Ministria e Shëndetësisë në Kosovë, pas rritjes së temperaturave ka rekomanduar institucionet publike dhe private t’i zbatojnë masat mbrojtëse për punëtorët, rekomandim i cili është i vlefshëm nga sot  deri më 15 gusht.

Sipas vendimit kërkohet që të shmanget puna në ambient të jashtëm nga ora 11:00 deri në orën 16:00. Ndërsa kërkohet që gratë shtatzëna të lirohen nga puna nga ora 11:00 deri në orën 16:00, nëse nuk është e mundur që ato të punojnë nga shtëpia, të përshtaten oraret e punës herët në mëngjes apo pasdite dhe nëse s’ka ajrosje të mjaftueshme dhe pika freskimi në vendet e punës.

Personat me sëmundje kronike është udhëzuar të punojnë me orar të shkurtuar, maksimalisht 4 orë në ditë. Është kërkuar që për të punësuarit të përshtaten oraret e punës herët në mëngjes apo mbrëmje, transmeton albinfo.ch.

“Ministria e Shëndetësisë, në bazë të rekomandimeve të Institutit Kombëtar të Shëndetësisë Publike të Kosovës, rekomandon që institucionet publike dhe private të zbatojnë masa mbrojtëse për mbrojtjen e punëtorëve nga temperaturat e larta, për periudhën 11 – 15 gusht 2025. Temperaturat e larta ndikojnë negativisht në shëndetin e njeriut, veçanërisht tek grupet më të ndjeshme të shoqërisë, si: fëmijët, të moshuarit, gratë shtatzëna, personat me sëmundje kronike, si dhe punëtorët që punojnë në ambiente të hapura apo në kushte pune me temperatura të larta. Ftohen të gjitha institucionet që t’i respektojnë këto rekomandime, me qëllim të mbrojtjes së shëndetit të punëtorëve dhe të grupeve të tjera të ndjeshme”, thuhet në njoftim.

Tutje, Instituti Hidrometeorologjik i Kosovës ka njoftuar se në ditët në vijim temperaturat do të shënojnë rritje të ndjeshme, veçanërisht gjatë orëve të mesditës. Këto temperatura të larta, të kombinuara me lagështinë atmosferike, do të ndikojnë në përkeqësimin e ndjesisë termike dhe mund të rrezikojnë shëndetin e grupeve më të ndjeshme, është thënë në arsyetimi ne MSH-së bazuar në rekomandimin e Institutit të Shëndetit Publik.

Agjencia e Menaxhimit Emergjent në Kosovë, ka dalë me një raport të ri sa i përket situatës me zjarret.

Gjatë periudhës nga ora 08:00 deri në 14:00, janë regjistruar gjithsej 38 vatra zjarri në territorin e Kosovës. Nga këto, 24 vatra vazhdojnë të jenë aktive, ndërsa 14 janë lokalizuar, transmeton albinfo.ch.

Agjencia thekson se “menaxhimi i situatës po zhvillohet në koordinim të plotë me Njësitë Profesionale të Zjarrfikës dhe Shpëtimit. Agjencia shpreh mirënjohje për përkushtimin e palodhshëm të zjarrfikësve dhe angazhimin e tyre në terren në përballje me zjarret”, thuhet në njoftim.

Ministria e Punëve të Jashtme dhe Diasporës së Kosovës ka organizuar sot edicionin e 8-të të Konferencës së Ambasadorëve të Republikës së Kosovës, një ngjarje vjetore që mbledhë përfaqësuesit diplomatikë nga e gjithë bota për të reflektuar mbi punën e bërë, për të vlerësuar rezultatet dhe për të përcaktuar prioritetet e vitit të ardhshëm.

Sipas njoftimit nga ministria, në ceremoninë e hapjes morën pjesë kryeministri në detyrë i Kosovës, Albin Kurti, Ministrja në detyrë e Punëve të Jashtme dhe Diasporës, Donika Gërvalla, ministra, zëvendësministra, shefa të misioneve diplomatike dhe përfaqësues të tjerë institucionalë.

“Kryeministri Kurti theksoi se rrjeti diplomatik i Kosovës është zgjeruar më shumë se kurrë në historinë e saj, duke përfshirë 53 përfaqësi në gjashtë kontinente. Ai nënvizoi rëndësinë e bashkërendimit të punës së ambasadave dhe konsullatave në harmoni të plotë me Ministrinë e Punëve të Jashtme dhe Diasporës, për të përfaqësuar interesat e vendit me një zë të unifikuar. Duke iu referuar sfidave globale dhe rajonale, përfshirë agresionin rus në Ukrainë dhe përpjekjet e Serbisë për të minuar sovranitetin e Kosovës, Kryeministri Kurti theksoi se diplomacia kosovare duhet të jetë aktive, duke luftuar propagandën me promovim të vazhdueshëm të arritjeve të vendit. Ai u shpreh se, ndonëse Serbia ka mjete financiare më të mëdha për lobim, Kosova ka një kauzë të drejtë dhe përkushtim të palëkundur për paqe dhe siguri, vlera këto që nuk mund të blihen”, thuhet në njoftim.

Tutje, Kurti shprehu mirënjohje për angazhimin e ambasadorëve dhe përfaqësuesve diplomatikë, duke vlerësuar kontributin e tyre të përditshëm për shtetin dhe qytetarët e Kosovës.

“Zëvendëskryeministrja dhe Ministrja në detyrë e Punëve të Jashtme dhe Diasporës, znj. Donika Gërvalla, derisa ka përshëndetur punën dhe angazhimin e misioneve diplomatike të Republikës së Kosovës nëpër botë, theksoi reformat thelbësore që MPJD ka ndërmarrë gjatë vitit të fundit, duke vendosur standarde të reja të transparencës dhe menaxhimit të përgjegjshëm financiar, si në MPJD, edhe në misionet diplomatike. ‘Kosova sot flet me një zë më të fortë në botë. Ne kemi reformuar Ministrinë e Punëve të Jashtme dhe Diasporës, kemi vendosur rregull dhe transparencë në çdo euro të shpenzuar, kemi përmirësuar ndjeshëm shërbimet konsullore dhe kemi kthyer kursimet në diplomaci ekonomike, publike e kulturore’, tha Gërvalla”, thuhet në njoftim, transmeton albinfo.ch.

Bëhet e ditur se Gërvalla theksoi rëndësinë e forcimit të diplomacisë ekonomike dhe publike, përfshirë mbështetjen e bizneseve kosovare në tregje ndërkombëtare dhe promovimin e imazhit të Kosovës jashtë vendit. Ajo nënvizoi arritjen e dy njohjeve të reja të shtetësisë dhe anëtarësimin e Kosovës në disa organizata ndërkombëtare, duke e cilësuar këtë si dëshmi të punës së koordinuar diplomatike.

“Një pjesë e rëndësishme e fjalimit iu kushtua përmirësimit të shërbimeve konsullore, dixhitalizimit të procedurave dhe përzgjedhjes së stafit diplomatik e konsullor mbi bazën e meritokracisë, integritetit dhe përvojës profesionale. Ministrja theksoi gjithashtu se mërgata mbetet një aset i çmuar për Kosovën dhe se qasja ndaj saj është gjithëpërfshirëse, nga kultura dhe arsimi te ekonomia dhe teknologjia. Duke iu referuar situatës gjeopolitike, znj. Gërvalla e cilësoi Kosovën si pjesë të palëkundur të kampit të demokracive me orientim euroatlantik, duke theksuar nevojën për unitet të brendshëm dhe veprim proaktiv në arenën ndërkombëtare. Ajo shtoi se veprimet e Serbisë për të minuar subjektivitetin ndërkombëtar të Kosovës dhe për të destabilizuar vendin paraqesin një rrezik real, ndaj të cilit Kosova i përgjigjet me vendosmëri në bashkëpunim me aleatët. “Serbia mbetet një rrezik real për stabilitetin e vendit tonë. Ajo financon dhe udhëzon struktura ilegale kriminale në veri dhe punon çdo ditë për të minuar subjektivitetin tonë ndërkombëtar. Ne i kundërvihemi me vendosmëri dhe së bashku me aleatët tanë do të sigurojmë që kërcënimet e saj të mos shndërrohen kurrë në realitet” theksoi Ministrja Gërvalla”, thuhet ndër të tjera në njoftim.

Ndryshe, Konferenca e 8-të e Ambasadorëve do të vijojë punimet përgjatë tri ditëve me sesione të dedikuara për planifikimin strategjik të politikës së jashtme dhe forcimin e rolit të Kosovës në arenën ndërkombëtare.

Presidentja e Kosovës, Vjosa Osmani, ka pritur sot në takim drejtorin për Ballkanin Perëndimor në Ministrinë e Punëve të Jashtme të Gjermanisë, Michael Reiffenstuel, me të cilin diskutuan për zhvillimet e fundit në vend dhe rajon, e fokus ishin zhvillimet rreth ngërçit politik.

Sipas njoftimit nga presidenca, Osmani ka kërkuar nga Gjermania mbështetje të vazhdueshme për integrimin e plotë ndërkombëtar të Kosovës, veçanërisht në Këshillin e Evropës.

“Presidentja Osmani konfirmoi gatishmërinë e Kosovës për bashkëpunim të thellë me Qeverinë e Kancelarit Merz. Më tej, Presidentja Osmani vlerësoi rolin jetik të Gjermanisë në mbrojtjen e vlerave demokratike, unitetit transatlantik dhe sigurisë evropiane. Presidentja Osmani nënvizoi se Gjermania ka qenë dhe mbetet shtyllë strategjike për Kosovën në ruajtjen e stabilitetit rajonal, si dhe avancimin e rrugës euroatlantike të Kosovës. Tutje, Presidentja kërkoi mbështetjen e vazhdueshme të Berlinit për integrimit e plotë ndërkombëtar të Kosovë e në veçanti në Këshillin e Evropës, duke njohur rolin e Gjermanisë në Këshill dhe rëndësinë e këtij procesi për forcimin e institucioneve demokratike dhe mbrojtjen e të drejtave të njeriut”, thuhet në njoftim, transmeton albinfo.ch.

Bëhet e ditur se në takim, Osmani ka theksuar domosdoshmërinë që Kosova të avancojë drejt anëtarësimit në NATO, ndërsa sa i përket dialogut Kosovë – Serbi, presidentja ka thënë se duhet qartësi strategjike dhe afate të përcaktuara e objektiva të qarta. Po ashtu tha se normalizimi nënkupton njohjen reciproke dhe respektimin e integritetit territorial e rendit kushtetues të Kosovës.

“Presidentja theksoi gjithashtu domosdoshmërinë e avancimit të Kosovës drejt anëtarësimit në NATO, duke elaboruar qartë kontributin që një e tillë do të kishte në garantimin e sigurisë dhe stabilitetit afatgjatë në rajon e Evropë. Në lidhje me procesin e dialogut të ndërmjetësuar nga BE-ja, Presidentja theksoi nevojën për qartësi strategjike, afate të përcaktuara dhe objektiva të qarta, duke theksuar se normalizimi nënkupton njohjen reciproke dhe respektimin e integritetit territorial e rendit kushtetues të Kosovës. Në takim Presidentja foli edhe për rëndësinë e largimit të plotë të masave të padrejta, duke theksuar që Gjermani mund të luaj rol të rëndësishëm në këtë drejtim”, ka njoftuar Presidenca.

Reiffenstuel është takuar edhe me kryeministrin Albin Kurti, takim në të cilin, sipas Zyrës së Kryeministrit, është diskutuar për marrëdhëniet dhe bashkëpunimin bilateral ndërmjet Kosovës dhe Gjermanisë, sidomos në fushën e ekonomisë dhe investimeve të huaja, situatën në rajonin e Ballkanit Perëndimor dhe integrimet evropiane, si dhe për zhvillimet e fundit në vend dhe aktualitetin politik.

“Kryeministri veçoi performancën ekonomike pozitive të vendit në gjashtëmujorin e parë të vitit, rezultatet e politikave të punësimit dhe mbarëvajtjen e punës së institucioneve qeveritare dhe të shtetit, përfshirë të drejtat e pakicave dhe mirëqenien e tyre. Ndër të tjera, ai shprehu shqetësimin e tij për rreziqet që paraqesin dhe vështirësitë që shkaktojnë fushatat dezinformuese dhe lajmet e rrejshme në shtrembërimin e të vërtetave dhe krijimin e narrativave të dëmshme për shoqëritë dhe institucionet demokratike”, thuhet në njoftim.

Kryeministri në detyrë i Kosovës, Albin Kurti, dhe ministrja në detyrë e Punëve të Jashtme, Donika Gërvalla, thanë se Serbia vazhdon të paraqesë kërcënim real për sigurinë kombëtare të Kosovës.

Kurti, gjatë edicionit të tetë të Konferencës së Ambasadorëve – që mbledh në Prishtinë të gjithë ambasadorët e Kosovës në mbarë botën,  tha se ambasadorët e Kosovës kanë rol jetik në luftimin e propagandës kundër shtetit, por edhe të promovimit të Kosovës jashtë vendit.

“Përpjekjet e Serbisë për të minuar sovranitetin dhe integritetin territorial të shtetit tonë vazhdojnë të paraqesin kërcënim ndaj sigurisë sonë kombëtare”, tha Kurti.

Ndërkaq, Gërvalla i cilësoi si “sfiduese” raportet e Kosovës me Serbinë, shtet që sipas saj paraqet “kërcënim real për sigurinë dhe stabilitetin e Kosovës”.

“Serbia jo vetëm që refuzon ta njohë shtetin tonë, por zhvillon fushata të hapura për ta minuar subjektivitetin tonë ndërkombëtar, pengon proceset integruese dhe financon e udhëzon struktura ilegale, kriminale në vendin tonë”, tha ajo.

Sipas Gërvallës, këto nuk janë vetëm kundërshti politike, por “sulme të drejtpërdrejta ndaj Kosovës”.

“Si shtet ligjor, ne i kundërvihemi me vendosmëri dhe bashkëpunojmë ngushtë me aleatët tanë për të garantuar se kërcënimet e Serbisë nuk do të shndërrohen kurrë në realitet”, tha ajo.

Kosova vazhdimisht akuzon Serbinë që kryen fushata kundër njohjes së pavarësisë së Kosovës, e pengon të anëtarësohet në organizata ndërkombëtare dhe kryen fushata të dezinformimit.

Në këtë drejtim, Kurti tha se Serbia “në bashkëpunim të ngushtë me Federatën Ruse”, shpenzon miliona euro për lobim dhe shpërndarjen “sistematike të mesazheve të rreme kundër Kosovës” nëpër botë.

Serbia reagon gjithmonë ashpër kur shtetet e tjera njohin pavarësinë e Kosovës, siç ndodhi gjatë këtij viti, kur Kenia dhe Sudani njohën pavarësinë e Kosovës.

Në Kushtetutën e Serbisë, Kosova ende figuron pjesë e këtij shteti.

Tensionet mes Kosovës dhe Serbisë vazhdojnë të jenë të larta që nga viti 2023, kur një grup i serbëve të armatosur sulmuan Policinë e Kosovës në Banjskë të Zveçanit, duke vrarë një polic. Që atëherë, ka pasur edhe incidente të tjera në këtë pjesë të Kosovës, të banuar me shumicë serbe.

Kosova e fajëson Serbinë për sulmin në Banjskë, por Serbia mohon se ka gisht në të. Përgjegjësinë për sulmin në Banjskë e ka marrë Millan Radoiçiq, ish-nënkryetar i Listës Serbe  partisë kryesore të serbëve në Kosovë. Prishtina kërkon që Beogradi t’ia dorëzojë Radoiçiqin dhe pjesëtarët e tjerë të grupit të armatosur, të cilët besohet se gjenden në Serbi. Edhe faktori ndërkombëtar ka bërë thirrje që përgjegjësit të përballen me drejtësinë./REL