Chodorkowski mbërrin në Zvicër

Ai i është mirënjohës Zvicrës "për qëndrimin që autoritetet e këtij vendi kanë mbajtur gjatë viteve të burgut të tij të padrejtë”

Kritiku i politikës së Kremlinit dhe ish oligarku rus Michail Chodorkowski, i liruar pak kohë më parë nga burgu, ka mbërritur të dielën nga Berlini në Bazel, në Zvicër. Ai e ka bërë këtë udhëtim me tren së bashku me të shoqen, Inna, vajzën Nastia dhe dy djemtë binjakë, Gleb dhe Ilja.

Duke folur për emisionin e lajmeve të televizionit zviceran srf, Chodorkowski, duke sqaruar motivin e ardhjes këtu ka thënë se dy djemtë e tij më të rinj ndjekin mësimet në shkolla zvicerane dhe atje fillon mësimi së shpejti. Në Zvicër jeton po ashtu edhe bashkëshortja e tij, ndërsa vajza jeton në Moskë

Ndërkaq, ish i burgosuri i famshëm i regjimit të Putinit ka bërë me dije se nuk ka hequr dorë nga angazhimet politike. Ai me këtë rast ka thënë se do të vazhdojë të luftojë për lirimin e të burgosurve politikë nga burgjet ruse. Chodorkowski, me vizën e tij të Schengenit ka të drejtë qëndrimi në Zvicër për tre muajt e ardhshëm.

E pyetur lidhur me qëndrimin eventual të përhershëm në Zvicër, një zëdhënëse e ish oligarkut të naftës ka thënë se ai ende nuk ka planifikuar një gjë të tillë. Jo ka theksuar po ashtu se shefi i saj nuk dëshiron të bezdiset gjatë qëndrimit të tij privat në Zvicër.

“Familja e falënderon Zvicrën  për mundësinë që i ka dhënë familjes për të qenë së bashku. Ndërsa vetë Chodorkowski “i është mirënjohës Zvicrës për qëndrimin që autoritetet e këtij vendi kanë mbajtur gjatë viteve të burgut të tij të padrejtë”.