Avokati Luka Mishetiq e ka nisur fjalën e tij para trupit gjykues duke deklaruar se ish-presidenti i Kosovës, Hashim Thaçi, është i pafajshëm dhe se ky parim duhet të jetë pikënisja e çdo vendimi gjyqësor, përcjell albinfo.ch.

“Kur të filloni shqyrtimet tuaja, do të nisni nga qëndrimi se Hashim Thaçi është i pafajshëm dhe vetëm më pas do të vlerësoni nëse provat e paraqitura nga Zyra e Prokurorit të Specializuar ju kanë bindur, përtej çdo dyshimi të arsyeshëm, se ai është fajtor”, u ka thënë Mishetiq gjyqtarëve.

Ai ka kritikuar ashpër Zyrën e Prokurorit të Specializuar (ZPS), duke theksuar se në dosjen e saj janë shpërfillur prova të rëndësishme që, sipas tij, diskreditojnë pretendimet e Prokurorisë.

“Sipas parashtrimeve përfundimtare të ZPS-së, është sikur të lexosh analizën e një filmi të shkruar nga dikush që nuk e ka parë kurrë filmin”, u shpreh Mishetiq.

Avokati paralajmëroi se një shpallje fajtorie ndaj Thaçit do të përbënte një “padrejtësi ligjore dhe historike”, duke theksuar se argumentet e Prokurorisë nuk përfaqësojnë interpretimin e vetëm të arsyeshëm të provave.

“Ekzistojnë dyshime të bazuara dhe të mjaftueshme që ju të shpallni Hashim Thaçin jofajtor për të gjitha pikat e aktakuzës”, tha ai.

Një pjesë e rëndësishme e mbrojtjes u fokusua te pretendimi i ZPS-së për ekzistencën e një ndërmarrjeje të përbashkët kriminale me synim marrjen nën kontroll të Kosovës. Mishetiq theksoi se nuk ekziston asnjë provë e drejtpërdrejtë që mbështet këtë teori.

“Nuk ka pasur takime ku të jetë diskutuar ky synim, nuk ka dokumente, nuk ka dëshmi nga asnjë dëshmitar. Përkundrazi, dëshmitarët që kanë folur për këtë çështje e kanë hedhur poshtë teorinë e Prokurorisë, ndërsa ZPS-ja as nuk i ka pyetur ata për këtë”, deklaroi ai.

Mishetiq shtoi se Thaçi nuk ka qenë i pranishëm në Kosovë gjatë një pjese të madhe të periudhës së përfshirë në aktakuzë dhe se nuk ekzistojnë prova që ai ka marrë pjesë në takimet e Shtabit të Përgjithshëm.

Sipas tij, Prokuroria ka tentuar ta anashkalojë këtë fakt duke pretenduar se anëtarët e Shtabit janë konsultuar përmes telefonit ose janë informuar më vonë për vendimet e marra. /Albinfo.ch

Policia e Kosovës ka konfiskuar municion dhe pajisje ushtarake gjatë një kontrolli të realizuar në një shtëpi të pabanuar në Leposaviq, përcjell albinfo.ch.

Sipas njoftimit zyrtar të policisë, rasti ka ndodhur më 9 shkurt 2026, rreth orës 14:29. Gjatë kontrollit në objektin, i cili rezulton të jetë në pronësi të një shtetasi serb, zyrtarët policorë kanë gjetur dhe sekuestruar një sasi municioni dhe pajisje të ndryshme ushtarake.

Në mesin e gjësendeve të sekuestruara janë 59 fishekë të kalibrit të panjohur, një kuti metalike, një helmetë ushtarake, një xhaketë me emblemë të Serbisë, një futrollë për thikë, një pjesë e jelekut antiplumb, një çantë ushtarake, dy karikatorë të armës automatike AK-47, si dhe një karikator tjetër me një fishek.

Lidhur me rastin është njoftuar prokurori kompetent, i cili ka urhëruar inicimin e procedurave të nevojshme ligjore.

Autoritetet kanë bërë të ditur se hetimet për këtë rast janë duke vazhduar.

Ambasada e Shteteve të Bashkuara të Amerikës në Kosovë ka konfirmuar se do të vazhdojë ta mbështesë Forcën e Sigurisë së Kosovës (FSK) në përvetësimin e pajisjeve ushtarake amerikane, duke forcuar njëkohësisht lidhjet tregtare dhe bashkëpunimin mes dy vendeve, përcjell albinfo.ch.

Një zëdhënës i Ambasadës amerikane në Prishtinë i ka thënë Radios Evropa e Lirë se bashkëpunimi i fuqishëm ushtarak mes SHBA-së dhe Kosovës po ndihmon FSK-në të arrijë vetëmjaftueshmëri dhe ta pozicionojë Kosovën si një kontribuuese të rëndësishme për stabilitetin rajonal dhe global.

“Shtetet e Bashkuara mbështesin plotësisht tranzicionin dhjetëvjeçar të Forcës së Sigurisë së Kosovës në një forcë mbrojtëse territoriale shumetnike, profesionale dhe të ndërveprueshme me NATO-n, e aftë për të rritur sigurinë rajonale dhe për të promovuar interesat e sigurisë së SHBA-së”, ka deklaruar zëdhënësi.

Këto komente janë dhënë në përgjigje të pyetjeve të REL-it lidhur me fazën aktuale të transformimit të FSK-së në ushtri dhe rolin që SHBA-ja synon të luajë në fazën përfundimtare të këtij procesi.

Procesi i transformimit ka nisur në vitin 2018, pas miratimit të ligjeve përkatëse nga Kuvendi i Kosovës, të cilat i hapën rrugë shndërrimit të FSK-së në një forcë ushtarake me kapacitete të plota. Që nga ajo kohë, SHBA-ja e ka cilësuar këtë proces si historik dhe ka shprehur vazhdimisht mbështetjen e saj për zhvillimin profesional të FSK-së.

Ndryshe nga qëndrimi amerikan, NATO-ja e ka vlerësuar këtë vendim si “të papërshtatshëm në kohë”, për shkak të tensioneve mes Kosovës dhe Serbisë.

Sipas zyrtarëve të Ministrisë së Mbrojtjes së Kosovës, transformimi pritet të përfundojë në vitin 2028. Aktualisht po zhvillohen kapacitetet ajrore, po forcohen regjimentet luftarake dhe po punohet në plotësimin e komponentit rezervë me 3.000 pjesëtarë, ndërsa objektivi prej 5.000 trupash të rregullta është arritur tashmë.

Viteve të fundit, Kosova ka marrë ose ka blerë nga SHBA-ja dronë RQ-20 Puma, raketa antitank Javelin dhe automjete ushtarake Humvee.

Ndërkohë, FSK-ja po përgatitet të bashkohet edhe me Forcën Ndërkombëtare Stabilizuese për Gazën, si pjesë e planit për paqe në këtë rajon, të propozuar nga presidenti amerikan Donald Trump.

Ish-komandanti i UÇK-së, Haxhi Shala është liruar nga burgu i Dhomave të Specializuara të Kosovës në Hagë, ku vuante dënimin me 3 vite burgim për veprat e pengimit të drejtësisë dhe intimidimit të dëshmitarëve në procedurat gjyqësore të Gjykatës në Hagë, përcjell albinfo.ch.

Shala u dënua më 4 shkurt 2025, kur Trupi Gjykues miratoi marrëveshjen e pranimit të fajësisë mes tij dhe Zyrës së Prokurorit të Specializuar të DhSK-së, duke e gjetur fajtor për pjesë të aktakuzës në lidhje me pengimin e zyrtarëve dhe intimidimin e dëshmitarëve.

Në vendimin e dënimit u vendos që koha që Shala kishte kaluar në paraburgim prej datës 11 dhjetor 2023, kur u arrestua dhe filloi të mbahej në qendrat e paraburgimit të DhSK-së, do të llogaritej brenda vuajtjes së dënimit prej 3 vjetësh.

Në kuadër të një marrëveshjeje ndërmjet tij dhe prokurorisë, Shala pranoi se bashkë me të tjerë kishte tentuar të ndikonte te një dëshmitar që të mos dëshmonte para Specialeve.

Gjithashtu, në bazë të vendimit të gjykatës, Shala u pajtua që të paguante 400 euro si dëmshpërblim për “viktimën 01” në këtë çështje. Në vitin 2025, Shala kishte bërë një kërkesë për lirimin me kusht, duke argumentuar se kishte shërbyer pjesën më të madhe të dënimit, por kjo kërkesë u rrëzua nga Presidentja e DhSK-së, pasi nuk i plotësonte kriteret ligjore dhe nuk kishte shfaqur pendesë të mjaftueshme.

Sipas të dhënave zyrtare, Shala ka qëndruar i arrestuar që nga 11 dhjetori 2023, dhe lirimi i tij sot shënon përfundimin e vuajtjes së pjesës më të madhe të dënimit të shqiptuar prej Specialeve./Albinfo.ch

Forca e Sigurisë së Kosovës (FSK) ka ndryshuar lokacionin e parakalimit për nder të Ditës së Pavarësisë, më 17 shkurt, përcjell albinfo.ch.

Ndryshe nga vitet e kaluara, kur parakalimi organizohej në sheshet qendrore të Prishtinës, sivjet ai do të mbahet në rrugën “Luan Haradinaj”, në segmentin nga “Qafa” deri te “New Born”.

Lajmi është konfirmuar nga Vëllazërim Qerimi, shef i sektorit të informimit publik në FSK.

Sipas programit zyrtar të manifestimeve shtetërore për shënimin e 18-vjetorit të Pavarësisë së Kosovës, parakalimi i FSK-së do të nisë në orën 11:30.

Autoritetet u kanë bërë thirrje qytetarëve të respektojnë udhëzimet e sigurisë dhe të planifikojnë lëvizjet në përputhje me ndryshimet në qarkullim gjatë kësaj ngjarjeje. /Albinfo.ch

Kryeministri në detyrë, Albin Kurti, ka bërë të ditur se nesër do të marrë pjesë në seancën konstituive të Kuvendit të Kosovës. Ai u shpreh optimist për zhvillimin e procesit:

“Më duhet me shku në Llap tash. Nesër do t’i përgjigjemi obligimit për seancë konstituive dhe besoj që do të shkojë mbarë e mirë gjithçka,” tha shkurt Kurti para mediave.

Deklarata e tij vjen pas thirrjes së presidentes Vjosa Osmani për seancën konstituive, e cila është caktuar për nesër, më 11 shkurt, në orën 12:00, një ditë pas certifikimit të rezultateve të zgjedhjeve nga Komisioni Qendror i Zgjedhjeve.

Presidenca ka bërë të ditur se vendimi për datën e seancës u mor pas konsultimeve me shumicën e partive parlamentare dhe duke marrë parasysh urgjencën e formimit të institucioneve, miratimin e buxhetit dhe marrëveshjeve ndërkombëtare. Seanca konstituive shënon hapin e parë drejt krijimit të institucioneve të reja të Kosovës./Albinfo.ch