Sot shpallet aktgjykimi për tre të akuzuarit në rastin “Banjska”

Prokuroria kërkoi burgim të përjetshëm, ndërsa në aktakuzë në mungesë përfshihen edhe 42 persona të tjerë, përfshirë Millan Radoiçiq

Sot, më 24 prill, do të shpallet aktgjykimi ndaj tre të akuzuarve për rastin “Banjska”, Vlladimir Toliq, Bllagoje Spasojeviq dhe Dushan Maksimoviq, përcjell albinfo.ch.

Shpallja e vendimit vjen pas 2 vjet e 7 muajsh nga sulmi terrorist në Banjskë, që ndodhi më 24 shtator 2023.

Javën e kaluar, prokurori i rastit, Naim Abazi, kishte kërkuar burgim të përjetshëm për tre të akuzuarit. Ndërkohë, Toliq, Spasojeviq dhe Maksimoviq i kanë mohuar akuzat me të cilat ngarkohen.

Përveç tyre, Prokuroria Speciale e Kosovës më 11 shtator 2024 ngriti aktakuzë në mungesë edhe ndaj 42 personave të tjerë, në mesin e të cilëve edhe Millan Radoiçiq, i cilësuar si kryeterrorist, i cili ende nuk është kapur nga organet e drejtësisë.

Prokuroria kishte kërkuar më herët gjykim në mungesë edhe ndaj të akuzuarve të tjerë, por kërkesa ishte hedhur poshtë nga Gjykata Themelore e Prishtinës, duke u cilësuar si e pabazë.

Të akuzuarit ngarkohen për veprat penale “Kryerja e veprës terroriste”, “Veprat e rënda kundër rendit kushtetues dhe sigurisë së Republikës së Kosovës”, “Lehtësimi dhe financimi në kryerjen e terrorizmit” si dhe “Shpëlarja e parave”.

Sipas aktakuzës, ata dyshohen se përmes përdorimit të dhunës dhe armatimit të rëndë kanë tentuar të shkëpusin pjesën veriore të territorit të Republikës së Kosovës dhe ta bashkojnë me Serbinë.

Në sulmin e shtatorit 2023 u vra rreshteri policor Afrim Bunjaku, ndërsa u plagos zyrtari policor Alban Rashiti dhe u lënduan edhe disa zyrtarë të tjerë. Në përleshje mbetën të vrarë edhe tre sulmues, ndërsa pjesa tjetër u largua pasi qëndroi për disa orë në Manastirin e Banjskës.

Millan Radoiçiq më pas kishte marrë përsipër përgjegjësinë për sulmin.

Serbia ende nuk ka dorëzuar të dyshuarit e këtij rasti, përfshirë edhe Radoiçiqin, pavarësisht kërkesave të vazhdueshme të autoriteteve vendore dhe ndërkombëtare./Albinfo.ch

---