Archives

Kurti uroi festën e Kurban Bajramit

Posted on by Drin Reçica

Me rastin e Kurban Bajramit, Kryesia e Bashkësisë Islame të Kosovës priti kryeministrin në detyrë, Albin Kurti, së bashku me kabinetin e tij, përcjell albinfo.ch.

Gjatë vizitës, Kurti uroi festën dhe theksoi rëndësinë e solidaritetit dhe ndihmës për të varfërit.

“Urime festa e Kurban Bajramit sot dhe jo vetëm sot. Le të ndihmojmë ata që kanë më së shumti nevojë dhe ta përkujtojmë rëndësinë që ka sakrifica dhe solidariteti për një shoqëri të mirë dhe të drejtë. Paçit tryezat përplot me miq”, tha ai.

Britania shtrëngon masat për emigrimin e paligjshëm

Posted on by Drin Reçica

Mbretëria e Bashkuar (MB) po kap dhe ndalon më shumë njerëz se kurrë më parë për shkelje të rregullave të emigracionit, duke shënuar një numër rekord të riatdhesimeve gjatë vitit të fundit.

Që nga korriku 2024, rreth 30 000 individë pa të drejtë qëndrimi në Mbretërinë e Bashkuar janë kthyer në vendet e tyre. Azilkërkues të refuzuar, kriminelë të huaj dhe shkelës të tjerë të rregullave të emigracionit janë riatdhesuar në vende në Afrikë, Azi, Europë dhe Amerikën e Jugut si rezultat i forcimit të veprimeve dhe të zbatimit të ligjeve të emigracionit nga autoritetet britanike.

Kjo shifër thekson qasjen gjithnjë e më të ashpër të qeverisë, si për të penguar aktivitetet e paligjshme, ashtu edhe për të reduktuar rrezikun nga metodat e rrezikshme të udhëtimit.

Të hysh në Mbretërinë e Bashkuar në mënyrë të paligjshme është vepër penale

Hyrja në mënyrë të paligjshme në Mbretërinë e Bashkuar ka pasoja serioze. Nëse hyni në MB në mënyrë të paligjshme, mund të përballeni me deri në 4 vite burg dhe dëbim nga vendi.

Jeta nuk do të jetë e lehtë nëse hyni në MB në mënyrë të paligjshme:

  • Juve mund t’ju ndalohet hyrja e ligjshme në të ardhmen, që mund të jetë për qëllime pune, studimi apo vizite.

  • Ju nuk mund të punoni; punëdhënësit janë të detyruar me ligj të verifikojnë nëse keni të drejtë pune.

  • Ju nuk mund të merrni me qira një pronë; pronarët dhe agjentët janë të detyruar të kontrollojnë statusin tuaj të emigracionit para se t’ju japin me qira një banesë.

  • Ju nuk mund të keni akses në përfitime sociale.

  • Juve mund t’ju duhet të paguani nëse keni nevojë për trajtim spitalor apo kujdes shëndetësor në MB.

  • Ju nuk mund të hapni një llogari bankare dhe, nëse keni hapur, mund t’ju bllokohet llogaria dhe/ose të konfiskohet shuma e parave.

Nëse lindni fëmijë ndërsa jeni në MB në mënyrë të paligjshme, ata nuk do të kenë shtetësi britanike edhe pse lindën në këtë vend.

Ligjet e reja në Mbretërinë e Bashkuar synojnë punonjësit e paligjshëm

Qeveria britanike ka miratuar ligje të reja që kërkojnë nga kompanitë të kryejnë verifikime të të drejtës për të punuar (Right to Work checks) për personat me kontrata afatshkurtra ose me orar fleksibël, shpesh të quajtur si pjesë e ekonomisë “gig”, si për shembull shoferët e shpërndarjes. Kjo është hera e parë që bizneset në sektorë si shpërndarja e ushqimit, ndërtimi, shërbimet postare dhe sallonet e bukurisë janë ligjërisht të detyruara të konfirmojnë nëse personat që punësojnë kanë të drejtë pune në MB.

Kontrolli i të drejtës për të punuar zgjat vetëm disa minuta dhe, aktualisht, mijëra kompani që përdorin këto forma fleksibël punësimi nuk janë të detyruara me ligj të verifikojnë statusin e punëtorëve. Prandaj, Qeveria e Mbretërisë së Bashkuar po forcon legjislacionin për të goditur ata që minojnë sistemin e emigracionit duke lehtësuar punësimin e paligjshëm.

Bizneset që nuk kryejnë këto verifikime do të përballen me gjoba të rënda deri në 60 000 paund për çdo punonjës, dënime penale me deri në 5 vite burg, mbyllje të aktivitetit, ndalim të rekrutimeve nga jashtë dhe sekuestrim të fitimeve.

Po ashtu, ata që kapen duke punuar në mënyrë të paligjshme në Angli dhe Uells mund të dënohen deri në 51 javë burg, ndërsa në Skoci dhe Irlandën e Veriut deri në 6 muaj. Kur Ministria e Brendshme e Britanisë së Madhe (Home Office) identifikon persona pa të drejtë qëndrimi në MB, Forcat e Zbatimit të Emigracionit do të organizojnë kthimin e tyre, qoftë në mënyrë vullnetare apo të detyruar.

Të kuptuarit e rreziqeve dhe pasojave ligjore të udhëtimit të paligjshëm drejt Mbretërisë së Bashkuar

Udhëtimi i paligjshëm drejt MB është shumë më i rrezikshëm sesa njerëzit mendojnë. Shumë njerëz, përfshirë fëmijë, janë dëmtuar, lënduar, plagosur ose kanë humbur jetën gjatë përpjekjeve për të mbërritur në Mbretërinë e Bashkuar me varka të pasigurta apo nëpër kamionë. Edhe nëse i mbijetoni këtij udhëtimi, ju do të përballeni me rreziqe të mëdha sapo të mbërrini, përfshirë ndalimin/arrestimin dhe pasoja të rënda ligjore.

Shqipëria është një nga vendet kryesore për numrin e personave që mbërrijnë në MB me varka të vogla, gjë që e bën edhe më të rëndësishme ndalimin e udhëtimeve të paligjshme për arsye sigurie.

Njerëzit, miqtë dhe familjet tona në Shqipëri duhet të jenë të vetëdijshëm për pasojat ligjore që sjell udhëtimi i paligjshëm drejt MB, si dhe për rëndësinë e ndjekjes së rrugëve të ligjshme për të garantuar sigurinë e tyre dhe për të shmangur pasoja të rënda.

Ekzistojnë mënyra të ligjshme për të lëvizur drejt Mbretërisë së Bashkuar, përmes vizave të punës apo studimit, si dhe politika e bashkimit familjar për refugjatët që ofron një rrugë të sigurt dhe të ligjshme për bashkimin e familjeve. Është thelbësore që njerëzit të ndjekin procesin ligjor, jo vetëm për sigurinë e tyre, por edhe për të shmangur pasojat serioze nëse kapen në shkelje të ligjit.

Për më shumë informacion, vizitoni: gov.uk/immigrationfacts

Kosova renditet e treta në ranglistën botërore në paraglajdizëm

Posted on by Drin Reçica

“Shqiponjat” tona “fluturojnë” në renditjen botërore të Federatës Ndërkombëtare të Aeronautikës, disiplina, saktësia në paraglajding, përcjell albinfo.ch.

Në mesin e 71 shteteve garuese anëtare të Federatës Ndërkombëtare të Aeronautikës, shteti i Kosovës ka arritur të renditet në vendin e tretë në paraglajdizëm precizion.

Vendi i tretë në botë u arrit falë disiplinës së jashtëzakonshme dhe punës së palodhshme të sportistëve të Federatës Aeronautike të Kosovës.

Ky klub i Bundesligës i interesuar për Andi Zeqirin

Posted on by Drin Reçica

Borussia Monchengladbach është duke kërkuar sulmues dhe njëri prej tyre është Andi Zeqiri, ka shkruar mediumi zviceran “Blick”, përcjell albinfo.ch.

Zeqiri, 25-vjeçar, aktualisht është futbollist i Genkut.

Ai ka kontratë deri në vitin 2026, ndërsa së fundmi ishte i huazuar te Standard Liege.

Zeqiri, që ka 16 paraqitje me Përfaqësuesen e Zvicrës, ka realizuar nëntë gola dhe ka dhuruar tri asistime në 23 paraqitje.

Trajneri i Gladbachut, Gerardo Seoane, e pëlqen shumë stilin e lojës së Zeqirit, i cili mund të luajë në disa pozita në sulm.

Çmimi i tij në treg, sipas faqes “Transfermarkt”, është 4 milionë euro.

Ai, si futbollist, është zhvilluar në Zvicër te Lausanne-Sport, ndërsa karrierë ka bërë edhe te Brightoni, Augsburgu e Baseli.

“Alarm” në Shqipëri: Turistët nga Kosova po largohen

Posted on by Drin Reçica

Kreu i Shoqatës së Hoteleri-Turizmit në Shqipëri, Zak Topuzi, ka ngritur alarmin mbi një fenomen që po bëhet gjithnjë e më shqetësues për sektorin turistik në Shqipëri: largimi i turistëve nga Kosova drejt vendeve të tjera të rajonit, veçanërisht Greqisë, përcjell albinfo.ch.

Në një deklaratë për mediat, Topuzi tha se Kosova ka intensifikuar bashkëpunimin me Maqedoninë e Veriut për të krijuar një korridor të lehtësuar drejt destinacioneve greke, çka e bën më tërheqëse për pushuesit kosovarë që kërkojnë alternativa të reja dhe më të organizuara për pushimet verore.

“Rajoni është bërë më gati sesa ne. Kosova është lidhur me Maqedoninë për të kaluar më kollaj në Greqi. Kjo tregon se ka një mungesë përgatitjeje nga ana jonë për të mbajtur dhe rritur interesin e turistëve kosovarë në Shqipëri”, tha Topuzi, duke theksuar se Shqipëria po humbet një nga tregjet më të qëndrueshme dhe besnike të turizmit.

Ai theksoi se nuk është fjala vetëm për periudhën verore, por për potencialin që ka Shqipëria për të ofruar një eksperiencë turistike gjithëvjetore për të rinjtë nga Kosova.

“Ne nuk jemi gati për të rinjtë kosovarë, të cilët duhet të kenë mundësi të vijnë në Shqipëri dhe të kalojnë pothuajse të gjithë vitin këtu. Duhet të bëhemi një vend ku ata ndihen të mirëpritur, të angazhuar, ku të kenë çfarë të bëjnë”, theksoi Topuzi.

Sipas tij, nevojitet një investim më i madh në krijimin e aktiviteteve dhe produkteve të reja turistike që do të tërhiqnin vizitorët nga Kosova, jo vetëm për plazhin, por edhe për turizëm kulturor, natyror, sportiv dhe gastronomik.

Kosova ndaj Armenisë: Nisin përgatitjet për misionin “Botërori 2026”

Posted on by Drin Reçica

Kosova përballet sot (6 qershor) me Armeninë në kuadër të ndeshjeve miqësore.

Dardanët zhvillojnë këtë ndeshje para dueleve kualifikuese për në Kampionatin Botëror.

Franco Foda, në konferencë për media, deklaroi se duan seriozitet maksimal për këto miqësore që i luajnë këtë muaj, duke u fokusuar edhe te lojtarët që nuk kanë pasur shumë minuta.

“Qëllimi kryesor i yni është që dy ndeshjet t’i fitojmë. Nuk dëshirojmë të eksperimentojmë. Jemi duke u përgatitur mirë për fazën kualifikuese të Botërorit ndaj Zvicrës dhe Suedisë”, deklaroi Foda me vendosmëri.

“Lojtarët e rinj janë integruar shumë shpejt në lojën e skuadrës. Ne i kemi vëzhguar ata para se t’i ftojmë. Kanë treguar performancë të mirë dhe e kanë vërtetuar në seancat e kaluara stërvitore”, tha ai, duke lënë të hapur mundësinë që disa prej tyre të debutojnë që në miqësoren e parë.

Dy ditë më vonë, Kosova përballet me Komoret për të përmbyllur këtë fazë të ndeshjeve miqësore.

Që të dy këto takime luhen në stadiumin “Fadil Vokrri”, ndërsa ndeshja e sotme ndaj Armenisë nis në ora 19:00.

Berlin: Java e Kulturës së Kosovës fillon me shfaqjen e filmit artistik “The Albanian Virgin”

Posted on by Drin Reçica

Mësohet se, në kuadër të “Javës së Kulturës së Kosovës në Berlin”, do të shfaqet filmi artistik The Albanian Virgin, më 10 qershor, në ora 19:00, transmeton albinfo.ch.

Ky aktivitet organizohet në bashkëpunim me shoqatën “Marrja Zezë” dhe do të shfaqet në adresën Sinema Transtopia, Lindower Str. 20–22, 13347 Berlin.

Na bashkohuni për një mbrëmje të veçantë, me prezencën e aktorëve Rina Krasniqi dhe Nik Xhelilaj, si dhe me një bashkëbisedim pas filmit. Mbrëmja do të pasurohet gjithashtu me një koncert nga Agona Shporta, ARBËRESHË dhe Igor Yakovenko.

Shqiptarja Aida Birinxhiku – Deputetja që po udhëheq socialdemokracinë suedeze

Posted on by Drin Reçica

Shqiptarja Aida Birinxhiku, deputetja, tashmë po dallohet si një prej zërave më të rëndësishëm të brezit të ri brenda Partisë Socialdemokrate në Suedi, përcjell albinfo.ch.

Në Kongresin e 42-të të kësaj partie, Aida drejtoi punimet me dinjitet dhe përkushtim, duke menaxhuar mbi 4000 mocione dhe 10 000 propozime.

Aida, me rrënjë nga Kosova, është bërë deputetja më e re në Parlamentin suedez, duke përfaqësuar qarkun Halland për Partinë Socialdemokrate. E lindur në Suedi në vitin 1999 nga prindër që emigruan në vitin 1998, Aida ka ndjekur studimet në Universitetin e Lundit dhe ka një diplomë në drejtësi.

Përfshirja e saj në politikë filloi në vitin 2014 përmes organizatës rinore socialdemokrate në Halland, ku më vonë u bë edhe kryetare. Në vitin 2018, ajo u zgjodh në këshillin bashkiak të Falkenbergut.

Në zgjedhjet parlamentare të vitit 2022, Aida u zgjodh deputete, duke u bërë shqiptarja e parë në Parlamentin suedez dhe më e reja në moshë në atë legjislaturë. Ajo është anëtare e Komisionit për Industrinë dhe Tregtinë dhe e Komisionit për Çështjet e Bashkimit Evropian.

Presidentja Osmani: Kurban Bajrami na fton të reflektojmë mbi vlerat njerëzore dhe të forcojmë mirëkuptimin

Posted on by Drin Reçica

Me rastin e festës së Kurban Bajramit, Presidentja e Republikës së Kosovës, Vjosa Osmani, ka përcjellë një mesazh urimi për të gjithë qytetarët, duke theksuar rëndësinë e kësaj feste në kultivimin e vlerave njerëzore dhe lidhjeve ndërnjerëzore.

“Në këtë ditë të veçantë, uroj që në secilën shtëpi të mbizotërojë gëzimi, shëndeti dhe dashuria. Qoftë kjo festë një burim frymëzimi për një të ardhme më të ndritur, me më shumë dhembshuri, mirësi dhe respekt të ndërsjellë”, u shpreh Osmani.

Ajo shtoi se Kurban Bajrami është një thirrje për reflektim mbi vlerat më të larta njerëzore dhe për forcimin e lidhjeve, dashurisë dhe mirëkuptimit ndërmjet nesh.

Në mesazhin e saj, Presidentja theksoi po ashtu se kjo festë shpërfaq shpirtin e solidaritetit dhe na kujton rëndësinë e sakrificës, përkushtimit dhe ndihmës ndaj njëri-tjetrit.

“Ju përcjell urimet më të përzemërta për paqe, harmoni dhe begati në çdo familje”, përfundoi ajo mesazhin e saj.

Ceremonia e faljes në Tiranë u zhvillua në bulevardin “Dëshmorët e Kombit”

Posted on by Drin Reçica

Besimtarët myslimanë festojnë sot Kurban Bajramin. Mijëra qytetarë u mblodhën në orët e para të mëngjesit në sheshe dhe xhami për të kryer faljen e Bajramit, në një atmosferë lutjeje, reflektimi dhe solidariteti, përcjell albinfo.ch.

Ceremonia kryesore e faljes në Tiranë u zhvillua në bulevardin “Dëshmorët e Kombit”, ku morën pjesë besimtarë nga kryeqyteti dhe më gjerë.

Kurban Bajrami, i njohur ndryshe si Festa e Sakrificës, përkujton gatishmërinë e profetit Ibrahim për të flijuar të birin si shenjë bindjeje ndaj Zotit. Me këtë rast, shumë familje myslimane therin kurban, zakonisht dele, dhi apo lopë, dhe mishin e ndajnë me të afërmit, fqinjët dhe të varfrit si shenjë solidariteti dhe bujarie.

Festa e Kurban Bajramit do të vijojë gjatë gjithë ditës me vizita familjare, urime dhe ndarje të ushqimit me të afërmit dhe komunitetin, duke përforcuar vlerat shpirtërore dhe humane që kjo festë përcjell.

Besimtarët myslimanë festojnë sot Kurban Bajramin

Posted on by Drin Reçica

Sot, besimtarët myslimanë në gjithë botën festojnë Kurban Bajramin, përcjell albinfo.ch.

Në Kosovë, manifestimi qendror është mbajtur në Xhaminë e Madhe në Prishtinë.

“Kurban Bajrami është festë fetare, por megjithatë bart në vete mesazhe të thella shoqërore e atdhetare. Festa e Bajramit nuk kufizohet vetëm në adhurim, por kontribuon në forcimin e vlerave që ndërtojnë shoqërinë dhe forcojnë atdheun. Prandaj themi se kjo festë forcon ndjenjën e bashkësisë dhe vëllazërisë mes nesh, e që është bazë për shoqëri dhe shtet të qëndrueshëm”, ka thënë myftiu Naim Tërnava në urimin e tij në natën e Kurban Bajramit.

Blatten: Rikonstruksioni pas rrëshqitjes së dheut do të zgjasë me vite

Posted on by Alb

Pas rrëshqitjes së madhe të dheut në Blatten VS, banorët po përballen me një proces të gjatë rikonstruksioni ose zhvendosjeje. Shkatërrimi i rëndë i shtëpive dhe infrastrukturës ka detyruar rreth 300 banorë të humbasin shtëpitë e tyre, ndërsa një person ka humbur jetën, transmeton albinfo.ch.

Rikonstruksioni apo zhvendosja?
Ekspertët thonë se rikonstruksioni në vendin aktual është i vështirë për shkak të volumit të madh të rrënojave, ndaj po konsiderohet zhvendosja në një vend më të sigurt. Procesi mund të zgjasë 2-3 vite, pasi siguria dhe infrastruktura janë prioritet.

Përvoja e Gondos
Ish-kryetari i komunës së Gondos, Roland Squaratti, tregon se rikonstruksioni pas një fatkeqësie të ngjashme në vitin 2000 ishte një detyrim ndaj banorëve dhe donatorëve, dhe u realizua me mbështetjen e komunitetit dhe shtetit.

Ndikimi social
Zhvendosja sjell sfida të mëdha emocionale për banorët, pasi shumë prej tyre kanë ndërtuar shtëpitë me shumë mund. Ekspertët theksojnë se procesi duhet të jetë i ndjeshëm dhe i mbështetur nga komunikimi i vazhdueshëm.

Cilat janë bankat online më të lira në Zvicër në vitin 2025?

Posted on by Alb

Në vitin 2025, bankat online në Zvicër po fitojnë popullaritet për shkak të tarifave më të ulëta dhe fleksibilitetit që ofrojnë krahasuar me bankat tradicionale fizike. Një studim i platformës Moneyland krahasoi tarifat e disa neobankave si Alpian, Kasparund, Neon, Radicant, Revolut, Wise, Yapeal, Yuh dhe Zak, si dhe të bankave tradicionale si UBS, Raiffeisen dhe Zürcher Kantonalbank, transmeton albinfo.ch.

Rezultati tregon se Radicant është banka online më e lirë, me tarifa vjetore nën 20 franga zvicerane. Ndërsa banka fizike WIR është fituesi i përgjithshëm në kategorinë e tarifave, me vetëm 5.80 franga në vit. Revolut rezultoi me tarifat më të larta në mesin e neobankave, kryesisht për shkak të një komisioni prej 1% në transaksione.

Bankat online në Zvicër janë po aq të sigurta sa bankat tradicionale, pasi i nënshtrohen rregullave strikte të Autoritetit të Mbikëqyrjes Financiare (FINMA).

Zgjedhja mes një banke online dhe një banke tradicionale varet nga preferencat tuaja për përdorimin e teknologjisë dhe kontaktin personal.

Injektimet për humbje peshe: Gratë përdorin më shumë medikamente

Posted on by Alb

Në Zvicër, përdorimi i injeksioneve për humbje peshe, si medikamenti Wegovy, po rritet me shpejtësi që nga pranvera e vitit 2024, kur filloi mbulimi nga siguracioni shëndetësor. Deri tani, rreth 40.000 persona kanë përfituar kompensim, dhe shpenzimet mund të arrijnë deri në 300 milionë franga në vit, transmeton albinfo.ch.

Të dhënat tregojnë një dallim të qartë gjinor: gratë janë dyfish më të prira të përdorin këto injeksione, edhe pse më shumë meshkuj vuajnë nga mbipesha dhe obeziteti (52% e meshkujve kundrejt 34% të grave). Një faktor kryesor është ndikimi më i madh i idealit të bukurisë tek gratë dhe dëshira për të ndryshuar peshën trupore.

Obeziteti është një sëmundje komplekse dhe kronike që prek pothuajse një milion njerëz në Zvicër dhe shpesh shoqërohet me probleme shëndetësore si diabeti, sëmundjet e zemrës dhe çrregullime të tjera. Megjithatë, njerëzit me mbipeshë përballen shpesh me stigmatizim, edhe nga profesionistët e shëndetit, që i detyron ata të shmangin ndihmën mjekësore.

 

 

Kequshqyerja prek edhe fëmijët dhe adoleshentët në Zvicër

Posted on by Alb

Mungesa e hekurit, jodit, zinkut dhe madje edhe vitaminës C: një artikull i botuar në numrin e prillit të Gazette médicale raporton për kequshqyerjen tek fëmijët dhe adoleshentët në Zvicër. Si mund të shpjegohet kequshqyerja në një vend të pasur dhe të zhvilluar? Programi On en parle i kërkoi shpjegime specialistes Mette Berger.

Skorbuti, një sëmundje që më parë lidhej me detarët që udhëtonin në shekujt XVI deri në fillim të shekullit XX dhe që mungonin në fruta dhe perime të freskëta, po rikthehet edhe në Zvicër, sipas artikullit Kequshqyerja: A ekziston në Zvicër tek fëmijët dhe adoleshentët? i botuar në numrin e prillit 2025 të Gazette médicale, transmeton albinfo.ch.

Autorja e artikullit është Mette Berger, nutricioniste klinike, specialiste në mjekësinë e kujdesit intensiv dhe profesoreshë nderi në Fakultetin e Biologjisë dhe Mjekësisë të Universitetit të Lozanës. E intervistuar në On en parle, ajo sqaroi më 5 qershor 2025 se çfarë kuptohet me termin “kequshqyerje”.

Rritja e kostos së jetesës, shkaku kryesor

“Kequshqyerja, sipas Organizatës Botërore të Shëndetësisë, përfshin kequshqyerjen e përgjithshme, mungesën e mikronutrientëve, apo edhe obezitetin. Sipas të dhënave të Swiss Health Bulletin, në vendin tonë kemi mungesa të jodit, hekurit, zinkut dhe disa vitaminave, përfshirë edhe vitaminën D”, shpjegon Mette Berger.

Këta mikronutrientë gjenden në ushqime relativisht të shtrenjta: fruta dhe perime të freskëta, mish dhe peshk. “Sipas OBSH-së, shkaku kryesor i kequshqyerjes është varfëria. Në Zvicër, sipas të dhënave të Caritas dhe Zyrës Federale të Statistikave, rreth një e gjysmë milion njerëz jetojnë në varfëri. Gjysma prej tyre janë fëmijë”, thekson ajo.

Kequshqyerje me kosto të lartë

Pse janë problematike këto mungesa? “Ka pasoja për metabolizmin në përgjithësi, qoftë metabolizmin e trurit apo atë të organizmit. Ato dobësojnë shëndetin, veçanërisht sistemin imunitar, pengojnë rritjen normale dhe ndikojnë në aftësitë mendore. Për studentët, kjo është shumë e rëndësishme. Pa një dietë të ekuilibruar, performanca e tyre do të jetë më e ulët”, vazhdon Mette Berger, që thekson edhe rëndësinë e mësimit të gatimit për fëmijët dhe të rinjtë.

Përveç ndikimit në shëndetin tonë, këto mungesa dëmtojnë edhe buxhetin e Konfederatës. “Një studim i Insenspitalit të Universitetit të Bernës, që analizoi mungesën e hekurit tek 1.000 gra të rritura dhe ndikimin e saj në mungesat nga puna dhe marrjen e medikamenteve, vlerësoi se kjo mungesë i kushton Zvicrës rreth 33 milionë franga në vit”, shpjegon Mette Berger.

Mungesë stafit në Policinë e Baselit, rritje pagash në horizont

Posted on by Alb

Policia e Baselit po përballet me mungesë të theksuar të stafit. Për të tërhequr punonjës të rinj, tani janë planifikuar rritje pagash për të gjitha nivelet administrative të ulëta.

Pas debatit politik mbi mënyrën se si Policia e Baselit mund të plotësojë vendet e lira dhe të përmbushë detyrat e saj, qeveria ka propozuar një paketë që synon rritjen e pagave të ulëta dhe kompensimin më të mirë për punën në turne. Kjo masë do të prekë rreth 4.000 punonjës të kantonit, duke përfshirë sidomos policinë.

Situata aktuale

Policia në Basel po përballet prej vitesh me mungesë personeli, që e bën punën më të vështirë, sidomos për shkak të demonstratave të shumta dhe ngjarjeve të mëdha. Aktualisht mungojnë rreth 120 punonjës. Qeveria kantonale e lidh këtë pjesërisht me pagat e ulëta.

Në nivelet e ulëta të pagave, Basel-Stadt është deri në 14% më poshtë krahasuar me kantonet e tjera. Në një krahasim me 25 kantone dhe 16 qytete, pothuajse gjysma e punonjësve janë nën mesataren. Drejtoresha e Sigurisë, Stephanie Eymann (LDP), thekson se pagat e ulëta janë një pengesë për rekrutimin në polici.

Detajet e paketës së pagave

Një nga elementët kyç është rritja e pagave deri në shkallën e nëntëmbëdhjetë, duke rritur pagat fillestare. Gjithashtu, parashikohen rritje të shtesave për punën në turne, veçanërisht për zjarrfikësit, paramedikët, infermierët dhe efektivët e policisë. Kjo do të sjellë një rritje prej një të tretës së pagave në të ardhmen.

Situata në qytete të tjera

Në Zurich, për shembull, pagat nuk përbëjnë një problem kryesor për rekrutimin, edhe pse ka 78 vende të lira. Arsye të tjera si ngarkesa e lartë, distanca nga vendi i punës, situata familjare apo problemet shëndetësore ndikojnë më shumë në refuzime.

Në Bern, mungesa e personelit është minimale, por sfidat për rekrutimin janë rritur. Disa aplikantë më të vjetër me përvojë profesionale e shohin pagën si të ulët.

Reagimet dhe vlerësimet

Drejtuesja e financave në Basel, Tanja Soland (SP), thekson se paketa do të rrisë shpenzimet për personelin me 20.6 milionë franga në vit, por konsideron se kjo është e domosdoshme dhe nuk ka mënyrë më të lirë për të zgjidhur situatën.

Drejtoresha e Sigurisë, Stephanie Eymann (LDP), shpreh mbështetjen për paketën, duke theksuar rëndësinë e investimit në punonjës të mirë.

Sindikatat e policisë në Basel janë të kënaqura dhe shpresojnë që me këtë paketë të reduktohet mungesa e efektivëve.

Nga ana tjetër, Shoqata e Punëdhënësve dhe Tregtarëve shpreh kundërshtim ndaj paketës, duke e cilësuar atë si një “eksplodim të përgjithshëm pagash në administratën shtetërore”. Ata frikësohen për efektet në konkurrencën në tregun e punës dhe tërheqjen e punonjësve nga sektori privat.

Qeveria e Baselit planifikon gjithashtu lehtësimin e mbrojtjes nga largimi nga puna për drejtuesit, por kjo do të trajtohet në një propozim të veçantë në të ardhmen.

Një sistem i ri kontrolli shpejtësie në autostradën A9

Posted on by Alb

Konfederata po vendos një sistem paralajmërimi për rrezikun dhe harmonizim të shpejtësisë, një novitet për Zvicrën frankofone. Ky sistem do të funksionojë në segmentin e A9-së ndërmjet Vennes dhe Chexbres, në kantonin Vaud, një nga zonat më të ngarkuara me trafik në Zvicër.

Qëllimi është të mundësohet “menaxhim fleksibël dhe inteligjent i shpejtësisë” në autostradë, njoftoi të enjten Zyra Federale e Rrugëve (FEDRO). Në rast rreziku ose trafiku të rënduar, kufizimi i shpejtësisë ulet, duke vonuar dhe kufizuar formimin e kolonave të trafikut, transmeton albinfo.ch.

Sistemi përdor sensorë të instaluar për të zbuluar aksidente apo ngarkesë trafiku. Një operator i trafikut vlerëson situatën dhe, në rast nevoje, thërret ndihmën emergjente, aktivizon sinjalizimin e duhur dhe/ose kufizon shpejtësinë. Nëse është e nevojshme, paralajmërimet mund të transmetohen edhe në radio lajmesh.

Një pajisje që po testohet paralelisht

Aktualisht, sistemi është në modalitet pritjeje për tre javë për të siguruar funksionimin e duhur. Në rast defekti, sinjalizimi fiks do të mbetet në fuqi. Pastaj, gjatë javës së tretë të qershorit, sinjalizimi aktual fiks do të hiqet për t’i hapur rrugë sistemit të ri.

Kostoja totale arrin në 13 milionë franga, nga të cilat 9 milionë janë për pajisjet elektromekanike dhe 4 milionë për punimet e inxhinierisë civile.

Kantoni i Vaudit prezanton planin për zgjidhjen e krizës së strehimit

Posted on by Alb

Kantoni i Vaudit ka prezantuar “Vizionin e Strehimit” për tre deri pesë vitet e ardhshme, me qëllim përballimin e mungesës së banesave që po përkeqësohet vazhdimisht. Situata aktuale tregon një normë boshllëku prej 0.96% në nivel kantoni, nën normën e ekuilibruar prej 1.5%. Tetë nga dhjetë distriktet kanë mungesë të banesave, veçanërisht West Lausanne dhe Lausanne, transmeton albinfo.ch.

Plani fokusohet në katër fusha kryesore:

  1. Thjeshtimi i procedurave administrative për të përshpejtuar ndërtimin e banesave.

  2. Mobilizimi i tokës dhe fleksibilizimi i kuadrit ligjor për ndërtimet, duke nxitur densifikimin në zonat e ndërtuara.

  3. Rritja e aksesit në banesa për të gjithë, duke përfshirë banesat me interes publik.

  4. Përfshirja e komunitetit dhe aktorëve të ndryshëm në tryeza diskutimi për të identifikuar dhe hequr pengesat.

Synimi është rikthimi në një normë boshllëku prej 1.5% brenda pesë viteve, duke përmirësuar kushtet për zhvillimin e banesave dhe cilësinë e jetesës në kanton.

Luzern: Akademi dhe ekspozitë dokumentare për fëmijët e vrarë gjatë luftës në Kosovë

Posted on by albinfo.ch

Misioni Katolik Shqiptar në Luzern në bashkëpunim me Shoqatën Humanitare “Nëna Tereza” në Zvicër organizojnë më 29 qershor 2025, një akademi përkujtimore dhe ekspozitë dokumentare me titull: “Rikujtesë – Ata janë vetë liria”, kushtuar fëmijëve të vrarë në Kosovë gjatë viteve 1998-1999.

Ngjarja do të mbahet në:
📍 Gerliswilstrasse 73a, Emmenbrücke LU
🕕 Ora 18:00

Në kuadër të programit do të shfaqen materiale dokumentare, do të mbahen fjalime përkujtimore dhe do të ofrohen pika artistike dhe muzikore.

I ftuar special në këtë ngjarje do të jetë z. Nusret Pllana, autor i veprës “Fëmijët shqiptarë në Kosovë – viktima të gjenocidit”.

Aktiviteti synon të ruajë kujtesën kolektive dhe të nxisë ndërgjegjësimin shoqëror mbi vuajtjet e popullatës civile, në veçanti të fëmijëve, gjatë luftës në Kosovë.

Ngjarja është e hapur për publikun dhe mbështetet nga komuniteti shqiptar në Zvicër.

📩 [email protected]
📞 041 250 52 60
🌐 www.misioni-lu.ch

 

Ushtria zvicerane siguron mbështetje të zgjeruar për Blatten

Posted on by Alb

Ushtria zvicerane ka njoftuar të enjten se do të mbetet e pranishme në Blatten (VS) për një periudhë afatgjatë. Pajisjet ushtarake do të qëndrojnë aty për të mundësuar një reagim të shpejtë, ndërsa ushtarët do të kthehen në zonën e pritjes për të vijuar përgatitjet dhe stërvitjet, duke qenë gjithmonë gati për ndërhyrje në rast nevoje.

Ndërkohë, Këshilli Shtetëror i kantonit Wallis ka vendosur të ndajë një shumë fillestare prej 10 milionë frangash në ndihmë financiare për banorët e komunës Blatten, si pjesë e përpjekjeve për të mbështetur komunitetin pas fatkeqësisë.

Gjeologu kantonal i Wallis, Raphaël Mayoraz, në një intervistë në programin “Infrarouge” të RTS, ka paralajmëruar se situata në zonën e Lötschental mbetet e paqëndrueshme dhe mund të zgjasë për një kohë të gjatë. Ai ka përmendur rënien e vazhdueshme të gurëve nga mali Petit Nesthorn, rrezikun e përmbytjeve masive në rast stuhie, si dhe mundësinë që fanshi aluvial të hapet papritmas dhe të lirojë ujërat e Lonza-s të mbajtura në liqenin Blatten, transmeton albinfo.ch.

Kërkimi për personin e zhdukur rifilloi të hënën, me personelin dhe pajisjet e specializuara që punojnë aktualisht në vendngjarje. Sipas mediave gjermanofolëse, bariu i deleve ndodhej në shtëpinë e tij në rajonin Tennmatten gjatë tragjedisë, një zonë që nuk është evakuuar.

Solidariteti zviceran ka aktivizuar fondin e ndihmës për fatkeqësitë dhe ka bërë thirrje për donacione për të ndihmuar të prekurit nga kjo ngjarje. Brenda një jave, janë mbledhur më shumë se 11 milionë franga.

Lajm i mirë për pacientët: Rimbursimet private rifillojnë në Gjenevë

Posted on by Alb

Dy nga siguruesit më të mëdhenj në Zvicër, CSS dhe Helsana, kanë arritur një marrëveshje me klinikat private La Colline dhe Les Grangettes në Gjenevë, pas muajsh përplasje me mjekët mbi rimbursimin e trajtimeve me sigurim suplementar.

Që nga fillimi i vitit, shumica e siguruesve kishin ndalur rimbursimet për pacientët me sigurim privat ose gjysmëprivat në këto klinika. Kjo kishte çuar në anulimin e shumë operacioneve dhe vështirësi financiare për klinikat dhe mjekët, transmeton albinfo.ch.

Marrëveshja e re, e inicuar nga vetë klinikat dhe e mbështetur nga shumica e mjekëve, synon të rikthejë normalitetin. Megjithatë, disa mjekë mund të refuzojnë ta nënshkruajnë kontratën.

Ky zhvillim mund të nxisë edhe klinika të tjera në Gjenevë të ndjekin shembullin, duke çuar drejt një sistemi me tarifa të ndryshme sipas klinikës, në vend të një modeli të unifikuar për të gjithë kantonin.

Rreth 80% e pacientëve pritet të rifitojnë mbulimin nga sigurimi suplementar.

 

Ushqimet e përpunuara që përshpejtojnë plakjen

Posted on by Alb

Një dietë e pasur me ushqime ultra të përpunuara përshpejton plakjen biologjike, madje edhe tek ata që ndjekin një dietë të ekuilibruar.

Kjo konfirmohet nga një studim i kohëve të fundit, i botuar në revistën shkencore “The American Journal of Clinical Nutrition” dhe i kryer nga Instituti i Hospitalizimit dhe Trajtimit Shkencor Neuromed i Pozzilli (IS), në bashkëpunim me Universitetin Lum të Casamassima (BA).

“Analiza tregoi se njerëzit që raportuan një konsum më të lartë të ushqimeve ultra të përpunuara kishin, mesatarisht, një moshë biologjike më të lartë se mosha e tyre kronologjike, duke treguar një përshpejtim të mundshëm të plakjes për shkak të një konsumi më të lartë të këtyre ushqimeve”, shpjegon Simona Esposito, autorja e parë e studimit dhe fituese e çmimit “Gianni Barba” për kërkimin më të mirë shkencor në fushën e të ushqyerit njerëzor, përcjell albinfo.ch.

“Aspekti më i rëndësishëm i studimit është fakti se marrëdhënia midis konsumit të ushqimeve ultra të përpunuara dhe plakjes ishte e pavarur nga cilësia e dietës”, vazhdon ajo.

“Edhe njerëzit që ndoqën dieta të konsideruara të ekuilibruara nga një pikëpamje strikte ushqyese, të pasura me fruta, perime dhe fibra, por që përfshinin një sasi të konsiderueshme ushqimesh ultra të përpunuara, treguan shenja të plakjes biologjike më të shpejtë”, thekson Esposito.

Hulumtimi nxori në pah, midis ushqimeve ultra të përpunuara të lidhura me një përshpejtim të moshës biologjike: ushqime të kripura, ëmbëlsira të paketuara ose pije të gazuara, por edhe produkte të gatshme si buka e paketuar për sanduiç, disa lloje drithërash për mëngjes, supa të gatshme, vakte të ngrira të gatshme dhe kos me aromë.

Një element tjetër shqetësues për studiuesit ka të bëjë me paketimin, pasi shumë ushqime ultra të përpunuara në fakt shiten në enë plastike ose materiale shumështresore, të cilat mund të lëshojnë ndotës kimikë potencialisht të dëmshëm për trupin, të tilla si ftalate ose bisfenole.