Çfarë tha mbrojtja e Selimit dhe Krasniqit në deklaratat përmbyllëse?

Në Gjykatën Speciale sot u mbajt dita e pestë e deklaratave përmbyllëse në gjykimin ndaj katërshes së UÇK-së.

Gjatë ditës ekipi i Rexhep Selimit përmbylli deklaratat duke thënë se ai duhet të shpallet i pafajshëm, duke argumentuar se nuk ka prova që e lidhin me krimet në aktakuzë.

Mbrojtja e Selimit tha se kërkesa e Prokurorisë për dënim me nga 45 vjet burgim për Selimin, Hashim Thaçin, Kadri Veselin dhe Jakup Krasniqin nënkupton “burgim të përjetshëm”.

Më pas mori fjalën mbrojtja e Krasniqit, që tha se Prokuroria nuk ka vërtetuar se klienti i tyre ka pasur lidhje me ndonjë krim. Mbrojtja madje tha se nuk ka asnjë dëshmitar që ka thënë se Krasniqi e ka rrahur apo keqtrajtuar.

Sipas mbrojtjes, Krasniqi ishte zëdhënës i UÇK-së dhe jo komandant me kontroll ushtarak. Po ashtu, mbrojtja hodhi poshtë pretendimin se Krasniqi ka qenë parësor në hartimin e komunikatave të UÇK-së.

Ekipi mbrojtës i Krasniqit do të vazhdojë deklaratat përmbyllëse të hënën. Po të hënën, trupi gjykues ka dy orë kohë që të parashtrojë pyetje për palët dhe pasdite radhën do ta ketë Prokuroria.

Avokati i Krasniqit, Aidan Ellis, tha se ZPS-ja po e akuzon klientin e tij se ka pasur rol parësor në hartimin dhe shpërndarjen e të gjitha komunikatave të UÇK-së.

“Ky është zmadhim i asaj që tregojnë provat. Realiteti është që Prokuroria nuk ka provuar se kush ka hartuar, as edhe një komunikatë të vetme”, tha Ellis.

Ellis tha se Krasniqi e ka pranuar se ka shkruar komunikata kur nuk ka pasur mundësi që të takohet Shtabi i Përgjithshëm për shkak të ofensivave intensive. Por, avokati tha se ZPS nuk ka vërtetuar se cilat komunikata janë ato.

Avokati tha se shumica e pretendimeve të ZPS-së mbështeten në prova të dobëta dhe jobindëse dhe i referohen intervistës së Rexhep Selimit dhënë për Prokurorinë. Por, Ellis tha se Selimi nuk e ka parë Krasniqin duke shkruar ndonjë komunikatë.

Mbrojtja po ashtu tha se nuk është provë që në shtëpinë e Krasniqit i janë gjetur katër komunikata, duke argumentuar se klienti i tij kishte mbledhur dokumente për shkrimet e tij dhe librin e tij.

Ekipi mbrojtës i Krasniqit ka hedhur poshtë pretendimin e ZPS-së se ai kishte mbikëqyrur departamentin juridik të UÇK-së.

“Ky pretendim mbështetet dëshmitë spekulative që i kanë bërë për interesa të veta Bislim Zyrapit”, tha avokatja Alagendra.

Ajo tha se nuk ka prova se udhëheqësi i gjykatës së UÇK-së, Sokol Dobruna ka marrë udhëzime nga Krasniqi as që i ka raportuar atij.

Alagrendra tha se vetë Dobruna e kishte konfirmuar se i ka dorëzuar raporte vetëm Azem Sylës kur ka qenë në Kosovë.

“ZPS anashkalon dëshmitë fajësuese”, tha Alagrendra./REL

---