Qeveria e Kroacisë lidhur me deklaratën e nënshkruar nga tri vendet, më 18 mars, komentoi se nisma e Kosovës, Shqipërisë dhe Kroacisë për bashkëpunim në fushën e sigurisë dhe mbrojtjes, “është e hapur edhe për aleatë e partnerë të Bashkimit Evropian dhe NATO-s”, që “duan të kontribuojnë në ndërtimin e stabilitetit, sigurisë dhe qëndrueshmërisë në rajonin e Evropës Juglindore”.

Sipas saj, nismës mund t’i bashkohen të gjitha vendet që, po ashtu, duan t’i ofrojnë mbështetje Kosovës dhe Shqipërisë në rrugën e tyre evropiane dhe euroatlantike.

Qëllim i saj “nuk është krijimi i ndonjë aleance ushtarake”.

“Një aleancë e tillë – përveç anëtarësimit në NATO – as që është e nevojshme”, theksohet në përgjigjen me shkrim të Qeverisë kroate, dërguar Radios Evropa e Lirë.

Ndryshe nga Shqipëria dhe Kroacia, Kosova nuk është anëtare e NATO-s.

Në reagimet e tij të para ndaj nismës, presidenti i Serbisë, Aleksandar Vuçiq, ka thënë se me nënshkrimin e dokumentit, Kroacia, Shqipëria dhe Kosova “kanë hapur një garë armësh në rajon” dhe “kanë shkelur marrëveshjen nënrajonale të vitit 1996”.

Kjo marrëveshje, e cila ka të bëjë me kuotat e lejuara në armatim, u nënshkrua atëkohë nga dy entitetet e Bosnje e Hercegovinës – Federata e Bosnje e Hercegovinës dhe Republika Sërpska, si dhe nga Kroacia dhe nga Republika Federale e Jugosllavisë, e cila përbëhej nga Serbia dhe Mali i Zi.

Në deklaratën dhënë Radios Evropa e Lirë, Qeveria kroate thotë se kjo marrëveshje është zbatuar vazhdimisht për 29 vjet.

Ajo, po ashtu, kujton se as Shqipëria dhe as Kosova nuk janë palë në atë marrëveshje.

“Në këtë kontekst, është krejtësisht e kotë të lidhet me Deklaratën e përbashkët, të nënshkruar së voni ndërmjet Shqipërisë, Kroacisë dhe Kosovës, qëllimi kryesor i së cilës është forcimi i bashkëpunimit ndërmjet ministrive të mbrojtjes të vendeve mike, partnerëve dhe aleatëve”, thuhet në reagimin e Qeverisë së Kroacisë.

Qeveria e Serbisë dhe Ministria e Mbrojtjes e këtij vendi nuk iu përgjigjën pyetjes së Radios Evropa e Lirë se përse e shohin si kërcënim nismën e tri vendeve ballkanike.

Por, Daniel Serwer, profesor në Universitetin Johns Hopkins në SHBA, thotë se Beogradi zyrtar “e di fare mirë” se aleatët e NATO-s nuk mund të veprojnë në mënyrë të njëanshme kundër Serbisë.

“Për më tepër, tri vendet e përmendura nuk paraqesin asnjë kërcënim për Serbinë”, thotë Serwer.

Deklaratën e tri shteteve ai thotë se e sheh si “një lëvizje që kontribuon në stabilitet, jo në destabilizim”.

Ai vlerëson se Kosova ka vepruar “mençur” që ka lidhur partneritet me Shqipërinë dhe Kroacinë, të cilat janë vende anëtare të NATO-s.

NATO-ja e komentoi gjithashtu Deklaratën, duke e cilësuar si marrëveshje trepalëshe mes tri vendeve.

“NATO-ja, si organizatë, nuk është pjesë e iniciativës dhe, për këtë arsye, nuk ka pasur ndonjë rol në procesin e konsultimit”. 

Në një deklaratë, presidentja e shtetit, Vjosa Osmani, para familjarëve të masakruarve 26 vjet më parë në Krushë të Madhe, u betua se nuk do të ndalen asnjëherë derisa drejtësia të triumfojë dhe krimet mizore të Serbisë të marrin dënimin e merituar, përcjell albinfo.ch.

E para e vendit tha se kur në një fshat vriten kaq shumë njerëz të pafajshëm dhe derdhet kaq shumë gjak, ai nuk është vetëm një vend në hartë, por është një dëshmi e përjetshme.

“Sot qëndrojmë në Krushë të Madhe, aty ku dhembja është gdhendur në çdo gur, në çdo prag shtëpie, në çdo zemër që rreh për drejtësi. Para 26 vitesh, ky fshat u godit nga një prej krimeve më të tmerrshme të regjimit gjenocidal të Serbisë. 241 burra e djem u masakruan, mes tyre 7 fëmijë e 5 gra, përfshirë edhe një grua shtatzënë”, tha gjatë fjalimit presidentja.

Edhe pas 26 vitesh, kur ende 64 persona figurojnë të zhdukur, e para e shtetit tha se kjo është një krim i shumëfishtë i Serbisë gjenocidale, sepse familjet e tyre jetojnë çdo ditë me dhimbjen, me mallin e një pritjeje që nuk merr fund asnjëherë.

“E në këtë radhë të gjatë të dhimbjes qëndron edhe një emër i madh i kombit tonë, një mendje e ndritur, një figurë e paharruar, Ukshin Hoti. Prej më shumë se dy dekadash, edhe fati i tij, sikurse i të gjithë banorëve të Krushës që sot janë të zhdukur me dhunë, mbetet i pazbardhur”, tha ajo para familjarëve në këtë ditë përkujtimore.

E para e shtetit tha se një intelektual, një patriot, një zë i guximshëm i kombit, u mor me dhunë nga regjimi kriminal serb, dhe prej atëherë nuk dihet më asgjë për të, përveçse se atë e mori Serbia.

“Ky mister nuk është vetëm një padrejtësi ndaj Ukshin Hotit dhe familjes së tij, por një plagë në ndërgjegjen e njerëzimit. Sepse pyetja ‘Ku është Ukshin Hoti?’ ende kërkon përgjigje, ashtu siç kërkojnë përgjigje edhe rreth 1600 të zhdukur me dhunë.”

Osmani tha se masakra e Krushës së Madhe nuk është vetëm një krim i tmerrshëm i para 26 vitesh, por është e përditshmja, është e sotshmja.

“Sepse dhimbja vazhdon edhe sot, njësoj si para 26 vitesh. Ajo është një betejë e hapur për drejtësi, prandaj nuk mund të lejojmë që gjaku i atyre të mbetet pa zë dhe sakrifica e tyre të harrohet. Ne nuk duhet të heshtim, nuk duhet të ndalemi, nuk duhet të lejojmë që drejtësia të vonohet pafundësisht, sepse drejtësia për Krushën e Madhe është drejtësi për të gjithë ata që dhanë jetën për lirinë tonë, për heronjtë e UÇK-së dhe për martirët e lirisë. Sot, para kujtimit të martirëve tanë, para dhembjes së familjeve të tyre, para kësaj toke të shenjtë, ne bëjmë betim: Nuk do të ndalemi asnjëherë derisa drejtësia të triumfojë. Nuk do të pushojmë derisa krimet që u kryen nga ana e Serbisë të marrin përgjigjen e duhur. Nuk do ta harrojmë kurrë sakrificën e Krushës së Madhe”, tha presidentja.

Behgjet Pacolli, përmes një postimi në rrjetin social Facebook, ka njoftuar se që nga 26 marsi, Republika e Kenias e ka njohur zyrtarisht Kosovën si shtet të pavarur e sovran, përcjell albinfo.ch.

“Kjo njohje nuk është thjesht një deklaratë – është një fitore e madhe për shtetin e Kosovës, është zëri i lirisë sonë që dëgjohet thellë në zemrën e Afrikës! Sot, flamuri ynë i shtetit ngrihet lart me krenari në Nairobi, dhe kjo është një dëshmi se Kosova ecën përpara, fuqishëm dhe me dinjitet kur punohet dhe ka vullnet për të”, ka shkruar Pacolli.

Tutje, ai ka shtuar se kjo ka ardhur si rezultat i një pune të gjatë, të palodhshme e me shumë përkushtim.

“Kjo fitore nuk erdhi rastësisht. Ajo është fryt i një pune të gjatë, të palodhur, me përkushtim e sakrificë. Që nga viti 2009, unë personalisht kam lobuar dhe kam biseduar me autoritetet keniane për ta bërë këtë ditë realitet. Kam shkuar derë më derë, zyrë më zyrë, me vetëm një qëllim – të bëj të njohur zërin dhe të drejtën e popullit të Kosovës për liri, pavarësi dhe sovranitet.”

“Presidenti William Ruto i qëndroi fjalës së dhënë në vitin 2016. Ai e vizitoi Kosovën në vitin 2019 dhe e ndjeu fuqinë dhe vendosmërinë e popullit tonë. Në vitin 2023, gjatë vizitës time në Nairobi, ai e bëri hapin e parë duke njohur pasaportat tona. Sot, në një ceremoni madhështore, ai e tha me zë të lartë: Kosova është shtet i njohur nga Kenia.”

Bëhet e ditur se Prokuroria Themelore në Prishtinë ka autorizuar Policinë e Kosovës që të nisë hetimet për procesin e votimit me postë në zgjedhjet parlamentare të 9 shkurtit, përcjell albinfo.ch.

“Ju njoftojmë se Prokuroria Themelore në Prishtinë ka autorizuar Policinë e Kosovës në grumbullimin dhe verifikimin e informacioneve, mirëpo në këtë fazë të procedurës të parashtruara nuk mund të jepen detaje më të hollësishme sepse do të cenohej procesi hetimor.”

Po ashtu, është kërkuar që të sigurohen të dhënat e detajuara të votuesve të regjistruar jashtë vendit.

Ndërkohë, janë kërkuar edhe kopjet elektronike të të gjitha fletëvotimeve përmes postës të numëruara në QNR dhe të zarfeve.

Për votat me postë ka pasur ankesë Lëvizja Vetëvendosje. Kjo parti ka kërkuar që të anulohen votat e Lidhjes Demokratike të Kosovës që kanë ardhur me postë. Sipas LVV-së, në këto vota ka pasur “vjedhje industriale”. LVV-ja ka kërkuar anulimin e gati 19 mijë votave për LDK-në.

LDK-ja ka konsideruar se me këto veprime, partia në pushtet po u bën presion autoriteteve.

Në votat me postë ka pasur ankesë edhe Koalicioni i Partisë Demokratike të Ashkalinjve dhe Lëvizjes për Bashkëveprim, që ka kërkuar të anulohen votat e Partisë së Ashkalinjve për Integrim.

Sivjet në diasporë u votua nëpër përfaqësi, por edhe me votë me postë. Në përfaqësi diplomatike, LVV-ja mori mbi 80 për qind, ndërsa LDK-ja ishte e treta me 7.3 për qind të votave. Ndërkaq, në votën përmes postës, LVV-ja mori 51.89 për qind, ndërsa LDK-ja 30.21.

Akuza e VV-së ka qenë kryesisht për shpërputhje të votave të disa kandidatëve të LDK-së nga votimet tjera në votimin me postë.

Votimin me postë e shfrytëzuan rreth 60 mijë qytetarë.

Të mërkurën (sot), është dita e fundit kur Gjykata Supreme, si instanca më e lartë gjyqësore në procesin e zgjedhjeve, duhet të dalë me vendime për ankesat e subjekteve politike. /koha.net

Kryeministri në detyrë, Albin Kurti, ndër “sukseset” e qeverisë së tij ka radhitur investimet në fushën e mbrojtjes, përcjell albinfo.ch.

Ai tha se investimet në armatim janë shumëfishuar, ndërsa duke folur për mandatin e ri, deklaroi se ushtrisë do t’i ndahen mbi 1 miliard euro.

“Në mandatin e ri, ushtrisë do t’i ndajmë mbi 1 miliard euro. Do të kemi fabrikë të municioneve dhe dronë ushtarakë Made in Kosova, pra që i prodhojmë vetë. Kemi filluar të blejmë, për dallim prej më herët, dhe për dallim edhe prej tani, do të fillojmë të prodhojmë atë që kemi nisur ta blejmë,” tha Kurti në mbledhjen e sotme të Qeverisë.

Pavarësisht se mandati katërvjeçar i Kurtit u dominua nga paralajmërimet e SHBA-së për partneritetin me Kosovën, Kurti lavdëroi marrëdhëniet e qeverisë së tij me amerikanët.

“Me Shtetet e Bashkuara të Amerikës i kemi zgjeruar dhe thelluar marrëdhëniet në fushën e energjisë dhe të mbrojtjes. Grantin më të madh ndonjëherë nga SHBA e ka fituar qeveria jonë, në vlerë prej 202 milionë dollarësh për sistemin e baterive të energjisë elektrike.

Nga bashkëpunimi në fushën e mbrojtjes me SHBA-në kemi blerë sistemin raketor anti-tank Javelin dhe do të blejmë edhe helikopterët Black Hawk.”

Kryeministri Albin Kurti, në mbledhjen e sotme të Qeverisë, ka thënë se qeveria që ai ka udhëhequr për katër vjet “ka arritur rezultate të jashtëzakonshme”, përcjell albinfo.ch.

Kurti përmendi rritjen e pensioneve dhe shtesat për nënat lehona dhe fëmijët.

Ai gjithashtu përmendi edhe rritjen e pagave në sektorin publik dhe rritjen e pagës minimale në sektorin privat, për të cilën tha se në mandatin e ardhshëm do të rritet mbi 500 euro.

“Kemi rritje të pensioneve; prej mbi 300 mijë pensionmarrës janë rritur prej 20%. Përveç rritjes së rregullt, të gjithë kanë marrë shtesa prej 100 eurosh pesë herë gjatë mandatit tonë. Rreth 70 mijë nëna lehona, sërish për herë të parë, kanë marrë shtesa nga shteti, sikurse edhe mbi 400 mijë fëmijë. Për fëmijët i kemi dyfishuar dhe trefishuar shtesat. Tri herë kemi rritur pagën në sektorin publik. Në sektorin privat, pagën minimale dy herë: nga 130–170 sa e kemi gjetur – në 265 euro, dhe nga 265 – në 350 euro. Mandatin tjetër do ta rrisim përsëri mbi 500 euro”, tha Kurti.

Kurti përmendi edhe sektorin e shëndetësisë, ku premtoi se në mandatin e ardhshëm do të rrisin buxhetin për listën esenciale të barnave deri në 100 milionë euro.

“Shëndetësia publike është bërë më e mirë, më e lirë dhe me më shumë shërbime. Shumicën prej klinikave i kemi transformuar, shumë prej shërbimeve jetike për qytetarët janë bërë pa pagesë, e disa me çmime më të përballueshme. Në mandatin që na pret, do të vazhdojmë me investime spital pas spitali. Do të ndërtojmë dy spitale të reja e gjashtë poliklinika specialistike, dhe buxhetin për listën e barnave esenciale, që tashmë është në nivel rekord, do ta ngremë deri në 100 milionë euro”, tha Kurti.

Katër jetë janë marrë në vetëm tre ditë, çka ka bërë që kryeministri i Kosovës, Albin Kurti, të flasë në mbledhjen e sotme të Qeverisë mbi ngjarjet.

Kurti ka kërkuar nga organet e ligjit angazhim maksimal, ndërsa tha se duhet të ketë analizë profesionale, veprim institucional dhe reflektim shoqëror mbi gjithçka ka ndodhur në javën e fundit.

“Dua të ndaj brengën e njëjtë me të gjithë ju në lidhje me katër vrasjet e regjistruara në tri ditët e fundit. Ftoj organet e rendit, hetuesisë, që të trajtojnë me seriozitetin më të lartë shkaqet, rrethanat dhe predispozitat e dorasëve, në mënyrë që edhe të vihet drejtësi, edhe të parandalohen akte të tilla. Vrasja është akti më i rëndë njeriu-njeriut, ajo asnjëherë nuk guxon të normalizohet. Vrasja është jo vetëm vrasje e njeriut, por edhe e shoqërisë në të cilën ai bënte pjesë, pra shoqërisë sonë. Gjithë vendi është tronditur dhe lënduar nga kjo seri e vrasjeve, që duhet të ndalohet, ndalet, dënohet. Duhet, natyrisht, analizë e kujdesshme profesionale, veprim i menjëhershëm institucional, reflektim shoqëror që adreson dhunën që kemi parë në këto ditët e fundit. Kjo është thirrje për të gjithë ne. Edhe për faktin që këto vrasje ndodhën pikërisht në javën kur shënojmë 26-vjetorin e bombardimeve të NATO-s në Kosovë për ta ndalur gjenocidin e Serbisë dhe përkujtojmë masakrat e njëpasnjëshme të aparatit shtetëror të Serbisë, që synonte shfarosjen e popullit shqiptar,” tha ai.

Së fundmi, Ambasada Amerikane në Kosovë ka njoftuar se kontrolli i vizave nuk ndalet pas lëshimit të tyre, përcjell albinfo.ch.

Ajo ka bërë të ditur se SHBA-ja i kontrollon vazhdimisht mbajtësit e vizave dhe ka paralajmëruar për revokim të tyre për ata që nuk zbatojnë ligjet dhe rregullat e emigracionit të SHBA-së.

“Kontrolli i vizave në SHBA nuk ndalet pas lëshimit të vizës. Ne i kontrollojmë vazhdimisht mbajtësit e vizave për t’u siguruar që ata zbatojnë të gjitha ligjet dhe rregullat e emigracionit të SHBA-së – dhe ne do t’ua revokojmë vizat dhe do t’i dëbojmë nëse nuk e bëjnë këtë”, ka shkruar Ambasada.