tema e takimit që mbahet në kryeqendrën shqiptare është “Evropa e Re në një botë të re: unitet – bashkëpunim – veprim i përbashkët”.

47 krerë shtetesh dhe qeverish janë ftuar të marrin pjesë në këtë takim të gjashtë të Komunitetit Politik Evropian.

Siç bëhet e ditur në agjendën e publikuar në faqen e Këshillit Evropian, tri tryeza të rrumbullakëta të nivelit të lartë do të zhvillohen më pas rreth temave si: siguria dhe qëndrueshmëria demokratike e Evropës, përfshirë luftën agresionale të Rusisë kundër Ukrainës, konkurrueshmëria dhe siguria ekonomike si dhe sfidat e lëvizshmërisë dhe fuqizimi i të rinjve.

BE-ja do të përfaqësohet në takim nga Presidenti i Këshillit Evropian, Antonio Costa, i cili do të bashkëkryesojë takimin së bashku me kryeministrin e Shqipërisë, Edi Rama.

Dr. Kaltrina Zahiti: Për një trajtim më të përgjegjshëm të syve

Posted on by albinfo.ch

Dr. Kaltrina Zahiti është mjeke e syve, oftalmologe. E lindur në Kosovë dhe e rritur në Austri, ajo ka bërë studimet, doktoratën dhe disa specializime në universitete të ndryshme të Gjermanisë dhe të Zvicrës. Aktualisht është pronare dhe udhëheqëse e dy ordinancave oftalmologjike në Zvicër, gjegjësisht në Biberist (Kantoni Solothurn) dhe Emmenbrücke (Kantoni Luzern).

Dr. Kaltrina flet për rrugën e saj të shkollimit e ngritjes në profesion, për përvojat e saj me pacientët në përgjithësi dhe ata shqiptarë, në veçanti, për nevojën që sytë të trajtohen në mënyrë profesionale etj.

Albinfo.ch: Në mesin e një numri në rritje të mjekëve shqiptarë në Zvicër, fitohet një përshtypje se janë ende të pakët specialistët e syve, oftalmologët. Cila mendoni se është arsyeja?

Dr. Kaltrina Zahiti: Është e vërtetë se nuk ka shumë oftalmologë shqiptarë. Një nga arsyet është me siguri edhe nga fakti se ofrohen më pak vende të specializimit në këtë fushë dhe fakti tjetër se kemi të bëjmë me një lëmë shumë specifike dhe të pavarur prej lëmenjve të tjerë.

Albinfo.ch: Na tregoni pak për rrugëtimin tuaj profesional të deritashëm.

Dr. Kaltrina Zahiti: E lindur në Kosovë, e rritur ne Austri, studimet e mjekësisë i kam mbaruar në Munih, në Gjermani. Gjatë studimeve kam bërë praktika të ndryshme në klinika oftalmologjike si në Reykjavik, Stockholm, Liverpool e Berlin. Kam mbaruar doktoratën në Munih pastaj specializimin në Zvicër, gjegjësisht në Klinikën Universitare të Bazelit dhe në klinikën e syve të Lucernit. Pas përfundimit të specializimit jam punësuar në ordinanca/klinika të ndryshme, si në Bazel, pastaj në Olten dhe në Willisau. Në vitin 2023 kam hapur ordinancën e parë në Biberist (Kt. Solothurn) (Augenzentrum Biberist) ndërsa në dhjetor të vitit 2024 kam hapur edhe ordinancën e dytë, atë në Emmenbrücke (Kt. Luzern) (Augenzentrum Emmen).

Albinfo.ch: Cili është fokusimi juaj konkret në kuadrin e oftalmologjisë?

Dr. Kaltrina Zahiti: Unë praktikoj mjekësi të përgjithshme të syve prej foshnjave deri te pacientët e moshuar.

Albinfo.ch: Ju keni dy ordinanca oftalmologjike. Na tregoni për to. Ku janë, çfarë i dallon njërën nga tjetra, respektivisht a ofrojnë shërbime të njëjta apo e plotësojnë njëra tjetrën? A keni edhe specialistë të tjerë që punojnë me ju?

Dr. Kaltrina Zahiti: Unë ofroj në të dy ordinancat shërbime të ngjashme, kontrolle oftalmologjike. Deri në kët moment punoj si e vetmja oftalmologe në të dy ordinancat dhe në këtë mënyrë siguroj që pacientët të kenë çdo herë të njëjtin mjek. Megjithatë, ndoshta në të ardhmen do të kem nevojë edhe për kolegë shtesë.

Albinfo.ch: Cilat janë shërbimet më të kërkuara nga pacientët, gjegjësisht për cilat shërbime drejtohen ata më shumë te ju?

Dr. Kaltrina Zahiti: Shërbimet më të kërkuara janë sigurisht kontrollet rutinore oftalmologjike, emergjenca të ndryshme dhe po ashtu kemi ditë të caktuara kur kontrollojmë sidomos fëmijët.

Albinfo.ch: Çfarë përvojash keni me pacientët shqiptarë? A kanë kulturë të duhur të mbrojtjes dhe të mjekimit të syve? A e shfrytëzojnë sa duhet mundësinë që u jepni të trajtohen në nivel të lartë në gjuhën amtare? Çfarë do t`i këshillonit ju ata?

Dr. Kaltrina Zahiti: Varësisht prej vendit ku kam punuar deri më tani, si në Biberist ashtu edhe Emmenbrücke, kam pasur mjaft pacientë shqiptarë. Ata tregohen shumë të kënaqur dhe falënderues që mund të shprehen të gjuhën shqipe. Besoj se për shumë pacientë është mjaft e rëndësishme të kuptojnë sëmundjet/ankesat e tyre, për të pasur një trajtim dhe shërim më të mirë. Në përgjithësi besoj se edhe më tutje shumë pacientë nuk janë të vetëdijshëm se kontrollet e rregullta të syve rekomandohen prej moshës 40 vjeçare.

Albinfo.ch: Nga përshkrimi i punës suaj lexuam se merreni në mënyrë specifike me diabetin, sigurisht, me implikimet që diabeti ka në shëndetin e syve. A na tregoni pak më në hollësi rreth kësaj ?

Dr. Kaltrina Zahiti: Sëmundje të ndryshme si p.sh. diabeti, reuma, pastaj sëmundje të ndryshme dermatologjike, shtypja e lartë e gjakut, sëmundjet onkologjike etj., kanë edhe lidhje me sy. Speficikisht pacientët me diabet duhet të kontrollohen së paku një herë në vit prej oftalmologut. Diabeti mund të shkaktojë sëmundje në sy që mund të shërohen në rast se zbulohen me kohë.

Albinfo.ch:  A hyn në mesin e shërbimeve që ofroni ju edhe caktimi i nivelit të shikimit gjegjësisht porositja e syzeve, për të rritur dhe fëmijë? Cilat janë përvojat tuaja në këtë aspekt?

Dr. Kaltrina Zahiti: Ne kemi një bashkëpunim shumë të mirë me mjekë të fëmijëve që na sjellin shumë fëmijë për kontrolle të syve. Te fëmijët është tepër e rëndësishme që të zbulohen sëmundjet ose të matet niveli i shikimit që herët për shkak se zhvillimi i shikimit te fëmijët përfundon në moshën 10-11 vjeçare. Për shembull, në rastet kur nuk zbulohet herët nevoja për syza (edhe nëse nuk ka ankesa nga fëmija) ata mund të kenë pamje të dëmtuar (reduktuar) për kohë të gjatë.

Albinfo.ch: Po këshillat që do t`ua jepnit pacientëve që kanë nevojë për syze? Çfarë duhet të kenë parasysh ata para se të vijnë tek ju?

Dr. Kaltrina Zahiti: Unë rekomandoj kontrolle të rregullta të fëmijëve, gjithsesi para hyrjes në shkollë si dhe të të rriturve prej moshës 40 vjeçare, për secilin pacient. Shumë sëmundje mund të shërohen në qoftë se zbulohen me kohë.

Dy ordinancat oftalmologjike në Zvicër të Dr Kaltrina Zahitit i gjeni në Biberist (Kantoni Solothurn) dhe Emmenbrücke (Kantoni Luzern):

Augenzentrum Biberist

Dr. Kaltrina Zahiti

Zentrumweg 6

4562 Biberist

032 326 72 27 27

[email protected]

www.augenzentrum-biberist.ch

 

Augenzentrum Emmen

Dr. Kaltrina Zahiti

Erlenstrasse 4

6020 Emmenbrücke

041 282 11 11

[email protected]

www.augenzentrum-emmen.ch

 

 

 

 

Gjermani: Arrestohet mërgimtari në trenin Euro-City, kishte dokumente false

Posted on by Drin Reçica

Gjatë një kontrolli rutinë në një tren Euro-City që udhëtonte përmes Gjermanisë, oficerët e Policisë Federale Gjermane arrestuan një 39-vjeçar me shtetësi shqiptare, i cili udhëtonte me një identitet italian të rremë dhe disa dokumente të tjera të falsifikuara, transmeton albinfo.ch.

Mërgimtari që prej vitit 2020 ishte regjistruar në Vorarlberg të Austrisë me të dhëna personale italiane dhe u ndalua gjatë një kontrolli të rregullt.

Fillimisht, ai paraqiti një kartë identiteti dhe një leje drejtimi italiane, të cilat rezultuan të jenë të falsifikuara pas verifikimeve të kryera nga Inspektorati i Policisë Federale në Kempten. E vetmja pjesë legjitime e dokumentacionit të tij ishte një kartë austriake sigurimi shëndetësor.

Hetimet zbuluan edhe më shumë: në pasaportën shqiptare që mbante me vete ishte fshirë viza ngjitëse dhe ishte falsifikuar vula e daljes nga vendi. Brenda kopertinës së pasaportës, policia zbuloi një tjetër identitet të fabrikuar – një kartë identiteti dhe një patentë shoferi me të dhëna krejtësisht të ndryshme.

Prokurorët publikë në Ravensburg dhe Ellwangen kishin shpallur kërkim për të në emër të vërtetë të tij, lidhur me një çështje të hapur për “vjedhje veçanërisht të rëndë”. Emri i tij nuk është bërë publik, por autoritetet sqarojnë se individi është i njohur për një histori të gjatë vjedhjesh në territorin gjerman.

Policia konfirmon se ai do të përballet me akuza për tentativë për hyrje të paligjshme, falsifikim dokumentesh, mashtrim të autoriteteve përmes identifikimit të rremë, deklarime të pavërteta dhe manipulim të dokumenteve zyrtare. Përkohësisht, ndaj tij është vendosur një depozitë sigurie prej 300 frangash zvicerane dhe ai është dëbuar drejt Tiranës, me ndalim rihyrjeje në Gjermani për një periudhë katërvjeçare.

Rasti është një ilustrim tjetër i përpjekjeve të vazhdueshme të autoriteteve gjermane për të adresuar sfidat e migracionit të parregullt dhe manipulimin e dokumenteve në hapësirën Schengen, teksa kufijtë mbeten të hapur por nën vëzhgim të rreptë.