Edhe ambasadori i Gjermanisë në Kosovë, Jorn Rohde ka thënë se Kosova urgjentisht duhet të formojë institucionet dhe se politikanët duhet të vendosin shtetin të parin, përcjell albinfo.ch.

Pas dështimit për herë të 22-të të konstituimit të Kuvendit, Rohde në një deklaratë për KosovaPress ka thënë se ngërçi po ndikon negativisht në perceptimin e Kosovës nga jashtë.

Rohde ka thënë se mungesa e institucioneve funksionale jo vetëm që ndikon në proceset e brendshme të vendimmarrjes, por gjithashtu pengon Kosovën të përfitojë nga iniciativat ndërkombëtare, siç është Plani i Rritjes i Bashkimit Evropian.

“E përshkruan fjala, është ngërç, është ndalesë. E thashë javën e kaluar, i bën njerëzit apatik dhe gjëja e fundit që i nevojitet një demokracie të gjallëruar është bllokada. Njerëzit kanë kryer punën e tyre me 9 shkurt dhe politikanët duhet të vendosin shtetin të parin, ndërsa politikën e partisë të dytën. Pra, mendoj se nevojitet urgjentisht që Kosova të formojë institucionet. Por, nuk është puna ime të bëjë punën e politikanëve, unë mund vetëm të observoj, por mund të të them për siguri se nuk rrit imazhin e Kosovës jashtë vendit. Nëse nuk ke një institucion funksional është e vështirë të bësh detyrat e shtëpisë, sepse nuk ke fuqinë e prokurës të marrësh vendime të vështira, të cilat nevojiten tani. Pavarësisht se a janë paratë e Planit të Rritjes të BE-së, të cilat janë në pritje për shkak se Kuvendi i Kosovës nuk është funksional, pra nuk mund të ratifikosh marrëveshjen”, ka thënë Rohde.

Rohde ka deklaruar se bllokada në Kuvend vjen si pasojë e moskompromisit mes partive politike.

“Thjeshtë nuk kemi kompromisin që nevojitet mes palëve politike… Nuk jam këtu që të jap nota. Unë mund të them se në politikë ka nevojë për kompromis dhe pasi që unë jam ambasadori gjerman sigurisht që mund të marrë parasysh shtetin tim. Ne patëm zgjedhje të vështira, rezultate të vështira, por njerëzit bënë kompromis sepse ata vendosën shtetin të parë. Ne i patëm zgjedhjet dy javë pas Kosovës dhe tani kemi një parlament funksional që një muaj dhe shpresoj që Kosova ndjek hapin me neve së shpejti”, ka deklaruar Rohde.

Të martën deputetët dështuan të konstituojnë Kuvendin edhe në përpjekjen e 22-të. As në tentimin e radhës, Lëvizja Vetëvendosje në koalicion me Guxo dhe Alternativa, nuk arriti të formojë Komisionin për votimin e fshehtë të kryeparlamentarit.

Në një deklaratë, ambasadori i Bashkimit Evropian në Kosovë, Aivo Orav, ka thënë se BE-ja ka nevojë për një partner në Kosovë, tek ka bërë thirrje për formimin e qeverisë së re, përcjell albinfo.ch.

Orav ka thënë se BE-së i duhet partneri që të mund të bisedojë për hapat konkretë drejt integrimit.

“Ju mund t’i bëni gjërat dhe mund ta çoni vendin tuaj drejt Bashkimit Evropian. Dhe dua të them që argumentet se një vend fqinj është duke bërë edhe më keq, nuk e afrojnë Kosovën më pranë Bashkimit Evropian. Tani, ajo që presim shumë nga Kosova është, së pari, të kemi një partner. Po, kemi një partnere  presidenten  por na nevojitet edhe pushteti ekzekutiv. Pra, kemi nevojë për një partner me të cilin të flasim për hapat e ardhshëm, si të lëvizim më afër Bashkimit Evropian. Shpresojmë shumë që qeveria të formohet sa më shpejt të jetë e mundur”, ka thënë ai.

Ai ka shtuar se qëndrimi i BE-së për zhvillimet në veri është i qartë. Ka përsëritur se heqja e masave ndaj Kosovës ka filluar, por ka thënë se duhet bashkëpunim i ngushtë për të ecur përpara.

“Mbyllja e institucioneve në veri. Sërish, Bashkimi Evropian e ka bërë të qartë pozicionin e tij  në mënyrë private, zyrtare dhe publike. Masat ndaj Kosovës. Përfaqësuesja e Lartë e BE-së, Kaja Kallas, ishte këtu vetëm para disa ditësh dhe ajo njoftoi se heqja graduale e masave kundër Kosovës ka filluar. Por për të ecur përpara, na duhet qartësisht një bashkëpunim shumë i mirë dhe i ngushtë me autoritetet këtu”, ka thënë Orav.

Ai ka folur edhe për çështjen e Asociacionit të Komunave me shumicë serbe, duke theksuar se kjo është një temë që duhet të trajtohet seriozisht dhe pa vonesa.

“Një temë për të cilën të gjithë flasin, por që nuk është aq e preferuar për t’u përmendur nga politikanët këtu në Kosovë, është Asociacioni i Komunave me shumicë serbe. Por qëndrimi i BE-së është sërish i qartë: duhet të bëhet. Duhet të bëhet dhe është më mirë të bëhet më herët sesa më vonë, për të ecur përpara. Mesazhi im është se ne në BE jemi të gatshëm të ecim përpara dhe shpresojmë shumë që edhe Kosova do të bëjë të njëjtën gjë”, ka thënë ai.

Ambasadorja e Holandës në Kosovë, Karin Boven, mbështeti thirrjen për formimin e menjëhershëm të qeverisë, duke theksuar se pa pushtet ekzekutiv funksional, përkushtimi për integrim nuk mund të konkretizohet.

“Përfaqësuesja e Lartë Kallas, e përmendur tashmë javën e kaluar, solli lajme të mira për fillimin e heqjes graduale të masave të BE-së, ashtu siç ishte kërkuar nga të gjitha institucionet dhe partitë politike të Kosovës. Dhe si BE, tani kemi nevojë të shohim veprime që kontribuojnë më tej në përafrimin me vlerat dhe standardet evropiane. Më lejoni të tërheq gjithashtu vëmendjen tek plani evropian i rritjes, i përmendur tashmë, një tjetër mundësi madhore për integrimin gradual të Kosovës në BE, një mundësi që tashmë pret veprimet konkrete të Kosovës. Kosova nuk ka kohë për të humbur. Në këtë pikë, siç e përmenda tashmë, përparësia kryesore është formimi i qeverisë dhe fillimi i menjëhershëm i punës së saj”, ka thënë ajo.

Ambasadorja holandeze vlerësoi përparimin e bërë nga Kosova ndër vite, por ka theksuar se ritmi i reformave është vendimtar për suksesin e integrimit.

Konferenca po organizohet nga Lëvizja FOL dhe Instituti i Prishtinës për Studime Politike.

Edhe pse në Kosovë janë mbajtur zgjedhjet më 9 shkurt dhe rezultatet u certifikuan në fund të marsit, Kuvendi ende nuk është konstituuar për t’i hapur rrugë formimit të Qeverisë.

Vëllezërit J.V. dhe N.V. janë dënuar me burgim të përjetshëm për vrasjen e biznesmenit Bedri Rexhepi në vitin 2021.

Kryetarja e trupit gjykues në Gjykatën Themelore në Prishtinë, Medie Bytyqi, ka thënë se ata janë fajtorë për dy vepra penale: vrasje e rëndë dhe dëmtim i varrezave apo i kufomave.

Sipas aktakuzës, në periudhën 9 janar 2021-8 prill 2021 vëllezërit Vllasaliu kishin planifikuar ta vrisnin Bedri Rexhepin me qëllim përfitimin e pasurisë.

Referuar aktakuzës, viktima ishte vënë në lajthitje nga vëllezërit Vllasaliu, të cilët ofruan për shitje dy vetura në vlerë prej 30 000 eurosh. Më 8 prill 2021 Rexhepi kishte shkuar në shtëpinë e njërit prej të pandehurve.

Atje, sipas aktakuzës, J.V. e ka ngufatur dhe mbytur Rexhepin, duke menduar se ai mbante me vete shumën prej 30 000 eurosh, siç ishin pajtuar për shitjen e veturave. Mirëpo, sipas aktakuzës, tek viktima u gjetën vetëm 8 000 euro. Vëllezërit ndanë mjetet dhe më pas e çuan kufomën në katin e tretë të shtëpisë, ku tentuan ta fshijnë provat duke e varrosur.

Mbetjet mortore të Rexhepit u gjetën më 30 shtator 2022 në vendin e quajtur Mali i Madh, në Vllasali të Novobërdës.

Të dy të dënuarit në seancën fillestare u deklaruan të pafajshëm.

Avokati i palës së dëmtuar, Besnik Berisha, ka deklaruar se sot drejtësia foli. “Së paku satisfaksion moral për dënimin që u shqiptua, sot drejtësia foli, sot plagët janë më të lehta, e dënimi i shqiptuar është dënim i pritur”, ka thënë ai.

Shemsedin Piraj, avokat i të dënuarit Nexhat Vllasaliu, ka deklaruar se s’kishte pritur dënimin me burgim të përjetshëm. “S’e kam pritur këtë dënim për klientin tim Nexhat, burgim i rëndë në bashkëkryerje. Ne i kemi cekur të metat e aktakuzës, por fatkeqësisht ato nuk u përfillën. Megjithatë, ky nuk është vendim përfundimtar, por vetëm i shkallës së parë”, tha Piraj.

Mësohet se nga sot (28 maj) edhe pika kufitare me Maqedoninë e Veriut, Glloboçicë-Jazhincë, do të kalohet me vetëm një kontroll, përcjell albinfo.ch.

Në orën 14:00 do të bëhet inaugurimi i pikës së përbashkët kufitare, që është e dyta pas asaj të Hanit të Elezit-Bllacë, që u inaugurua në prill.

Siç ka njoftuar Ministria e Punëve të Brendshme e Kosovës, në ceremoninë inauguruese do të marrin pjesë ministrat e brendshëm të të dyja shteteve dhe zëvendëskryeministri i parë i Maqedonisë së Veriut, Izet Mexhiti.

“Ky pikëkalim i përbashkët është njëri nga dy pikat e kalimit të përbashkët kufitarë të paraparë sipas Protokollit të Implementimit të Marrëveshjes ndërmjet Qeverisë së Republikës së Kosovës dhe Qeverisë së Republikës së Maqedonisë së Veriut për Pikat e Përbashkëta të Kalimit Kufitar Hani i Elezit-Bllacë dhe Glloboqicë-Jazhincë, nënshkruar në nëntor 2024 në mbledhjen e përbashkët të dy qeverive”, ka njoftuar MPB.