Gjykata Themelore në Prishtinë i ka caktuar një muaj paraburgim policit Bojan Jevtiq, i dyshuar për veprën penale të spiunazhit.
Gjykata pas mbajtjes së seancës dëgjimore, vlerësoi se caktimi i masës së paraburgimit në këtë çështje penale është masë adekuate sepse nëse i pandehuri lihet në liri, ekziston rreziku i ikjes, mund t’i shmanget procedurës penale dhe se i njëjti do të jetë i pakapshëm për organet e drejtësisë, duke qenë se ai dyshohet për vepër penale të një rrezikshmërie shumë të lartë, transmeton albinfo.ch.
Bëhet e ditur se Gjykata Themelore ka vlerësuar që nëse i pandehuri lihet në liri, i njëjti mund të ndikojë në prova dhe në dëshmitarë si dhe mund të përsërisë veprën e njëjtë penale ose mund të kryejë sërish vepra tjera penale në rrethana të njëjta ose më të rënda, thuhet në njoftimin e gjykatës.
Olympique de Marseille po kërkon ta forcojë skuadrën e saj gjatë afatit kalimtar të verës, përcjell albinfo.ch.
Dhe, mediat franceze raportojnë se klubi francez ia ka vënë syrin futbollistit kosovar, Edon Zhegrova.
Mirëpo, analisti i mediumit “RMC”, Kevin Diaz e sheh si një transferim të rrezikshëm dhe shumë të komplikuar pasi 26-vjeçarin e sheh si një djalë të vështirë.
Përfaqësuesi kosovar e kaloi një pjesë të parë fantastike të sezonit të fundit, por më pas e pësoi një lëndim i cili e la jashtë fushës së blertë në krejt pjesën e dytë të edicionit 2025/25.
Përpos gjendjes së tij fizike, është karakteri i tij që ngre pikëpyetje.
“Ai është një djalë i vështirë. Është shumë i vështirë për t’u menaxhuar”, deklaroi Diaz.
Sipas tij, kjo paqëndrueshmëri emocionale mund ta përfaqësojë një pengesë të madhe për integrimin e tij në Marseille.
“Pavarësisht potencialit të tij të pamohueshëm, transferimi i Edon Zhegrovës duket shumë i rrezikshëm për Marseillen.
Temperamenti i tij i vështirë dhe mungesa e pjekurisë mund ta prishin ekuilibrin e ekipit të Marseilles. Nëse nuk ka një ndryshim rrënjësor në sjellje, ky transferim mund të shmanget nga Marseille”, shkruan mediumi francez “Score”.
Lille e vlerëson ish-futbollistin e Baselit 20 milionë euro, ndërsa ai ka kontratë me klubin francez edhe një vit.
Vlera në treg e Zhegrovës sipas Transfermarkt është 25 milionë euro.
Interesim për të kanë shfaqur edhe klubet angleze, Nottingham Forest dhe Newcastle United.
Ndërsa, në Itali qe një kohë e pëlqejnë Napoli, Milani dhe Atalanta.
Ndërkaq, në Turqi e pëlqen Fenerbahçe.
Shkaku i lëndimit, Zhegrova nuk ka luajtur që nga 14 dhjetori dhe ky fakt i ka trembur paksa ekipet e interesuara, të cilat thuhet se gjithnjë e më shumë po largohen prej tij.
Prishtinasi i kishte zhvilluar 21 ndeshje dhe i kishte realizuar 8 gola, ndërkohë që i kishte bërë edhe 2 asistime në pjesën e parë të sezonit.
Përfaqësuesi kosovar i ishte bashkuar Lillet nga Baseli në vitin 2022, ndërsa ka hyrë në vitin e fundit të kontratës së tij.
Bashkimi Evropian ka miratuar paketën e 18-të të sanksioneve kundër Rusisë, në një përpjekje të re për të intensifikuar presionin ekonomik ndaj Kremlinit për shkak të agresionit të vazhdueshëm në Ukrainë, përcjell albinfo.ch.
Lajmi u konfirmua nga shefja e diplomacisë së BE-së, Kaja Kallas.
Për herë të parë që nga fillimi i masave ndëshkuese, BE ka vendosur një ulje të çmimit tavan për naftën ruse, duke e zbritur në 47.6 dollarë për fuçi, një përpjekje kjo për të reduktuar më tej të ardhurat ruse nga eksportet energjetike.
Paketa e re përfshin gjithashtu edhe sanksione ndaj 22 bankave ruse, të cilat luajnë rol kyç në financimin e luftës; kufizime ndaj disa bankave kineze, të cilat janë identifikuar si mbështetëse të operacioneve financiare të Rusisë; masa ndëshkuese ndaj rafinerisë së Rosneft-it në Indi, një pikë kyçe për përpunimin e naftës ruse dhe veprime kundër gazsjellësve Nord Stream dhe Nord Stream 2, të cilët mbeten simbole të varësisë energjetike të dikurshme të Evropës ndaj Rusisë
Sipas zyrtarëve të BE-së, paketa e re fokusohet gjithashtu në “mbylljen e skemave të errëta” dhe në ndalimin e bashkëpunëtorëve ndërkombëtarë që ndihmojnë Rusinë të anashkalojë sanksionet.
“Pa këto rrugë të dyta, ekonomia ruse do të fillojë të mbytet më shpejt,” thuhet në deklaratën zyrtare nga Brukseli.
Ndryshe, paketa e re me sanksione ndaj shtetit rus pritet të hyjë në fuqi brenda javës.
Baritoni i njohur shqiptar, Gëzim Myshketa, ka shënuar një tjetër moment të rëndësishëm në karrierën e tij ndërkombëtare, duke debutuar në një nga skenat më prestigjioze të Evropës – “Teatro Real” të Madridit, përcjell albinfo.ch.
Mbrëmjen e djeshme, Myshketa u ngjit në skenën madrilene me operën klasike “La Traviata” të Giuseppe Verdit, duke marrë duartrokitjet e publikut për interpretimin e tij të fuqishëm dhe të ndjeshëm. Por suksesi nuk ndalet këtu: baritoni shqiptar do të rikthehet edhe në datat 20 dhe 23 korrik për të njëjtën shfaqje.
Ajo që e bën edhe më të veçantë këtë prezantim është fakti se Myshketa ndan skenën me emra të njohur të botës së operës, si sopranoja Nadine Sierra, tenori Diego Flórez dhe Xabier Anduaga – artistë që sot janë në majat e skenës ndërkombëtare operistike.
“La Traviata” në Teatro Real realizohet me përfshirjen e plotë të korit dhe orkestrës së këtij institucioni të njohur, ndërsa dirigjimin e mban mjeshtri Henrik Nánási.
Gëzim Myshketa është një nga zërat më të spikatur shqiptarë në muzikën klasike, me një karrierë të konsoliduar në teatro të ndryshme të Evropës. Përveç angazhimeve ndërkombëtare, ai është rikthyer vazhdimisht për të performuar në Shqipëri dhe Kosovë, duke ruajtur lidhjen e ngushtë me publikun dhe rrënjët e tij.
Debutimi i tij në Madrid është një tjetër dëshmi e nivelit të lartë artistik që ai përfaqëson dhe një moment krenarie për muzikën shqiptare në arenën ndërkombëtare.
Kur refugjatët nga Ukraina filluan të mbërrinin në Zvicër më shumë se tre vjet më parë, statusi i mbrojtjes ‘S’ — që u lejonte atyre të qëndronin në Zvicër — u aktivizua shpejt.
Rreth 70,000 prej tyre aktualisht jetojnë në Zvicër, përcjell albinfo.ch.
Tani, sipas një mocioni të miratuar nga parlamenti, nuk mund të jetë më kështu.
“Për momentin, statusi S është de facto një lëvizje e lirë e personave nga Ukraina, direkt në shtetin zviceran të mirëqenies. Kjo nuk është e drejtë për popullsinë tonë”, tha autori i mocionit, deputeti Pascal Schmid nga Partia Popullore Zvicerane.
Prandaj, ai propozoi që qeveria të përcaktojë se cilat zona të Ukrainës janë aktualisht në luftë me Rusinë dhe cilat jo, përpara se t’i japë të drejtën e qëndrimit në Zvicër pa dallim çdo refugjati që vjen.
Këshilli Federal nuk dëshiron të rendisë ‘zonat e sigurta’, në mënyrë që Zvicra të mund të “veprojë në mënyrë fleksibile”.
Megjithatë, Sekretariati Shtetëror për Migracionin (SEM) do të “shqyrtojë çdo kërkesë për mbrojtje rast pas rasti dhe do të përcaktojë nëse personi në fjalë është në rrezik të një kërcënimi konkret për jetën ose gjymtyrët në zonën e tij të origjinës. Diferencimi rajonal pritet të rezultojë në rritje të përpjekjeve për shqyrtim gjatë shqyrtimit të kërkesave për mbrojtje.”
Duke ndjekur shembullin e dhënë nga dy qytete të tjera zvicerane – Porrentruy në Jura dhe Bazel – ku të huajve u ndalohet të përdorin pishinën e tyre publike, komuna e Mendrisio-s në Ticino gjithashtu dëshiron të zbatojë një kufizim të tillë në orët e pikut, përcjell albinfo.ch.
Duke pasur parasysh mbipopullimin e plazhit lokal gjatë fundjavave, politikani lokal Massimiliano Robbiani, së bashku me dy zyrtarë të tjerë të zgjedhur, ka paraqitur një mocion parlamentar duke kërkuar që objekti i notit i qytetit të jetë i hapur vetëm për vendasit gjatë fundjavave dhe në festat zyrtare.
“Nuk është e drejtë që ata që jetojnë dhe paguajnë taksa këtu të mos jenë në gjendje të gjejnë një vend”, thuhet në mocion.
Njerëzit nga Italia fqinje fajësohen veçanërisht për mbipopullimin e objektit.
Artisti i njohur ndërkombëtarisht, Petrit Halilaj, do të prezantohet me ekspozitën e tij më të re, “Syrigana”, në njërin nga institucionet më prestigjioze të artit bashkëkohor në Evropë – Hamburger Bahnhof, në Berlin, shkruan albinfo.at.
Kjo ekspozitë do të hapet në muajin shtator dhe pritet të sjellë për publikun gjerman dhe ndërkombëtar një përjetim të veçantë artistik, i frymëzuar nga kujtimet, rrënjët dhe tregimet nga Runiku i Kosovës, vendlindja e Halilajt.
Lajmin për këtë ngjarje kulturore e ka ndarë ambasadori i Republikës së Kosovës në Gjermani, Faruk Ajeti, përmes një postimi në rrjetet sociale. Ai ka theksuar se “Syrigana” është më shumë se një ekspozitë – është një tregim i gjallë që lidh kulturën shqiptare me skenën ndërkombëtare të artit.
Petrit Halilaj, i njohur për qasjen e tij unike dhe gjuhën artistike që përzien biografinë personale me historinë kolektive, vazhdon të jetë një zë i fuqishëm i artit bashkëkohor, duke përfaqësuar denjësisht kulturën shqiptare në botë.
Ekspozita në Berlin pritet të zgjojë interes të madh dhe të jetë një nga ngjarjet më të spikatura të sezonit artistik vjeshtor në kryeqytetin gjerman. /Albinfo.at
Mesfushori i talentuar i Kosovës, Art Smakaj, ka bërë hapin e radhës në karrierën e tij duke u transferuar nga Lokomotiva Zagreb te klubi austriak LASK Linz. Lajmi është bërë i ditur nga vetë klubi i Bundesligës austriake, i cili e ka konfirmuar zyrtarisht afrimin e 22-vjeçarit, shkruan albinfo.at.
Sipas njoftimit të LASK-ut, Smakaj ka firmosur kontratë deri në verën e vitit 2028, ndërsa vlera e transferimit raportohet të jetë rreth 700 mijë euro.
“Reprezentuesi i Kosovës, Art Smakaj, do të veshë fanellën e LASK-ut në të ardhmen”, thuhet në komunikatën e klubit nga Linzi, i cili aktualisht garon në elitën e futbollit austriak dhe synon të forcojë radhët për sezonin e ri.
Ky transferim e sjell Smakajn në të njëjtin klub me një tjetër emër të njohur kosovar – Valon Berishën, i cili prej kohësh është pjesë e LASK-ut dhe një nga figurat kyçe të ekipit.
Me këtë lëvizje, Smakaj jo vetëm që përforcon pozitën e tij në arenën ndërkombëtare, por gjithashtu pasuron prezencën e futbollistëve shqiptarë në kampionatin austriak. /Albinfo.ch
Bëhet e ditur se sot në Aeroportin Ndërkombëtar të Prishtinës, Njësiti për Menaxhimin e Urdhëresave të stacionit të Podujevës, ka realizuar pranimin e një personi të kërkuar me dy urdhëresa aktive të gjykatës, për veprën penale “Vjedhje e rëndë”, transmeton albinfo.at.
Thuhet se i kërkuari është ekstraduar në Kosovë,sot rreth orës 01:00, në bashkëpunim me autoritetet austriake dhe ato vendore.
Menjëherë pas pranimit, ai është dërguar për vuajtje të dënimit (1 vit e 6 muaj).
Policia e Kosovës vazhdon angazhimin për zbatimin e ligjit dhe sjelljen para drejtësisë të personave të shpallur në kërkim. /Albinfo.at
Ndeshjet interesante po vazhdojnë në Kampionatin Evropian të Futbollit të Femrave në Zvicër.
Pas Italisë dhe Anglisë që siguruan kualifikimin në gjysmëfinale, sonte një gjë të tillë e kërkojnë edhe Spanja-Zvicra, që është në program sonte nga ora 21:00, shkruan albinfo.ch.
Favorite është Spanja, për shkak të cilësisë dhe përvojës, derisa Zvicra ka përkrahjen nga publiku.
Kjo është hera e parë që Zvicra u kualifikua në gjysmëfinale, e pikërisht hera e parë që Zvicra organizon një Evropian.
Riola Xhemali luan për Zvicrën, që me golin e saj në barazimin 1:1 ndaj Finlandës dërgoi Natin në mesin e tetë më të mirave.
Deri më tani ka qenë festival i futbollit me shumë shikues e pa incidente.
Mësohet se një ekip arkeologësh nga Zvicra dhe Shqipëria, të cilët punojnë në brigjet e Liqenit të Ohrit, kanë zbuluar vendbanimin më të vjetër njerëzor të ndërtuar në një liqen evropian, përcjell albinfo.ch.
Reuters shkruan se ata kanë gjetur prova të një komuniteti të organizuar gjuetie dhe bujqësor që ka jetuar deri në 8,000 vjet më parë.
Ekipi i arkeologëve kanë gjetur shtylla druri të cilat janë përdorur për të mbajtur shtëpitë, eshtra kafshëshg shtëpiake dhe të egra, si edhe objekte bakri e qeramike me gdhendje të detajuara.
Albert Hafner, nga Universiteti i Bernës, tha se vendbanime të ngjashme janë gjetur në rajonet alpine dhe mesdhetare, por vendbanimet në fshatin Lin janë gjysmë mijëvjeçari më të vjetra, duke datuar midis 6,000 dhe 8,000 vjet më parë.
“Meqenëse është nën ujë, materiali organik është i ruajtur mirë dhe kjo na lejon të zbulojmë se çfarë kanë ngrënë këta njerëz, çfarë kanë mbjellë”, tha Hafner.
Studime të shumta tregojnë se Liqeni i Ohrit, i ndarë nga Maqedonia e Veriut dhe Shqipëria, është liqeni më i vjetër në Evropë, me mbi një milion vjet jetë.
Mosha e gjetjeve përcaktohet nëpërmjet datimit me radiokarbon dhe dendrokronologjisë, e cila mat unazat vjetore të rritjes në pemë. Më shumë se një mijë mostra druri janë mbledhur nga vendi, i cili mund të ketë strehuar disa qindra njerëz.
Besohet se mbulon rreth gjashtë hektarë, por deri më tani, vetëm rreth 1% është gërmuar pas gjashtë vitesh pune.
Hafner tha se gjetjet tregojnë se njerëzit që jetonin në liqen ndihmuan në përhapjen e bujqësisë dhe bagëtive në pjesë të tjera të Evropës.
“Ata ende merreshin me gjueti dhe mbledhje gjërash, por të ardhurat e qëndrueshme për ushqimin vinin nga bujqësia”, tha ai.
Arkeologu shqiptar Adrian Anastasi tha se mund të duhen dekada për të eksploruar plotësisht zonën.
“(Nga) mënyra se si kishin jetuar, ngrënë, gjuajtur, peshkuar dhe nga mënyra se si arkitektura ishte përdorur për të ndërtuar vendbanimin e tyre, mund të themi se ishin shumë të zgjuar për atë kohë”, tha Anastasi.
Është spitexi i parë shqiptar në Zvicër. Spitex BajRonshtë themeluar në vitin 2012. Sot, pas më shumë se një dekade përvojë, Spitex BajRon Ag operon me licencë të plotë në 13 kantone zvicerane, përfshirë: Zürich, Aargau, Solothurn, St. Gallen, Bern, Luzern, Schaffhausen, Schwyz, Basel-Landschaft, Basel-Stadt, Nidwalden, Obwalden dhe Zug. Themeluesi dhe drejtuesi, Nijat Bajrami flet për Albinfo.ch lidhur me shërbimet që ofron ky spitex dhe tregon për arritjet e tij të deritashme.
Themeluesi dhe drejtuesi, Nijat Bajrami
Albinfo.ch: Prej kur operon Spitex-i juaj dhe në cilat kantone?
Nijat Bajrami: Spitex BajRon AG është themeluar në vitin 2012 me një qëllim të qartë: të ofrojë kujdes profesional dhe të ndjeshëm ndaj nevojave kulturore të komunitetit shqiptar në Zvicër. Si pionierë në këtë sektor, jemi krenarë që jemi Spitex-i i parë shqiptar në Zvicër. Sot, pas më shumë se një dekade përvojë, operojmë me licencë të plotë në 13 kantone zvicerane, përfshirë: Zürich, Aargau, Solothurn, St. Gallen, Bern, Luzern, Schaffhausen, Schwyz, Basel-Landschaft, Basel-Stadt, Nidwalden, Obwalden dhe Zug. Jemi krenarë që kemi ndërtuar një rrjet të qëndrueshëm që ofron kujdes cilësor, të besueshëm dhe të përshtatur me nevojat e komunitetit. Ne nuk jemi thjesht duke zgjeruar shërbimet tona, por jemi duke ndërtuar besim, lidhje njerëzore dhe kujdes të vërtetë për secilin pacient.
Albinfo.ch: Çfarë e bën Spitex-in tuaj të veçantë krahasuar me të tjerët?
Nijat Bajrami: Ne dallojmë për shkak të qasjes sonë gjithëpërfshirëse, ku përveç përkujdesjes shëndetësore profesionale, flasim shqip, kuptojmë kontekstin kulturor të pacientëve tanë dhe ndërtojmë besim të dyanshëm. Gjithashtu, Spitex BajRon është më shumë se një ofrues shërbimesh; është një platformë edukimi dhe zhvillimi profesional. Ne ofrojmë shkollim të akredituar në të gjithë Zvicrën në drejtimin e asistencës në infermieri (Pflegehelferin/Pflegehelfer), duke përgatitur me sukses dhjetëra nxënës çdo vit për tregun zviceran të punës. Në të ardhmen, synojmë të zgjerojmë ofertën tonë arsimore me trajnimin modern SVEB 1, program që certifikon edukatorë në fusha të ndryshme dhe kontribuon drejtpërdrejt në rritjen e cilësisë së arsimit profesional në Zvicër.
Albinfo.ch: A keni ndonjë plan për të zgjeruar shërbimet në të ardhmen?
Nijat Bajrami: Po, absolutisht. Vizioni ynë është gjithmonë i orientuar drejt së ardhmes. Aktualisht, kemi nisur me sukses zhvillimin e një Spitex-i psikiatrik të specializuar për fëmijë dhe të rinj në kantonet St. Gallen dhe Bernë, duke iu përgjigjur konkretisht rritjes së nevojave për shërbime të shëndetit mendor tek kjo grupmoshë e ndjeshme.
Në të njëjtën kohë, jemi në proces të zhvillimit të qendrave ditore për kujdes afatshkurtër dhe të projekteve ndërdisiplinare, në partneritet me institucione publike dhe komunale, me qëllim ofrimin e mbështetjes gjithëpërfshirëse në çdo fazë të jetës.
Një tjetër risi që na veçon është ofrimi i platformave profesionale për Spitex-e të tjera: koncepte të gatshme, të testuara në praktikë, që ndihmojnë organizatat të rrisin cilësinë, të kursejnë kohë dhe të operojnë me më shumë efikasitet.
Qëllimi ynë është i qartë. Të jemi jo vetëm ofrues kujdesi, por edhe forcë shtytëse zhvillimi dhe inovacioni në fushën e Spitex-it në Zvicër.
Albinfo.ch: Sa punonjës i keni përafërsisht dhe çfarë kualifikimesh profesionale kanë?
Nijat Bajrami: Stafi ynë përbëhet nga profesionistë të kualifikuar dhe të përkushtuar, të cilët punojnë në ekipe rajonale të strukturuara mirë, duke garantuar një standard të lartë kujdesi në të gjitha kantonet ku operojmë.
Ajo që na veçon është ndërthurja e kompetencës profesionale me ndjeshmërinë kulturore. Shumë prej punonjësve tanë janë shumëgjuhësh dhe vijnë nga komuniteti shqiptar, një aset i çmuar që krijon afërsi, besim dhe kuptim të thellë me pacientët tanë.
Stafi ynë sjell një përvojë të gjerë dhe perspektiva ndërkulturore, që na mundësojnë të ofrojmë kujdes të personalizuar dhe të ndjeshëm ndaj nevojave të secilit individ.
Albinfo.ch: Cilat ishin sfidat më të mëdha që hasët kur e nisët këtë rrugëtim?
Nijat Bajrami: Çdo fillim mbart me vete barrën e së panjohurës, dhe për ne, rrugëtimi nisi me sfida të shumta, por edhe me një vizion të qartë. Ishte një sfidë e madhe të fitoje besimin institucional, të përmbushje kriteret e rrepta për licencimin zviceran dhe të ndërtoje nga e para një strukturë të qëndrueshme, si në aspektin organizativ, ashtu edhe në atë financiar.
Një sfidë tjetër e rëndësishme ishte perceptimi brenda vetë komunitetit shqiptar: kujdesi në shtëpi shpesh shihej si shenjë dobësie apo pamundësie, një tabu që kërkonte qasje të kujdesshme, dialog dhe respekt të ndërsjellë për ta kapërcyer. Pikërisht këtu vendosëm theksin tonë. Përmes informimit të vazhdueshëm, kujdesit me dinjitet dhe qasjes kulturore të ndjeshme, arritëm jo vetëm ta ndryshojmë këtë mendësi, por edhe ta kthejmë kujdesin në shtëpi në një zgjedhje të ndërgjegjshme dhe dinjitoze për shumë familje.
Albinfo.ch: Cili ishte reagimi i parë nga pacientët dhe komuniteti, sidomos te komuniteti shqiptar?
Nijat Bajrami: Në fillim pati një dozë natyrale ngurrimi, siç ndodh me çdo risi që sfidon normat dhe sjell diçka të re në një fushë delikate si kujdesi shëndetësor. Megjithatë, me kalimin e kohës, përmes shërbimit me profesionalizëm, respekt dhe ndjeshmëri kulturore, komuniteti shqiptar jo vetëm që e pranoi modelin tonë, por e përqafoi me zemër të hapur.
Sot, një numër i madh i pacientëve na vijnë përmes rekomandimeve nga familjarë, miq apo mjekë, sepse vlerësojnë faktin që dikush i dëgjon në gjuhën e tyre, i kupton thellësisht dhe i trajton me respekt e pa paragjykim.
Dua të theksoj se Spitex BajRon nuk është vetëm për shqiptarët. Klientela jonë është e larmishme dhe ndërkulturore, duke reflektuar shoqërinë zvicerane. Ne i shërbejmë të gjithëve me përkushtim dhe zemërhapur çdo ditë.
Albinfo.ch: Si i menaxhoni sfidat e stafit dhe organizimit të shërbimeve? Nijat Bajrami: Te Spitex BajRon besojmë se një kujdes i shkëlqyer ndaj pacientëve fillon me një kulturë pune të shëndetshme dhe mbështetëse për stafin. Prandaj kemi investuar në mënyrë të qëndrueshme në strukturë, teknologji dhe zhvillim njerëzor.
Përdorim sisteme digjitale moderne për dokumentim (Nexus, SDoku), trajnim, shkollim (Careprocess), si dhe planifikim (si Nexus), të cilat lehtësojnë rrjedhën e punës dhe i japin stafit më shumë kohë për atë që ka më shumë rëndësi: kujdesin ndaj pacientit.
Në Spitex BajRon besojmë se investimi në trajnime të rregullta, supervizim profesional dhe në kulturë të komunikimit të hapur është çelësi për një shërbim cilësor dhe ekip të motivuar.
Në secilin rajon kemi një udhëheqës të përgjegjshëm dhe një ekip rezervë të përgatitur që garanton vazhdimësinë e shërbimit dhe mbështet stafin ekzistues në rast mungesash apo ngarkese.
Në BajRon nuk je thjesht një numër në orar. Je pjesë e një vizioni, një familjeje profesionale që të dëgjon, të vlerëson dhe të mbështet në rritjen tënde, thotë Semra Ajeti, përgjegjëse për Kantonin e St. Gallen. Pikërisht kjo qasje njerëzore është arsyeja pse shumë profesionistë jo vetëm që punojnë me ne, por zgjedhin të qëndrojnë dhe të zhvillohen bashkë me ne.
Albinfo.ch: A ka pasur ndonjë histori të veçantë me pacientët që ju ka prekur më shumë? Nijat Bajrami: Ka shumë, por ndër rastet me ndikim të thellë veçohet ai i një burri të moshuar shqiptar, i cili jetonte në izolim dhe përjetonte depresion të thellë. Nëpërmjet ndërhyrjes sonë multidisiplinare dhe përfshirjes së një profesionisti të shëndetit mendor, ai rifitoi dëshirën për jetë dhe u rikthye në aktivitetet e përditshme. Ky rast është dëshmi e drejtpërdrejtë e ndikimit transformues që mund të ketë kujdesi gjithëpërfshirës.
Gjithashtu dua të përmend një rast prekës. Një pacient na kërkoi që të mbetej në shtëpinë e tij deri në ditën e fundit të jetës. Përmes përkujdesjes sonë profesionale dhe përkushtimit të ekipit, ai ndërroi jetë në shtëpinë e tij, në rrethin e ngrohtë të familjes. Para se të largohej, më tha: “Faleminderit për gjithçka.” Ky moment më forcoi bindjen se çdo njeri meriton të jetojë dhe të largohet me dinjitet në vendin që ndjehet më mirë , në shtëpi.
Albinfo.ch: Çka do t’u thoshit shqiptarëve që kanë nevojë për shërbimin tuaj, por nuk e shfrytëzojnë atë? Nijat Bajrami: Mos e shtyni kërkesën për ndihmë. Spitex është për të gjithë: për të rinjtë, për nënat pas lindjes, për të sëmurët kronikë, për nevoja afatshkurtra apo për situata të papritura. Ne flasim shqip, ju mbështesim me dokumentacionin dhe bashkëpunojmë ngushtë me mjekun tuaj.
Na kontaktoni për të mësuar më shumë mbi të drejtat tuaja: [email protected] ose www.bajron.ch Për shembull: Kur keni të drejtë për përfitime plotësuese (Ergänzungsleistungen), kompensim për personat e pafuqishëm (Hilflosenentschädigung), kontribut për asistencë (Assistenzbeitrag) dhe shumë çështje të tjera që mund të kenë ndikim të drejtpërdrejtë në cilësinë e jetës suaj, si kur keni fëmijë apo familjarë të hendikepuar ose me të meta psikike.
Albinfo.ch: A ofroni mbështetje për kujdestarët familjarë? Nijat Bajrami: Po. Ne ofrojmë këshillim profesional, trajnime praktike dhe udhëzime konkrete për përkujdesje. Gjithashtu ndihmojmë në orientimin dhe plotësimin e formularëve për përfitime, duke përfshirë: kujdesin e financuar nga përfitimet plotësuese (Ergänzungsleistungen), kompensimin për humbje të aftësisë për punë (IV), ndihmë për vetë-menaxhim të rastit dhe lehtësim emocional për familjarët.
Albinfo.ch: A keni punonjës shqiptarë? Nijat Bajrami: Po, dhe jemi shumë krenarë për ta. Ata janë një shtyllë themelore e suksesit tonë dhe krijojnë një urë të fuqishme besimi me komunitetin shqiptar. Por, sigurisht, ekipi ynë është ndërkombëtar dhe i hapur për të gjitha kulturat.
Albinfo.ch: Çfarë duhet të dinë bashkatdhetarët tanë lidhur me
Albinfo.ch: Shërbimet e Spitex-it? Nijat Bajrami: Spitex nuk është vetëm për të moshuarit. Ai është për këdo që ka nevojë për ndihmë në jetën e përditshme, kujdes shëndetësor pas një sëmundjeje apo operacioni, përkrahje në rehabilitim apo mbështetje psikologjike. Këto shërbime mbulohen nga sigurimi shëndetësor nëse ekziston një urdhër mjekësor.
Albinfo.ch: Si e siguroni cilësinë e shërbimit dhe kënaqësinë e pacientëve? Nijat Bajrami: Kemi një sistem të strukturuar të kontrollit të cilësisë, protokolle të standardizuara, vlerësime të rregullta dhe trajnime të vazhdueshme. Çdo reagim nga pacientët merret seriozisht dhe përdoret për përmirësim të vazhdueshëm.
Albinfo.ch: Ku e shihni Spitex-in tuaj pas 5–10 vitesh? Nijat Bajrami: Ne nuk e shohim Spitex BajRon thjesht si një institucion shëndetësor, por si një forcë lëvizëse në sistemin e kujdesit në Zvicër. Brenda pesë deri në dhjetë vjet, synojmë të jemi një nga Spitex-et më të avancuara dhe më të integruara në nivel kombëtar, duke krijuar standarde të reja në kujdesin individual, ndërkulturor dhe gjithëpërfshirës.
Në fokus do të jenë:
Qendrat për trajtim multidisiplinar, ku mjekësia, psikiatria, terapitë dhe përkujdesja bashkëpunojnë për mirëqenien e plotë të individit
Akademia BajRon, një hapësirë edukimi profesional me programe të akredituara që formojnë brezat e ardhshëm të infermierëve, asistentëve dhe edukatorëve shëndetësorë
Qasja inovative në kujdesin psikologjik dhe social, veçanërisht për fëmijë, të rinj dhe familje me sfida të mëdha.
Por mbi të gjitha, do të jemi model suksesi në mënyrën si ndërthurim cilësinë teknike me ndjeshmërinë njerëzore dhe kulturore. Një vend ku pacientët ndihen të dëgjuar dhe profesionistët e shëndetit ndihen të vlerësuar.
Dua të falënderoj nga zemra gjithë stafin e BajRon AG, nga udhëheqësit deri te ata që punojnë në heshtje e pa u dukur. Ju bëni një punë me dinjitet dhe përkushtim çdo ditë.
Motoja jonë: Kujdes me zemër , aty ku jeta vazhdon: në shtëpinë tuaj.
Vizioni ynë: Të ndërtojmë një sistem përkujdesjeje që e vendos njeriun në qendër, me të gjitha dimensionet e tij: trupin, mendjen dhe shpirtin. Ne besojmë se çdo njeri meriton të jetojë dhe të plakët me dinjitet, aty ku ndihet më i sigurt, më i qetë dhe më i vetja. Spitex BajRon nuk ofron vetëm kujdes, por edhe praninë, ngrohtësinë dhe respektin që çdo njeri meriton.
Kanë mbetur edhe 50 ditë deri te ndeshja mes Zvicrës dhe Kosovës, e vlefshme për kualifikimet e Kupës së Botës 2026 në futboll.
Federata zvicerane e Futbollit ka përkujtuar që ndeshja është pas 50 ditësh dhe në të njëjtën kohë ka njoftuar se biletat dalin në shitje prej 31 korrikut, transmeton albinfo.ch.
Ndeshja do të zhvillohet në “St Jakob-Park” në Basel, më 5 shtator nga ora 20:45.
Stadiumi pritet të mbushet me shikues, ndërsa përkrahja për Kosovën besohet se do të jetë e madhe, për shkak të numrit të madh të shqiptarëve që jetojnë në Zvicër.
Shitja e biletave do të bëhet përmes faqes së internetit “ticketmaster.ch”.
Në grup me Kosovën dhe Zvicrën janë edhe Suedia dhe Sllovenia. Më 8 shtator, Kosova luan me Suedinë, ndërsa Zvicra e pret Slloveninë.
Një nga figurat më të njohura në botën e sporteve ekstreme, austriaku Felix Baumgartner, ka humbur jetën në një aksident tragjik të ndodhur në Porto Sant’Elpidio, Itali. Ngjarja e rëndë ka ndodhur rreth orës 16:00 të pasdites në një strukturë turistike përgjatë bregdetit të Fermos, përcjell albinfo.ch.
Baumgartner, 56 vjeç, i njohur globalisht për hedhjet e tij spektakolare nga lartësi ekstreme, dyshohet se ka pësuar një problem shëndetësor gjatë fluturimit, duke humbur kontrollin e mjetit të tij fluturues dhe përfunduar në një pishinë brenda kompleksit turistik. Në momentin e rrëzimit, ai ka goditur edhe një vajzë e cila ndodhej aty pranë, por fatmirësisht ajo nuk është në rrezik për jetën.
Sipas informacioneve paraprake, Baumgartner kishte ndërruar jetë para përplasjes me tokën. Autoritetet italiane po hetojnë shkaqet e sakta të aksidentit, ndërsa pista kryesore mbetet një ndërlikim shëndetësor gjatë fluturimit, megjithatë nuk përjashtohen as probleme teknike apo rrethana të tjera të paparashikuara.
I lindur në Salzburg në vitin 1969, Baumgartner hyri në histori në vitin 2012 me hedhjen nga stratosfera, një arritje që theu tre rekorde botërore dhe mahniti opinionin publik ndërkombëtar. Ai ishte gjithashtu i njohur për hedhjet nga grataçiela, ura dhe shkëmbinj të thepisur, duke u kthyer në një ikonë për komunitetin e sporteve ekstreme.
Pas tërheqjes nga skena mediatike, Baumgartner kishte zgjedhur të vazhdonte pasionin e tij për fluturimet dhe sportet ajrore, shpeshherë larg vëmendjes së publikut.
Lajmi i vdekjes së tij ka shkaktuar tronditje dhe dhimbje të thellë në komunitetin ndërkombëtar të adhuruesve të sporteve ekstreme dhe më gjerë.
Quhet “Forca e Re Kombëtare”, është subjekti më i ri politik i formuar në Kosovë nga Ferid Agani, përcjell albinfo.ch.
Përmes një komunikate për media, ata kanë njoftuar se më 14 dhe 17 Korrik, u mbajt mbledhja konstitutive e Këshillit Organizativ të nismës politike konservatore “Forca e Re Kombëtare”, si hap i rëndësishëm drejt themelimit të subjektit të ri politik që synon të sjellë frymë të re të përfaqësimit qytetar, identitar, moral dhe kombëtar në skenën politike të Kosovës.
“Mbledhja u zhvillua në atmosferë serioze dhe përbashkuese, ku morën pjesë themeluesit e nismës, personalitete me përvojë në jetën publike, akademike dhe politike, si dhe përfaqësues nga qytetarë të interesuar për një alternativë politike me vlera të qarta etike, kulturore dhe shtetformuese”, thuhet në njoftimin e tyre.
Është ndërprerë seanca seanca gjyqësore për rastin “Banjska” ndaj të akuzuarve Blagoje Spasojeviq, Vladimir Toliq dhe Dushan Maksimoviq, për shkak se dëshmitari nuk ka qenë prezent.
Kryetari i trupit gjykues ka thënë se sot, 18 korrik, ka qenë i planifikuar të dëgjohet një dëshmitar i propozuar nga Prokuroria, mirëpo se ai nuk ka pasur mundësi të jetë i pranishëm në këtë seancë, përcjell albinfo.ch.
Lidhur me sulmin terrorist në Banjskë, Prokuroria Speciale ka ngritur aktakuzë ndaj 45 të pandehurve – Millan Radoiçiq, Bllagoje Spasojeviq, Vlladimir Tolliq, Dushan Maksimoviq, Vlladimir Radivojeviq, Uglesa Jarediq, Millorad Jevtiq, Vllastimir Andriq, Aleksandar Millosavleviq, Llazar Smigiq, Velko Gjorgjeviq, Vlladimir Vuçetiq, Stefan Jovanoviq, Millovan Kërstoviq, Urosh Milliq, Trajko Vasiq, Danillo Vasiq, Vukashin Jarediq, Sasha Periq, Nemanja Stankoviq, Momçillo Vuçkoviq, Stefan Radojkoviq, Marjan Radojeviq, Marko Arsiq, Zharko Cvetkoviq, Kërsto Damjanoviq, Stefan Millosavleviq, Marko Saviq, Aleksandar Jevremoviq, Radosh Gvozdiq, Ivan Milliq, Gojko Zubaq, Nemanja Radivojeviq, Radak Adziq, Milosh Millenkoviq, Gjorgje Balloviq, Danijell Dukiq, Danillo Virijeviq, Alleksandar Tanaskoviq, Millosh Kragoviq, Milan Nedeljkoviq, Nikolla Illiq dhe Vladan Illiq.
Aktakuza i ngarkon ata me vepra terroriste dhe vepra kundër rendit kushtetues dhe sigurisë së Kosovës. Në aktakuzë thuhet se ky grup, nëpërmjet përdorimit të dhunës me armatim të rëndë, ka tentuar që “ta shkëpusë pjesën veriore të territorit të Republikës së Kosovës, respektivisht komunat e banuara me shumicë serbe, dhe këtë pjesë të territorit t’ia bashkojë Republikës së Serbisë”. Si lider i këtij grupi është identifikuar Radoiçiqi, për të cilin thuhet se ka luajtur rol të rëndësishëm në koordinimin e sulmit dhe aktivitetet kriminale. Radoiçiqi gjendet në listën e zezë të Shteteve të Bashkuara dhe të Mbretërisë së Bashkuar për lidhjet me krimin e organizuar ndërkombëtar dhe korrupsionin.
Në Kosovë, ai, gjithashtu, dyshohet se ka gisht ne vrasjen e politikanit opozitar serb, Oliver Ivanoviq, si dhe në frikësimin e dëshmitarëve në një proces gjyqësor për disa ndërtime ilegale.
Në aktakuzë, Prokuroria përmend 34 dosje me prova, në mesin e të cilave ka video-incizime, analiza të pajisjeve elektronike, përgjigje të ndryshme nga Luksemburgu, Bosnjë-Hercegovina, bankat dhe institucione të ndryshme, deklarata të dëshmitarëve etj.
Autoritetet në Kosovës e kanë kualifikuar sulmin në Banjskë si akt terrorist dhe e kanë akuzuar Serbinë se qëndron prapa tij.
Për ish-nënkryetarin e Listës Serbe, Milan Radoiçiq, dhe 40 të akuzuarit e tjerë ka fletarrest ndërkombëtar, pasi ndodhen në arrati.
Suedia po fitonte 2:0 ndaj Anglisë në çerekfinale, por dy gola të shpejt nga anglezet dërguan ndeshjen në penallti, ku anglezet u kualifikuan në gjysmëfinale, shkruan albinfo.ch.
Golin e parë për Suedinë e shënoi Kosovare Asllani, që në minutën e dytë.
Ky ishte goli i dytë i futbollistes shqiptare, e cila kishte edhe tri asistime.
“Nuk e di se çfarë ndodhi”, ka thënë pas ndeshjes për UEFA.com.
“Ne ishim duke fituar dhe krijuam disa raste. Ndihem shumë bosh”, theksoi 35 vjeçarja që mund të jetë Evropiani i fundit në karrierë për të. “Është dashur të fitojmë Evropianin, por nuk e di se çfarë të them”, theksoi kapitenia e Suedisë.
Raportohet se mbi 150 shtetas shqiptarë kanë nisur tashmë procedurat për përfitimin e pensionit në kuadër të marrëveshjes për njohjen e ndërsjellë të sigurimeve shoqërore mes Shqipërisë dhe Italisë, e cila ka hyrë në fuqi më 1 korrik 2025, përcjell albinfo.ch.
Ministri i Ekonomisë, Kulturës dhe Inovacionit, Blendi Gonxhja, zhvilloi një takim me drejtoreshën e përgjithshme të Institutit Kombëtar të Sigurimeve Shoqërore në Itali, Valeria Vittimberga, ku u diskutua mbi ecurinë e zbatimit të marrëveshjes.
Marrëveshja i hap rrugë njohjes së ndërsjellë të periudhave të sigurimit dhe mundëson përfitimin e pensioneve sipas legjislacionit kombëtar të secilit shtet.
“Deri tani, kërkesat e para janë kryesisht për bashkimin e periudhave të sigurimit për qëllime pensioni në Itali, si dhe nga individë që nuk plotësojnë minimumin prej 15 vite sigurim në Shqipëri”, informoi ministri.
Instituti i Sigurimeve Shoqërore ka ngritur të gjithë infrastrukturën e nevojshme për të pritur dhe përpunuar këto kërkesa, si dhe për të realizuar komunikimin e drejtpërdrejtë dhe efikas me palën italiane.
“Shkëmbimi i formularëve midis dy institucioneve do të kryhet në mënyrë elektronike, duke reduktuar ndjeshëm kohën e procedurës dhe duke lehtësuar ndjeshëm shërbimin për qytetarët”, shtoi Gonxhja.
Në funksion të transparencës dhe udhëzimit të saktë për qytetarët, janë publikuar tashmë të gjitha udhëzimet dhe manualet që shpjegojnë hapat që duhen ndjekur për çdo kategori aplikuesi.
Për pesë vite me radhë, Festivali Ndërkombëtar i Operës Rame Lahaj (RLIOF) ka qenë më shumë se një ngjarje artistike.
Ai ka qenë një mision për të ndërtuar një vizion të përbashkët për të ardhmen kulturore të Kosovës.
Nën temën “Ëndrra Pa Kufi, Opera Pa Mure”, edicioni i 5-të përforcon thirrjen për ndërtimin e një shtëpie opere në vend, jo si luks, por si një nevojë jetike për zhvillimin artistik dhe shoqëror.
Pavarësisht mungesës së infrastrukturës, festivali ka transformuar çdo hapësirë të hapur në një skenë të denjë për artistët dhe publikun, duke dëshmuar se një vizion i fortë mund të kapërcejë çdo pengesë fizike, transmeton albinfo.ch.
Ky festival ka krijuar ura mes Kosovës dhe botës, duke sjellë artistë të nivelit më të lartë nga shumë vende për të ndarë artin dhe përvojën e tyre me artistët e rinj vendas. Duke qenë një gjuhë universale, Opera bashkon, ngjall shpresë dhe promovon mirëkuptim. Përmes këtij misioni, RLIOF vazhdon të mbjellë ëndrra e të ngrejë zërin për një të ardhme ku Kosova do të ketë shtëpinë e saj të operës, një vend ku brezat e rinj do të mund të rriten dhe edukohen me dinjitet!
Programi artistik
Për plot 10 ditë, RLIOF do të përcjellë netë të paharrueshme muzikore dhe një sërë aktivitetesh të larmishme për të gjithë pjesëmarrësit.
23 korrik | 20:30 Nexhmije Pagarusha (Hapësira e jashtme e Bibliotekës Kombëtare, Prishtinë)
24 korrik | 20:00 Nexhmije Pagarusha (American Retail Park – Interex, Pejë)
25 korrik | 20:00 Nexhmije Pagarusha (Pika kryesore e Interex, Mitrovicë)
27 korrik | 13:30 Educating the audience of the future (HyperActive, Prishtina Mall)
28 korrik | 20:30 Opera Night (Hapësira e jashtme e Bibliotekës Kombëtare, Prishtinë)
29 korrik | 19:30 New Generation (Fakulteti i Arteve, Prishtinë)
30 korrik | 20:30 Ensemble Evening (Hapësira e jashtme e Bibliotekës Kombëtare, Prishtinë)
2 gusht | 20:30 Gala Night “Rame Lahaj & Friends” (Sheshi Skënderbeu, Prishtinë)
Presidentja e Kosovës, Vjosa Osmani, ka thënë të enjten se Serbia ka pasur qëllim dhe ka ende qëllim destabilizimin e situatës së sigurisë në Kosovë, dhe se këtë vlerësim që e ka bërë edhe në Uashington ditë më parë, e ka bazuar në informatat e vazhdueshme që i ka marrë nga institucionet e sigurisë të Republikës së Kosovës, përcjell albinfo.ch.
Përgjatë vizitës në Uashington javën e kaluar, presidentja i ka konfirmuar deklaratat e presidentit amerikan, Donald Trump se ai e ka parandaluar një përshkallëzim të mundshëm nga Serbia në Kosovë “në javët e fundit”.
“Më konkretisht në fund të muajit maj kemi marrë informacione specifike lidhur me veprimet e Serbisë në kufi me Kosovën. Menjëherë pas marrjes së këtyre informacioneve kam pasur takime me institucionet e sigurisë të cilat më raportojnë si presidente. Jemi siguruar që çdo institucion në Kosovë ka mobilizim të duhur për mbrojtje të vendit”, ka thënë ajo në një konferencë për media në Prishtinë, pas kthimit nga disa vizita në Shtetet e Bashkuara dhe Letoni.
Osmani ka thënë se një pjesë e informacioneve janë të klasifikuara, por që ato janë ndarë me aleatët për të ndalur përshkallëzimin e sigurisë.
Mes tjerash, presidentja Osmani ka thënë se është habitur kur ka dëgjuar raportime se qytetarët e Kosovës nuk kanë qenë të informuar më parë për rreziqet nga Serbia, meqë, sipas saj, “kjo çështje është trajtuar në dhjetëra deklarata të Presidencës së Kosovës” dhe që për rrezikun e majit ka folur edhe ministri në detyrë i Mbrojtjes, Ejup Maqedonci.
Serbia i ka hedhur poshtë deklaratat e Osmanit ditë më parë, mirëpo presidentja e Kosovës i ka quajtur ato “pjesë të propagandës së tyre të vazhdueshme”.
“I siguroj qytetarët e Kosovës se nuk ka arsye, as për shqetësim dhe as për panik, sepse institucionet tona janë në krye të detyrës për mbrojtjen e kufijve dhe të sigurisë të të gjithë qytetarëve tanë. Kërcënimet nga Serbia janë të vazhdueshme, megjithatë institucionet tona kanë gjithçka në kontroll”.
Drejtori i Zyrës për Kosovën në Qeverinë e Serbisë, Petar Petkoviq, ka thënë përmes një postimi në X, se presidentja Osmani “nuk ka thënë asgjë me kuptim, përveç sulmeve tjera ndaj Beogradit”.
Kur është pyetur për akuzat e Richard Grenellit, të dërguarit të presidentit amerikan për Misione të Posaçme, se Osmani po manipulon me deklaratat e Trumpit, presidentja ka thënë se ajo vetëm e ka falënderuar presidentin Trump për rolin e tij në botë, në përgjithësi, dhe në rajonin e Ballkanit, për ruajtjen e paqes dhe sigurisë.
“Unë jam përgjigjur në pyetje dhe i ftoj vetë qytetarët e Kosovës që t’i dëgjojnë ato deklarata për të cilat unë jam pyetur. Ndër të tjera është deklarata e datës 25 qershor 2025, mund t’i dëgjoni vetë. Thuhet se ‘në javën e fundit u kujdesëm për Indinë e Pakistanin, Kosovën dhe Serbinë’”, ka deklaruar Osmani duke cituar deklarimet e Trumpit në javët e fundit.
“Nuk kam interpretuar deklarata të presidentit Trump, por kam treguar se si i kam kuptuar unë si presidente e Republikës së Kosovës. Nëse qëndrimi i Shteteve të Bashkuara është ndryshe, besoj që mund t’iu drejtoheni, mirëpo ne e vlerësojmë rolin e presidentit Trump si paqebërës ditë e natë për paqe në botë. E vlerësojmë jashtëzakonisht këtë kontribut. Nuk dua të deklaroj si e kanë komentuar tjerët deklaratën time”.
Çfarë tha Trump?
Presidenti i SHBA-së, Donald Trump, shkroi në rrjetin Social Truth më 15 qershor se gjatë mandatit të tij të parë presidencial, Kosova dhe Serbia po “shkonin drejt një konflikti serioz” dhe se lufta ishte në prag të shpërthimit, por se ai e ndaloi atë.
Më 25 qershor, Trump tha se “gjatë javëve të fundit, u morëm me Indinë dhe Pakistanin, Kosovën, Serbinë. Mendoj se të premten do të kemi vizita nga Kongo dhe Ruanda”. Ai e bëri këtë deklaratë gjatë një konference për medianë samitin e NATO-s në Hagë.
Më 27 qershor, duke folur në Zyrën Ovale për përpjekjet e administratës së tij për të zgjidhur konflikte të mundshme, Trump tha se: “…në Serbi dhe Kosovë zgjidhëm një katastrofë të mundshme.”
Një ditë më vonë, më 28 qershor, Trump tha se “për vetëm disa muaj, kemi arritur paqe midis Indisë dhe Pakistanit, Izraelit dhe Iranit, si dhe midis Republikës Demokratike të Kongos dhe Ruandës – dhe disa të tjerë gjithashtu”.
“Serbia, e dini, po përgatitej të shkonte në luftë me një grup. Nuk dua ta përmend, sepse nuk ndodhi – ne arritëm ta ndalnim. Por, kam një mik në Serbi që më tha: ‘Do të hyjmë sërish në luftë’. Dhe nuk dua të them që është Kosova, por është Kosova. Do të niste një luftë e madhe, por ne e ndalëm. E ndalëm për shkak të tregtisë. Ata duan të tregtojnë me Shtetet e Bashkuara. U thashë: ne nuk tregtojmë me ata që hyjnë në luftë”.
Më vonë, më 9 korrik, ai përsëriti: “Kam arritur të zgjidh shumë situata, si ajo me Indinë dhe Pakistanin, Kosovën dhe Serbinë. Thashë: a do të luftoni? Ne nuk do të bëjmë tregti. Dhe, duket se kjo ka qenë mjaft e suksesshme”.
Trump e përmendi rastin e Kosovës dhe Serbisë edhe gjatë një takimi me shefin e NATO-s, Mark Rutte, më 14 korrik në Shtëpinë e Bardhë.
Përmes një postimi në X, më 13 korrik, Grenell ka thënë se “Donald Trump është nominuar për Çmimin Nobel për Paqe për punën e tij për paqe dhe normalizim ekonomik mes Kosovës dhe Serbisë më 2019 dhe 2020 përmes nënshkrimit të Marrëveshjes së Uashingtonit në Zyrën Ovale”.
“Osmani nuk ka qenë pjesë e asaj marrëveshjeje. Pretendimi që ka pasur diçka të re është absurde”, ka thënë Grenell përmes një postimi në X.
Në nëntor të vitit 2019, Grenell ishte emëruar nga Trump si i dërguari i posaçëm për negociatat mes Kosovës dhe Serbisë, dhe ai ka qenë i përfshirë nga afër në këtë proces.
Në mandatin e parë të Trumpit, më saktësisht më 2020, Kosova dhe Serbia kanë nënshkruar një marrëveshje për normalizim të marrëdhënieve ekonomike – e njohur si Marrëveshja e Uashingtonit – e cila nuk është zbatuar kurrë në tërësi.
Vetë Trump i ka përmendur Kosovën dhe Serbinë në disa raste në javët e fundit, duke thënë se ka parandaluar një konflikt mes tyre.
Radio Evropa e Lirë e ka kontaktuar Shtëpinë e Bardhë për sqarim lidhur me këto deklarata, por nuk ka marrë përgjigje.
Përgjigje nuk ka nisur as Qeveria në detyrë e Kosovës, kur është pyetur se për çfarë lloj përshkallëzimi të situatës bëhet fjalë.
Misioni i NATO-s në Kosovë, KFOR, i ka thënë Radios Evropa e Lirë se Ballkani Perëndimor vazhdon të ketë rëndësi strategjike për aleancën dhe ajo është e përkushtuar për stabilitet rajonal.
Megjithatë, KFOR-i nuk ka dashur t’i komentojë deklaratat e fundit të Osmanit dhe Trumpit, duke thënë se për to duhet referuar te institucionet e Kosovës dhe ato të SHBA-së.
Edhe Ambasada e Gjermanisë në Kosovë i ka thënë një ditë më parë Radios Evropa e Lirë se nuk ka informacione për ndonjë përshkallëzim ushtarak të situatës mes Kosovës dhe Serbisë.
Këto deklarata vijnë në një kohë kur tensionet mes Kosovës dhe Serbisë mbeten të larta, sidomos në veri të Kosovës, ku shumica e popullsisë është serbe.
Përshkallëzimi i situatës në veri të Kosovës ka kulmuar në shtator të vitit 2023 kur një grup i armatosur serbësh, i udhëhequr nga Millan Radoiçiq – ish-nënkryetar i Listës Serbe – e ka sulmuar Policinë e Kosovës në fshatin Banjskë dhe ka vrarë një rreshter policie.
Kosova e ka përshkruar sulmin si terrorist dhe e ka akuzuar Serbinë se qëndron pas tij – gjë të cilën Beogradi zyrtar e ka mohuar.
E para e vendit foli edhe për bllokadën e Kuvendit. Ajo tha se nëse edhe gjatë këtij vikendi nuk ka institucione, apo ndonjë marrëveshje deri në fund të javës, do t’i drejtohet Gjykatës Kushtetuese.
“Ne jemi duke përgatitur lëndën për Kushtetuese nëse edhe gjatë këtij vikendi nuk ka institucione, nuk ka ndonjë marrëveshje që mund të rezultojë me institucione të konstituuara, atëherë në fillim të javës ne i drejtohemi Kushtetueses”, deklaroi ajo.
Tutje, ajo ka theksuar se nuk i takon presidentit/es që të negociojë për arritjen e koalicioneve mes partive.
Avokati Petrit Lladrovci, në emisionin “Ora Shtatë”, foli rreth rregullave në komunikacion, kjo më shumë për t’i vetëdijesuar mërgimtarët, përcjell albinfo.ch.
Ai shpjegon se nëse mërgimtarët drejtojnë makinën me shpejtësi të lartë, por që kanë patentë shofer të huaj, sipas avokatit, Policia e Kosovës nuk mundet t’ua konfiskojë atë, por vetëm mundet t’ua ndalojë vozitjen në Kosovë.
Lladrovci shton se nëse bëjnë pagesë të dyfishtë, pra gjobën, personat me patentë shofer të huaj mund ta kalojnë dënimin me ndalim të vozitjes së automjeteve.
Lladrovci thotë se të gjitha këto janë rregulla të shkruara në rregulloren e Policisë së Kosovës.
Duke filluar nga ora 09:30, në Pallatin e Drejtësisë do të vazhdojë seanca gjyqësore për rastin “Banjska”, përcjell albinfo.ch.
Referuar njoftimit, seanca mbahet ndaj të akuzuarve për sulmin terrorist të 24 shtatorit 2023, Blagoje Spasojeviq, Vladimir Toliq dhe Dushan Maksimoviq.
Deri më tani kanë dhënë dëshmi disa zyrtarë policorë që ishin pjesëmarrës në kundërsulmin në Banjskë të Zveçanit.
Më 11 shtator të 2024, Prokuroria Speciale e Kosovës ngriti aktakuzë kundër 45 personave në krye me kriminelin Milan Radoiiciq, të cilët akuzohen për terrorizëm, financim të terrorizmit dhe vepra të tjera të rënda penale.
Autoritetet e Kosovës kanë kërkuar ekstradimin e përgjegjësit të grupit terrorist, Milan Radoiçiq dhe të akuzuarit tjerë për sulmin terrorist në Banjskë të Zveçanit, mirëpo një gjë e tillë ende nuk ka ndodhur.
Më 18, 21, 22 dhe 24 korrik janë caktuar seancat për vazhdimin e gjykimit në këtë rast.
