Çmimin e Bernës për Integrim e merr shoqata “Famira”

Qyteti i Bernës ka ndarë të martën Çmimin për Integrim. Për këtë vit çmimi i ka takuar shoqatës "Famira - Fachfrauen für Migration und Integration”. Çmimi i dytë shkon për "Junge Bühne Bern".

“Junge Bühne Bern” u ka mundësuar fëmijëve dhe të rinjve nga qendrat e azilit të luajnë në teatër, thuhet një njoftim nga Drejtoria për arsim, çështje sociale dhe për sport e qytetit të Bernës.

Shumë fëmijë dhe të rinj në strukturat e azilit kanë përjetuar dhunë në jetën e tyre dhe gjurmët i mbajnë në trupin dhe shpirtin e tyre. Drama u ofron atyre mundësinë të futen në qendër të vëmendjes dhe që zëri i tyre të dëgjohet.

Çmimi kap shumën 4000 franga, ndërsa 10 mijë franga është çmimi i qytetit të Bernës, që këtë herë i ka takuar shoqatës “Famira” për barazi më të madhe të grave në sistemin arsimor.

Kurse të tilla “Von Mutter zu Mutter” apo “Aktive Freizeit in der Migration” janë disa nga shembujt e punës së shoqatës.

Me ofertat e saj shoqata u ka mundësuar emigrantëve dhe familjeve të tyre që të kenë qasje në shkolla të rëndësishme.

Përveç kësaj, nënat janë shoqëruar dhe mbështetur në rolin e tyre si prindër. Shoqata inkurajon gratë për të marrë pjesë aktive në shoqëri.

Çmimi i Bernës për Integrim ndahet për të 12-tën herë. Ky aktivitet përbën një pikëtakim të rëndësishëm për personat që angazhohen për integrimin e migrantëve në qytetin e Bernës.